Yuda e sondu go nanga langa
1Un yere, a anu fu MASRA no syatu fu ferlusu unu,
èn den yesi fu En no tapu tak' A no man yere unu.
2Ma na den kruktudu fu unu e tyari prati
mindri unu nanga a Gado fu unu,
èn na den sondu fu unu e meki A drai En baka
fu A no yere unu.
3Bika brudu flaka den anu fu unu,
èn kruktudu flaka den finga fu unu.
Un e lei tu nanga un mofo,
èn a tongo fu unu e tak' ogri fu trawan.
4No wan tori nanga san sma e go na krutubakra
na fu feni leti,
èn no wan tori e krutu na tapu wan leti fasi.
Den sani di den e tyari kon na fesi na soso sani,
nanga lei.
Den furu nanga kruktudu
èn san den e tyari kon na doro na ogri.
5Den ogri di den e sidon prakseri fu du
de leki te eksi fu takru sneki e broko.
Den e fanga sma nanga den sani fu den
leki fa anansi e fanga sani ini a anansititei.
A sma di e nyan a eksi fu den e dede,
èn efu a eksi broko,
wan takru sneki e kmoto na ini.
6Leki fa yu no man weri anansititei fu tapu yu skin,
na so den no man kibri a ogri tu di den e du.
Leki fa a anansititei no warti leki krosi,
na so den sani di den e prakseri fu du na sososani.
Ala san den e du na ogri,
èn den e du sani nanga tranga.
7Den gaw fu go du ogri,
es'esi den e kiri sma di no du noti.
Soso ogri de ini den ede,
alape den go na bigi ogri nanga pori.
8Den no sabi san na freide noso libi wan fasi di fiti.
Den no e waka a leti pasi fu kisi san den wani.
No wan sma di e waka a pasi dati sabi san na freide.
9Na fu dat'ede sani no e psa gi wi na tapu wan leti fasi
èn na fu dat'ede un no man kisi un leti.
Un e howpu fu si a leti,
ma a e kon moro dungru.
Un e howpu fu a krin fu dei,
ma un e tan waka ini dungru.
10Leki brenisma un e firifiri a skotu te un e waka,
un e firifiri leki sma di no abi ai srefsrefi.
Bigibigi dei un e misi futu leki na neti e fadon.
Leki dedesma un de, aladi wi abi ala un krakti ete.
11Un alamala e bari leki wan beer
te un e sari un e meki leki doifi.
Un wakti fu wi kisi wi leti, ma a no e kon,
tapu ferlusu, ma a e tan fara fu wi.
12Bika den fowtu fu wi furu na Yu fesi,
den sondu fu wi de leki ketoigi di e krutu wi.
Un sabi taki un fowtu,
un sabi den kruktudu di un du:
13Un kaka un futu gi Yu,
un taki tu tak' un no sabi MASRA,
un drai un baka gi a Gado fu unu.
Den sani di un e taki na soso fu pina trawan,
èn bedrigi trawan.
Un furu nanga soso lei
èn san wi e puru kon na doro na sani di no tru.
14Na dat' meki sani no e du tapu wan leti fasi,
du sani nanga leti de fara fu wi.
Bika sma no e tak' a tru moro tapu den pren,
presi no de gi sma di e tak' sani kmopo fu wan krin ati.
15Tru no de fu feni na un mindri moro,
èn den e pina den sma di no wan du ogri.
Masra teki a besroiti fu du wan sani
Ma MASRA si ala den sani dati,
èn A no ben bun ini En ai
taki sani no ben e du tapu wan leti fasi.
16A si tak' no wan sma ben de,
èn A ferwondru trutru tak' no wan sma ben e du wan sani.
Dat' meki nanga En eigi krakti A tyari yepi kon,
èn a wani fu En fu sani psa tapu wan leti fasi meki A du dati.
17Du sani tapu wan leti fasi ben de leki wan isri bosroko di A weri.
A ferlusu di A e tyari ben de leki wan fet'ati tapu En ede.
A weri a pai di A o pai baka leki en srudati krosi,
èn a domru Ensrefi ini hebi atibron leki wan langa dyakti.
18A o pai ini wan sma fu a sani di a du:
den feyanti fu En a o pai nanga atibron,
èn den di e feti En A o pai baka.
Den kondre tapu se nanga den wan na a sekanti A o strafu tu.
19Dan den sma na westsei o kisi bigi lespeki gi a nen fu MASRA,
èn den sma fu oostsei o abi bigi lespeki gi a glori fu En.
Bika A o kon leki wan liba di e lon tranga,
fu di a bro fu MASRA e meki a watra rigeri.
20Ma A o kon leki a Ferlusuman gi Sion,
nanga gi den sma fu Yakob di wani tapu nanga ogridu.
Na so MASRA taki.
21Fu Mi sei, disi na a ferbontu di Mi e meki nanga den,
MASRA taki.
A Yeye fu Mi di de na yu tapu,
nanga den wortu fu Mi di Mi poti ini yu mofo,
no sa kmopo ini a mofo fu yu.
Den no sa kmopo ini a mofo fu den pikin
nanga ini a mofo fu den granpikin fu yu tu,
bigin fu now èn fu têgo.
So MASRA taki.
