Den folku di ben tan libi ini a kondre
1MASRA ben meki wantu folku tan na baka fu tesi den Israelitisma di no ben sabi no wan fu den feti di den Israelitisma ben feti ini Kanaan. 2A du dati soso fu den Israelitisma, di no ben sabi noti fu feti, ben kan leri feti. 3Disi na den folku di ben tan libi ini a kondre: den feifi kownu fu den Filistijnsma, ala den Kananitisma, Sidonisisma, nanga den Hiwitisma di ben e libi tapu a Libanonbergi, bigin fu a bergi Baal-Hermon go te na a pasi di e go na Hamat. 4Den folku disi ben drape fu tesi den Israelitisma, fu MASRA ben kan sabi efu den ben o hori densrefi na den gebod, di A ben meki Moses gi den afo fu den. 5Ma den Israelitisma ben e libi mindri den Kananitisma, den Hetitisma, den Amoritisma, den Perisitisma, den Hiwitisma nanga den Yebusitisma, 6èn den ben e teki umapikin fu den trow èn den ben e gi den eigi umapikin fu trow nanga den manpikin fu den folku dati. Den ben e dini den gado fu den tu.
Otniyel
7Den Israelitisma ben e du sani di no bun ini MASRA ai. Den ben fergiti MASRA, a Gado fu den, èn den ben e dini den Baal nanga den Asyera. 8Ne MASRA ati bron tapu Israel. A gi den abra ini a makti fu kownu Kusan-Risataim fu Mesopotamia. Aiti yari langa den Israelitisma ben abi fu dini Kusan-Risataim. 9Ne den Israelitisma bari suku MASRA, dan MASRA meki wan ferlusuman opo fu ferlusu den. Dati ben de Otniyel, a manpikin fu Kenas, a pikin brada fu Kaleb. 10A Yeye fu Gado ben kon na en tapu, dan a teki a wroko fu krutubakra fu Israel na en tapu. A hari go feti nanga kownu Kusan-Risataim fu Aram èn MASRA gi a kownu dati abra na en. A teki wan bigi wini na en tapu. 11Baka dati a ben tiri fotenti yari langa ini a kondre. Dan Otniyel, a manpikin fu Kenas, dede.
Ehud
12Dan den Israelitisma bigin du sani baka di no ben bun ini MASRA ai. Dat' meki MASRA gi kownu Eglon fu Moab makti fu go feti nanga Israel, bika den ben e du sani di no bun ini MASRA ai. 13Eglon meki wan ferbontu nanga den Amonitisma èn nanga den Amalekitisma. Dan makandra den hari go feti nanga Israel. Den wini den èn den teki a Palmfoto abra. 14Tin-na-aiti yari langa den Israelitisma ben abi fu dini kownu Eglon fu Moab. 15Ne den Israelitisma bari suku MASRA, dan MASRA meki wan ferlusuman opo fu ferlusu den. Dati ben de Ehud, a manpikin fu Gera. A ben de fu a lo fu Benyamin, èn a ben e wroko nanga en krutu anu. Na en den Israelitisma ben gwenti fu seni go na kownu Eglon fu Moab, nanga a moni di den ben mus pai en. 16Dan Ehud seni meki wan syatu deigri di ben mus srapu na ala tu sei, dan a fasi en ondro en krosi, na en let'sei bowtu. 17Na so Ehud tyari a moni gi kownu Eglon fu Moab, di ben de wan bun fatu man. 18Di Ehud gi en a moni, a drai gwe nanga den man di ben syow a moni. 19Ma di den doro na den stonpopki na Gilgal, a meki den man go moro fara dan ensrefi drai go baka. Di a doro a taigi kownu taki: “Mi kownu, mi abi wan boskopu gi yu, di yu wawan mus yere.” Ne kownu taki: “Un tan tiri.” Ala den sma di ben de na kownu go na dorosei. 20Dan Ehud go na inisei na kownu, di ben de en wawan ini wan moi kowru kamra na loktusei. Drape Ehud taigi en taki: “Mi abi wan boskopu fu Gado gi yu.” Di a kownu e opo fu en sturu, 21Ehud hari a deigri nanga en kruktu anu puru na en let'sei bowtu dan a dyuku en go ini a bere fu kownu. 22A sutu a deigri go so tranga, taki a srapu pisi nanga a pisi pe yu e hori psa go ini a bere. A fatu tapu a srapu pisi, bika Ehud no hari a deigri puru. Dan Ehud waka na a bakadoro gwe. 23Ehud ben sroto a doro fu a kamra na loktu, dan a waka na a gadri gwe. 24A no ben de wan bun fasi na dorosei, di den wrokoman fu kownu go na a kamra. Ma a doro fu a kamra ben sroto. Ne den taki: “A mus de taki kownu wan de en wawan fu du san a wani du.” 25So den wakti te den ferferi, ma kownu no ben e opo a doro fu a kamra. Ne den go teki wan sroto fu opo a doro fu dorosei. Dan den si den masra didon dededede na gron.
26Ma a ten di den ben e wakti, Ehud ben feni a okasi fu lowe gwe. A ben psa den stonpopki èn a ben lowe go na Seira. 27Di a doro drape, ini a bergikontren fu Efraim, a bro tapu wan tutu. Dan en nanga den Israelitisma saka fu den bergi pe den ben de. Ensrefi ben de na fesi. 28A taigi den taki: “Un kon nanga mi! Bika MASRA gi den Moabitisma, den feyanti fu wi, abra na wi.” Dan den saka go na Ehud baka. Den poti sma na ala den presi pe yu ben man koti a Yordanliba abra go na Moab, fu no wan sma no abra moro. 29Den Israelitisma kiri sowan tin dusun man fu Moab, tranga èn bun fetiman, ma no wan fu den ben man lowe. 30A dei dati den Israelitisma broko den sma fu Moab saka. Baka dati a ben tiri aititenti yari langa ini a kondre.
Samgar
31Baka Ehud yu ben kisi Samgar, a manpikin fu Anat. En kiri siksi hondro Filistijnman nanga a srapu tiki nanga san a ben e dyuku den kaw fu waka. Na so en ferlusu Israel tu.
