MASRA e piki tapu a begi
1Mi ben tnapu klari fu gi rai na den di no ben e aksi fu Mi.
Mi ben de fu feni gi den di no ben luku fu Mi.
Mi ben taigi wan folku di no ben e kari Mi nen, taki:
Dyaso Mi de! Dyaso Mi de!
2Heri dei Mi ben e langa Mi anu go na wan folku,
wan folku di no ben wani arki.
Den no ben waka tapu a bun pasi,
èn den ben e du san ben bun ini den eigi ai.
3Den na wan pipel di e tanteri Mi espresi dorodoro.
Den e tyari ofrandi gi kruktu gado ini bromkidyari
den e bron wierook tapu ston.
4Den e go sidon tapu grebi,
den e brokodei na ini kibripresi,
den e nyan agumeti
èn den abi supu ini den komki fu meti di no krin ini Gado ai.
5Den e taigi tra sma tu taki:
“Tan drape. Un no kon krosbei,
bika mi santa tumsi gi unu.”
Den de leki smoko ini Mi noso,
smoko fu wan faya di e bron heri dei.
6Luku, a skrifi leti na Mi fesi,
Mi no sa sidon tiri,
ma Mi o pai den fu den sani di den du.
Iya, Mi o pai den fu ala sani baka.
7Un o pai fu den kruktudu fu unu,
ma owktu fu di fu den afo fu unu,
Na so MASRA taki.
Bika densrefi ben bron wierook tapu den bergi,
densrefi afrontu Mi tapu den hei presi.
Mi marki den sani di den du
èn Mi o meki den pai fu ala sani baka.
8Na so MASRA taki:
solanga yu man masi den droifi fu puru win ete,
den sma e taki tak' yu no mus trowe den,
bika bun de ete ini den.
Dat' meki fu den knekti fu Mi ede
Mi no sa pori den alamala.
9Mi sa gi Yakob pikin nanga bakapikin,
Wan sma fu Yuda sa kisi a bergikondre fu Mi.
Den wan di Mi teki fu Misrefi sa kisi a kondre,
èn den knekti fu Mi sa libi drape.
10Gi a pipel di e suku Mi, Saron sa tron wan wei gi skapu,
èn a Akordal wan presi pe meti sa go didon fu rostu.
11Ma unu di gwe libi MASRA,
unu di no e prakseri a santa bergi fu Mi moro,
unu di e seti nyanyantafra fu anbegi Gad,
èn unu di e furu kroiki nanga difrenti win fu anbegi Meni.
12Mi o meki un dede na ini bigi feti,
un alamala o kindi fu den srakti unu.
Bika di Mi ben kari unu, un no piki,
di Mi ben taki, un no arki.
Ma un du sani san no bun ini Mi ai,
èn un teki a besroiti fu du sani di no e gi Mi prisiri.
13Dat' meki na so Masra MASRA taki:
Yere, den sma di e dini Mi o abi nyanyan,
ma unu o abi angri.
Yere, den sma di e dini Mi o abi dringi,
ma watra o kiri unu.
Yere, den sma di e dini Mi o prisiri,
ma unu o kisi syen.
14Yere, den sma di e dini Mi o singi fu prisiri,
ma unu o bari bita krei,
unu o krei nanga wan broko ati.
15Den wan di Mi teki gi Misrefi
o teki a nen di un libi na baka leki wan fluku,
èn Masra MASRA o kiri unu.
Ma A o gi den sma di e dini En wan tra nen.
16A sma di e blesi ensrefi ini a kondre disi,
e blesi ensrefi ini a nen fu a Gado di de fu fertrow,
èn a sma di o meki wan sweri ini a kondre disi,
o sweri ini a nen fu a Gado di de fu fertrow.
Bika Mi no o memre den bigi ogri di psa fos'fosi moro,
Mi tapu Mi ai gi den.
17Bika yere, Mi e meki wan nyun heimel,
nanga wan nyun grontapu.
Sma no o memre den fosiwan moro,
den no o kon ini a prakseri fu no wan sma.
18Ma un o prisiri, un o breiti fu têgo nanga san Mi e meki.
Bika yere, Mi e meki Yerusalem fu a de wan presi fu prisiri,
èn a pipel fu en fu de wan pipel di breiti.
19Dan Mi sa prisiri nanga Yerusalem,
èn Mi sa breiti nanga Mi pipel.
Èn krei noso dyeme no o de fu yere moro na ini.
20Nyunyun pikin no sa drape moro di e libi wantu dei nomo,
noso owru sma di e dede fosi den yuru kisi.
Bika wan pikin sa dede te a abi wan hondro yari fosi.
A sma di dede fosi a abi wan hondro yari,
na wan sma di abi wan fluku na en tapu.
21Den o meki oso èn libi ini den tu,
den o prani droifidyari èn nyan fu den froktu tu.
22A no o de so moro taki den e meki oso fu tra sma go libi na ini,
noso taki den e prani fu tra sma nyan den froktu.
Bika a libimarki fu a pipel fu Mi,
o de leki a libimarki fu wan bon.
Den wan di Mi teki gi Misrefi o prisiri fu a wroko fu den anu.
23Den no o wroko fu soso,
èn den no o meki pikin fu bigi ogri miti den.
Bika den o de sma di MASRA blesi,
èn den pikin nanga bakapikin fu den o de blesi sma tu.
24Èn a o de so tak' Mi o piki den, fosi den kari Mi,
èn Mi o du san den e aksi Mi, te den e taki ete.
25Wan krasi meti sa nyan makandra nanga wan pikin skapu,
wan lew sa nyan grasi leki wan kaw,
èn wan sneki sa abi santi leki en nyanyan.
No wan fu den no o du ogri
noso tyari pori tapu a heri santa bergi fu Mi,
na so MASRA taki.
