Gado e pramisi fu yepi Israel
1Kondre tapu se nanga den wan na a sekanti,
un tan tiri dan un arki Mi!
Folku, un kisi krakti baka,
un kon krosbei fu taki san un abi fu taki.
Meki un go makandra na krutu.
2Suma meki a wan opo na oostsei,
a wan di e wini ala sei pe a poti en futu?
Suma e gi folku abra na en,
fu a kan naki den kownu fu den trowe?
A e wai den puru na pasi nanga en deigri,
leki fa sma e wai doti puru na pasi.
A bo fu en e meki den lon panya,
leki fa winti e wai aleisibuba.
3A e teki na den baka,
a e go na tapu wan pasi pe a no ben waka noiti bifo,
sondro fu wan sani miti en.
4Suma du dati? Suma meki dati psa?
Suma ben kari pikin nanga bakapikin sensi na a bigin?
Na Mi, MASRA, ben de a fosiwan,
èn Mi na a kriboiwan tu.
5Den kondre tapu se nanga den wan na a sekanti si dati
èn den kon frede.
Den kondre na a kba pisi fu grontapu ben e beifi,
den kon krosbei te leki den kon makandra.
6A wan e yepi a trawan, èn a e taigi en brada taki:
“Hori doro!”
7A man di sabi meki sani fu udu e gi a gowtusmeti dek'ati,
a man di e naki sani plata nanga en ambra,
e gi a smeti dek'ati.
A e luku a sani di a bron kon na wan èn a e taki: “A bun.”
Dan a e naki en fasi nanga spikri fu a no kmoto fu en presi.
8Ma Israel, yu na Mi knekti,
Yakob, di Mi teki spesrutu,
bakapikin fu Mi mati Abraham,
9yu di mi teki puru te na a kbapisi fu grontapu,
èn kari kmopo na den fara uku fu en.
Mi taigi yu taki: Yu na Mi knekti,
Mi teki yu spesrutu,
Mi no poti yu na wan sei!
10No frede, bika Mi de nanga yu.
No luku lontu fredefrede, bika Mi na yu Gado.
Mi sa gi yu krakti,
Mi sa yepi yu,
Mi sa kraka yu nanga a let'anu fu Mi di e ferlusu.
11Yere, den alamala di ati ben e bron srefsrefi nanga yu,
o kon na syen,
den o broko saka.
Den feyanti fu yu di kon feti nanga yu,
den o de leki noti, den o dede,
12Yu o suku den man di ben e feti yu,
ma yu no o feni den.
Den feyanti fu yu di ben e feti yu,
Den o de leki noti.
13Bika Mi, MASRA, a Gado fu Yu,
Mi e gi yu krakti èn Mi e taigi yu taki:
No frede, na Misrefi e yepi yu.
14No frede, Yakob,
yu di pikin leki wan woron,
pikin folku fu Israel,
Na Misrefi yepi yu. So MASRA e taki.
A Santa Wan fu Israel na yu ferlusuman.
15Yere, Mi e poti yu leki wan wrokosani
nanga san den e masi a siri puru na a buba,
wan srapu wan, wan nyun wan,
wan nanga dobru nefi,
yu o masi bergi èn panya den,
yu o meki pikin bergi tron aleisibuba.
16Yu o fringi den go na loktu,
èn a winti o tyari den go moro na hei,
bun tranga winti o panya den go na alasei.
Ma unu o prisiri fu MASRA ede,
unu o prijse Mi, a Santa Wan fu Israel.
17Den mofinawan nanga den pôtiwan,
e suku watra, ma den no e feni noti.
Den tongo kon drei srefsrefi.
Mi, MASRA, e piki a begi fu den,
Mi, a Gado fu Israel, no poti den na wan sei.
18Mi e meki liba lon tapu den bergi pe noti e gro,
watrabron ini den lagi presi mindri den bergi.
Mi o meki a dreisabana tron wan presi fu soso watra,
a kontren pe sani no e gro o tron wan presi fu soso watrabron.
19Mi o prani sedrebon ini a dreisabana,
sosrefi acacia, mirte nanga oleifbon.
Mi o prani sipresbon nanga difrenti tra sortu bon
ini a kontren pe sani no e gro.
20Dan so den o si, den o sabi,
den o poti prakseri na en tapu èn den o ferstan,
taki na a anu fu MASRA du dati,
èn dati na a Santa Wan fu Israel meki en.
Masra sori taki na En teki Cyrus
21MASRA e taki:
Un tyari a tori fu unu kon na fesi,
A Kownu fu Yakob e taki:
Un kon nanga sani di e sori taki un abi leti.
22Meki den tyari den sani kon na fesi,
meki den taigi unu san o psa.
Meki den taki tu fu sani di psa bifo,
sani di o poti un na prakseri broki,
noso, meki un yere fu sani di musu psa ete,
dan un kan sabi san de fu kon.
23Taki fu sani di o psa now,
fu wi kan sabi taki unu na gado.
Du wan sani,
a no abi trobi efu na wan bun sani noso wan ogri sani,
wan sani di kan meki wi tnapu nanga opo mofo,
wan sani di kan meki wi frede.
24Un si, un na soso boto,
èn den wroko fu unu no de not'noti.
Iniwan sma di e waka na un baka na wan groskin sani.
25Na Mi meki wan sma opo na noordsei, èn a kon.
Fu a sei pe a son e opo, a e kari Mi nen.
A e trapu tapu tiriman fu foto leki na tapu doti a e trapu,
leki fa wan man di e meki prapi e masi kleidoti.
26Sortu wan fu unu taki en na a bigin,
fu wi ben kan sabi en?
Sortu wan fu unu ben taki en na fesi,
fu wi kan taki tak' a ben abi leti?
Kwet' kweti, no wan fu unu ben taki en,
no wan fu unu ben meki trawan yere en,
no wan sma ben yere un ben taki fu en.
27Na Mi ben de a fosiwan di taigi Sion taki:
“Luku, luku den drape.”
Na Mi ben seni wan boskopuman,
Mi seni en nanga bun nyunsu go na Yerusalem.
28Bika te Mi ben luku lontu,
no wan ben de fu si.
No wan de na den mindri di ben man gi rai,
no wan di ben kan piki Mi te Mi ben sa aksi en wan sani.
29Yere, no wan fu den de wan sani.
Den wroko fu den na soso sani.
Den popki fu den na soso winti di no wan taki noti.
