Yesaya 20

₁Kownu Sargon fu Asur ben seni a legre-edeman fu en fu go feti nanga Asdod. A legre-edeman ben feti nanga a foto èn a teki en abra. ₂A ten dati MASRA ben taigi Yesaya, a manpikin fu Amos, taki: “Puru a grofu krosi di yu weri nanga yu susu.” Yesaya ben du dati èn a ben waka soso nanga en ondrosei krosi èn nanga soso futu.

₃Dan MASRA taki: “Soleki fa Mi knekti Yesaya waka dri yari langa soso nanga en ondrosei krosi èn nanga sosofutu leki wan marki èn leki wan eksempre gi Egipte nanga Etiopia, ₄na so a kownu fu Asur o tyari den sma fu Egipte gwe leki srafu èn den di fu Etiopia a o tyari gwe nanga tranga. A o tyari owruwan nanga yonguwan gwe ini den ondrosei krosi, nanga sosofutu èn nanga soso bakasei. Dati o de wan bigi syen gi Egipte. ₅Dan den sma di ben poti den howpu tapu Etiopia, nanga den di ben e meki bigi gi Egipte, o skreki èn den o kon na syen. ₆A ten dati den sma di e libi na a sekanti, o taki: ‘Yere, efu na so sani waka gi den sma tapu san un ben howpu, gi den sma pe un ben go suku yepi fu kmopo ini anu fu a kownu fu Asur, dan fa unu o kmopo ini en anu dan?’ ”