A singi fu wan droifidyari
1Now mi o singi wan singi gi a wan di mi lobi,
wan singi fu a droifidyari fu en.
A wan di mi lobi ben abi wan droifidyari,
wan droifidyari tapu wan pikin bergi nanga bun doti.
2A drai a doti fu a dyari,
a puru ala ston,
dan a prani bun droifi na en tapu.
A bow wan hei wakti-oso,
èn a kapu wan baki fu masi den droifi.
A ben ferwakti furu fu a droifidyari,
ma a droifidyari gi soso busi droifi.
3We dan, sma fu Yerusalem nanga man fu Yuda,
un krutu a tori fu mi nanga mi droifidyari.
4San mi ben mus du ete na a droifidyari fu mi?
Mi ben ferwakti so furu fu en,
ma fu sanede a gi soso busi droifi?
5We dan, Mi o ferteri unu
san Mi o du nanga Mi droifidyari:
Mi o puru a makamaka skotu di mi prani lontu a dyari,
fu meti kon nyan san ben prani,
Mi o broko a skotu,
fu meti kon traputrapu en.
6Mi o libi en fu a kon busbusi,
den no o koti den taki fu den droifibon moro,
a grasi no o koti moro tu.
Makamaka nanga krasiwiwiri sa gro na en tapu.
Mi o komanderi den wolku tu
fu den no meki alen fadon na en tapu.
7We, na Israel na a droifidyari fu MASRA fu ala sani,
den man fu Yuda na den droifibon di ben mus gi En prisiri.
A ben ferwakti tak' den ben o du sani nanga leti,
ma yere, a feni soso kruktudu.
A ben ferwakti tak' den ben o du bun,
ma yere, sma e bari fu kisi den leti.
Ogri nanga strafu
8A kba gi den sma di e bai a wan oso baka a trawan,
di e puru a wan pranigron baka a trawan na sma anu,
te leki noti de fu den teki moro,
èn den wawan e libi ini a kondre.
9Mi yere MASRA fu ala sani sweri taki:
“Fu tru, furu oso sa broko fadon,
moi wan nanga bigi wan sa tan leigi.
10Bun langa droifidyari o gi pikinso win nomo,
èn bun furu siri di prani o gi wan saka karu nomo.”
11A kba gi den sma di e opo frukufruku mamanten kba e go dringi,
di e meki a win drungu den te go miti lati neti.
12Tapu den fesa fu den poku e meki
nanga lier, harp, tamboerijn nanga froiti,
èn den e dringi win.
Ma den no abi ai gi den sani di MASRA e du,
den no e si den sani di A meki.
13Na dat' meki feyanti e tyari a pipel fu Mi nanga tranga gwe,
sondro fu den sabi fu sanede dati e psa nanga den.
Angri o kiri den heihei sma,
èn watra o kiri ala den tra sma trutru.
14Dat' meki dedekondre opo en gorogoro,
a bradi en mofo opo so fara leki a man,
fu swari den bigiman fu kondre nanga ala den tra sma,
sosrefi den wan di e meki prisiri nanga a babari fu den.
15Dan so libisma sa broko,
libisma sa abi fu saka ensrefi,
den sma di abi heimemre abi fu saka den ai.
16Ma MASRA fu ala sani e kisi grani
fu di A e du sani tapu wan leti fasi.
A Santa Gado e sori taki a santa
fu di A e krutu sani nanga leti.
17Dan skapu o nyan grasi leki den de ini a wei fu den,
pikin skapu o nyan grasi na mindri den oso fu den guduwan
di broko fadon.
18A kba gi den sma di e bedrigi trawan.
A gersi leki nanga titei den e hari kruktudu kon na den tapu.
A gersi leki nanga banti den e hari a sondu kon na den tapu,
19den di e taki: “Meki A du gaw.
Meki A klari a wroko fu En es'esi,
fu un kan si en.
Meki a Santa Wan fu Israel kon du now san A poti fu du,
fu un kan sabi sa na en.”
20A kba gi den di e kari ogri bun èn bun ogri,
den di e teki neti leki dei èn dei leki neti,
den di e si bita sani leki switi sani,
èn switi sani leki bita sani.
21A kba gi den di koni na ini den eigi ai,
den di e taki fu densrefi tak' den srapu.
22A kba gi den di e si densrefi bigi te den e dringi win,
di e denki taki den dyadya te den e kanti tranga sopi,
23den man di, fu wan kado ede,
e meki taki sma di fiti fu kisi strafu no koti strafu,
èn di e meki taki sma di libi bun no e kisi den leti.
24Dat' meki, leki fa faya e bron pikinpikin grasi,
èn leki fa drei grasi di teki faya e saka,
na so den rutu fu den sa pori,
èn den bromki fu den wai gwe leki doti.
Bika den poti a wèt fu MASRA fu ala sani na wan sei,
èn den si den wortu fu a Santa Wan fu Israel leki noti.
25Na dat' meki MASRA lusu a hebi atibron fu En tapu En pipel,
A opo En anu èn A e naki den.
Bergi e beifi,
dedeskin didon tapu strati leki doti.
Ma ala den sani dati no kowru a atibron fu En,
A e tan opo en anu fu naki den.
26A e opo wan fraga leki wan marki gi wan folku di e libi farawe,
A e froiti en kon fu a kba pisi fu grontapu,
èn luku, a e kon es'esi, bun esi a e lon kon.
27No wan fu den weri,
no wan e misi futu,
no wan fu den e dyonko,
no wan fu den e sribi.
Den banti no e kmopo na den bere,
èn den banti fu den susu no e koti.
28den peiri fu den srapu èn den bo hari span,
den ondro futu fu den asi fu den tranga leki ston,
den wiel fu den wagi e drai leki wan draiwinti.
29A babari fu den gersi a babari fu wan uma lew,
a gersi a babari fu yongu lew te den grabu wan sani.
Den e srepi a sani tyari gwe,
no wan sma kan ferlusu en.
30A ten dati a babari sa kon na den tapu
leki a babari fu a se.
Wan dipi dungru sa de alasei na grontapu.
Dungru wolku sa tapu a faya fu a son.
