Gado sori san o psa nanga Etiopia
1A kba gi a kondre pe den frei fu den pikinpikin sani e naki dorodoro,
a kondre di de na tra sei fu den liba fu Etiopia,
2di e seni boskopuman go nanga boto abra a watra,
boto di meki fu langa grasi.
Un go, un boskopuman di gaw sote,
un go na a bigiskin folku di buba e brenki,
a folku di sma e frede na alasei,
a tranga folku di no abi sari-ati.
Liba e prati a kondre fu a folku dati ini difrenti pisi.
3Un alamala di e libi na grontapu,
sma fu grontapu,
un o si te wan fraga opo tapu den bergi,
un o yere te wan tutu o bro.
4Bika MASRA taigi mi disi:
“Mi o sidon tiri e luku kmoto fu Mi tanpresi,
leki a faya son te brekten,
leki fa dow e fadon
ini a faya ten te sma e go koti nyanyan ini den pranigron.
5Bika te den bon kba gi bromki
èn den bromki e tron lepi droifi,
A o koti den taki nanga en babun-nefi
èn A o kapu den yongu taki puru,
fosi a ten doro fu puru den droifi na den bon.
6Den alamala o tan didon gi tingifowru,
nanga gi krasi meti.
Tingifowru o libi fu den ini a dreiten
èn krasi meti o libi fu den ini a kowruten.”
7A ten dati a bigiskin folku di buba e brenki,
sa tyari kado gi MASRA fu ala sani,
a folku di sma e frede na alasei,
a tranga folku di no abi sari-ati.
Liba e prati a kondre fu a folku dati ini difrenti pisi.
Den o kon na Sionbergi,
a presi pe MASRA fu ala sani, e libi.
