1No prisiri Israel. No dyompo e lafu so leki den tra folku. Bika yu drai yu baka gi yu Gado, fu go libi wan hurulibi. Yu ben lobi den sani di den ben e gi yu, fu a hurulibi fu yu ala presi pe den e masi a graan puru na a buba. 2Den no o abi graan moro fu tyari en go fu masi a buba puru. Droifi no o de fu masi fu meki win. Droifi no o de srefi fu piki. 3Den no sa tan ini a kondre fu MASRA. Efraim sa drai go baka na Egipte. Den sa nyan sani di no krin ini Gado ai na ini Asur. 4Den no sa kanti win leki ofrandi gi MASRA. A no sa abi prisiri nanga den meti di den srakti leki ofrandi gi En. Gi den a sa gersi brede di sma e nyan na wan dede-oso. Den alamala di nyan en e doti densrefi. Bika a brede na fu densrefi, a no sa kon ini a oso fu MASRA. 5San un e du dan tapu den spesrutu dei noso den fesadei fu MASRA dan? 6Egipte sa tyari den wan gwe di no dede. Grebi de nofo gi den na ini Memfis. Bus'busi sa gro tapu den diri solfru sani fu den. Maka sa gro kon ini den oso fu den.
7A ten fu strafu doro. A ten fu pai baka kon, èn Israel sa sabi dati. Den sa taki tak' a profeiti lasi en ferstan, taki a man di Gado e sori sani no sabi san a e taki. Disi sa psa fu ala den sondu fu unu, èn fu a feyantifasi fu den. 8A profeiti di Gado poti fu luku Efraim e miti soso trapu di den sma seti gi en na tapu en pasi. Te ini a oso fu en Gado srefi a abi feyanti. 9Den du furu ogri sani, leki ini den dei fu Gibea. A sa memre den kruktudu fu den, A sa strafu den fu den sondu.
10Di Mi feni Israel,
den ben gersi droifi na ini a dreisabana.
Den afo fu unu ben de leki den fosi figa,
den fosi figa na a figabon.
Ma den ben go na Baal-Peor,
èn den gi densrefi na a gado fu syen sani.
Fu dat'ede den tron a srefi groskin sani,
leki a sani di den lobi.
11A moifasi fu Efraim sa frei gwe leki wan fowru.
Den no sa man meki pikin moro,
den no o de nanga bere moro,
èn den no o man hori bere tu.
12Iya, awinsi den kweki den pikin fu den kon bigi
Mi sa meki taki den tan sondro pikin,
te leki no wan no de moro.
Bigi problema o miti den
te Mi drai Mi baka gi den.
13Ini Mi ai, Efraim ben de wan yongu palmbon
di ben prani ini wan gron.
Ma now Efraim abi fu gi den manpikin fu en
na wan kiriman.
14MASRA, gi den san Yu wani.
Meki taki den no man kisi pikin,
meki taki den borsu drei.
15Ini Gilgal Mi si a ogri fu den.
Fu dat'ede Mi no ben lobi den srefsrefi.
Mi o yagi den kmoto na ini Mi oso,
fu den ogri di den du.
Mi no o lobi den moro.
Ala den tiriman fu den e kaka futu gi Mi.
16Den naki Efraim
a rutu fu en kon drei.
A no o man gi froktu moro.
Efu den ben e kisi pikin ete
Mi bo kiri den pikin fu den
di den lobi so.
17A Gado fu mi sa poti den na wan sei,
fu di den no ben wani arki en.
Den sa waka fu a wan sei go na a trawan
na mindri den tra folku.
