Krutubakra 9

₁Abimelek, a manpikin fu Yerubaal, ben go na Sikem pe den famiri fu en m'ma ben libi. A taigi den omu nanga den manpikin fu den taki: ₂“Un go taki nanga ala den sma fu Sikem. Un aksi den san moro bun gi den: efu ala den seibitenti manpikin fu Yerubaal tiri den, noso efu wan man nomo tiri den. Meki den prakseri tu taki a man dati na den eigi famiri.” ₃Den omu fu en go taigi den sma fu Sikem san Abimelek taki. Dan den teki a sei fu en, bika den taki: “En na un famiri.” ₄Dan den gi en seibitenti solfru moni di den teki fu a tempel fu Baal-Berit. Nanga a moni dati Abimelek yuru wantu man di no ben e denki nanga man di ben abi dondon dek'ati, fu waka na en baka. ₅Nanga den man dati a hari go na a oso fu en p'pa na Ofra. Drape a kiri ala den seibitenti brada fu en tapu a srefi ston. Ma Yotam, a moro yongu boi fu Yerubaal, den no kisi, bika a ben go kibri. ₆Baka dati ala den sma fu Sikem nanga ala den sma fu Bet-Milo kon makandra na a bigi bon di ben de na a santa ston na Sikem. Dan den poti Abimelek leki den kownu.

₇Di Yotam kisi a sani dati fu yere, a go tnapu tapu a Gerisimbergi. Dan a bari nanga wan tranga sten taki: “Sma fu Sikem, un arki mi, dan Gado sa arki un tu! ₈Wan leisi den bon go na waka fu salfu wan kownu gi den. Den taigi a oleifbon taki: ‘Tron un kownu.’ ₉Ma a oleifbon piki den taki: ‘Dan fa fu a oli di mi e meki dan, a oli di e meki Gado nanga libisma kisi grani? Mi no o tapu fu meki en, soso fu den taki fu mi wai pikinso moro hei leki di fu den tra bon.’ ₁₀Dan den aksi a figabon taki: ‘Kon, tron un kownu.’ ₁₁Ma a figabon piki den taki: ‘Dan fa fu den sukru froktu di mi e meki. Mi no o man tapu fu meki den, soso fu den taki fu mi wai pikinso moro hei leki di fu den tra bon.’ ₁₂Ne den bon go na a droifibon go taigi en taki: ‘Kon, tron un kownu.’ ₁₃Ma a droifibon piki den taki: ‘Dan fa fu a win di mi e meki, di e gi Gado nanga libisma prisiri? Mi no o man tapu fu meki en, soso fu den taki fu mi wai pikinso moro hei leki di fu den tra bon.’ ₁₄Te fu kba ala den bon taigi a makabon taki: ‘Kon, yu tron wi kownu.’ ₁₅A makabon piki den taki: ‘Efu un wani salfu mi trutru leki un kownu, un kon kibri ini a kowrupe fu mi. Ma efu un no wani dan faya sa kmopo fu mi èn bron ala den sedrebon fu a Libanon.’ ₁₆We dan, sma fu Sikem, taigi mi efu na nanga wan krin ati un poti Abimelek leki kownu, efu na wan bun sani un du nanga den famiri fu Yerubaal èn efu un feni taki na a pai disi a mus kisi fu san a du. ₁₇Bika na mi p'pa ben feti a feti gi unu èn ferlusu unu fu den Midyanitisma, sondro fu teri en eigi libi, ₁₈dan un opo fu feti a famiri fu mi p'pa nanga den manpikin fu en tide. Un kiri seibitenti man tapu a srefi ston dan un poti Abimelek, a manpikin fu en umasrafu, leki kownu fu den sma fu Sikem fu di en na famiri fu unu. ₁₉We, efu na nanga wan krin ati un du den sani disi tide nanga Yerubaal nanga en famiri dan mi e winsi un prisiri nanga Abimelek èn mi e winsi Abimelek prisiri nanga unu. ₂₀Ma efu un no du bun, wan faya sa kmoto fu Abimelek fu bron den sma fu Sikem nanga Bet-Milo, èn wan faya sa kmoto ini den sma fu Sikem nanga Bet-Milo fu bron Abimelek.” ₂₁Dan Yotam lowe. A lowe go na Beer dan a tan drape fu di a ben e frede en brada Abimelek.

₂₂Di Abimelek ben de dri yari na makti ini Israel, ₂₃Gado seni wan takruyeye fu tyari dyugudyugu mindri Abimelek nanga den sma fu Sikem. Dan den no ben wani arki Abimelek moro. ₂₄Tapu a fasi disi Gado ben o pai den baka fu a ogri di den du nanga den seibitenti manpikin fu Yerubaal, fu a brudu di den ben meki lon. A ben meki ala sani drai kon baka tapu Abimelek nanga den sma fu Sikem di ben yepi en fu kiri den brada fu en. ₂₅Dan fu pori Abimelek nen, den sma fu Sikem ben meki wantu man e luru fu tapusei fu den bergi, fu fufuru den sani fu ibri sma di ben e psa. Abimelek ben kisi a sani dati fu yere.

₂₆A srefi ten dati Gaal, a manpikin fu Ebed, hari go na Sikem nanga den famiri fu en. Dan den sma fu Sikem poti den fertrow na en tapu. ₂₇Den go ini den droifidyari, den piki droifi èn den masi den tron win. Baka dati den go hori wan fesa ini a tempel fu a gado fu den. Den ben e nyan, den ben e dringi èn den ben e bigin broko Abimelek saka. ₂₈Ne Gaal, a manpikin fu Ebed, taki: “Suma na Abimelek? Fu sanede wi fu Sikem mus dini a manpikin fu Yerubaal nanga Sebul di a poti dyaso leki komsarsi? A moro betre un dini den bakapikin fu Hemor, a afo fu den sma fu Sikem, prefu un dini Abimelek. ₂₉Efu na mi ben abi fu taki dyaso, mi ben o yagi Abimelek.” Mi ben o taigi en taki: “Yu kan kon nanga yu legre awinsi fa a bigi.” ₃₀Di Sebul, a edeman fu a foto, yere den sani di Gaal, a manpikin fu Ebed, taki, en ati bron srefsrefi. ₃₁Dan a seni wantu boskopuman go na Abimelek, di ben de ini Aruma, nanga a boskopu disi: “Yere, Gaal, a manpikin fu Ebed, nanga den famiri fu en kon ini Sikem èn den e taigi den sma fu no waka moro na yu baka. ₃₂Dat' meki tide neti ete yu mus hari kon dyaso nanga a legre fu yu, dan yu e seti luru gi en ini a wei. ₃₃Dan mamanten fruku, te a son e opo, yu mus broko kon ini a foto. Efu Gaal nanga den man fu en hari kon miti yu, yu abi a okasi fu du nanga en san yu wani du.” ₃₄A srefi neti dati Abimelek hari kon nanga a heri legre fu en. Den prati densrefi ini fo grupu dan den go seti luru gi Sikem. ₃₅Di Gaal go tnapu na a bigi doro fu a foto a tra mamanten, Abimelek nanga en legre broko kmoto ini den kibripresi fu den. ₃₆Gaal si den, dan a taigi Sebul taki: “Luku, sma e saka fu den bergi.” Ma Sebul piki en taki: “Na den schaduw fu den bergi yu e si leki libisma.” ₃₇Ma Gaal hori doro, a taki: “Luku moro bun, na sma e kmoto fu Gerisimbergi e kon èn wan tra grupu e kmoto na a sei fu a bigi bon fu den Lukuman.” ₃₈Ne Sebul piki en taki: “Pe a bigi mofo fu yu de now nanga san yu ben taki: ‘Suma na Abimelek, taki wi mus dini en?’ Den sma di e kon na den sma di yu ben si leki noti. Hari go feti nanga den now.” ₃₉Ne Gaal hari gwe, na a ede fu den sma fu Sikem, fu feti nanga Abimelek. ₄₀Ma den no ben man hori feti nanga Abimelek, èn Gaal ben abi fu lon. Furu dede fadon, te kon miti a bigi doro fu a foto srefi. ₄₁Abimelek tan libi fu en na Aruma, ma Sebul yagi Gaal nanga den famiri fu en kmoto ini Sikem.

₄₂A tra dei den sma fu Sikem go baka ini den gron go wroko. Di Abimelek kisi a sani dati fu yere, ₄₃a teki a legre fu en, a prati en na ini dri grupu dan a go seti luru ini a wei. Di a si taki den sma e kmoto ini a foto, a broko go na den tapu. ₄₄Abimelek nanga den man di ben de nanga en hari go es'esi go tnapu na a bigi doro fu a foto. Den tu tra grupu fu en ben broko go tapu ala den sma di ben de ini den gron èn den kiri den. ₄₅A heri dei dati Abimelek feti nanga den sma fu a foto. A teki a foto abra èn a kiri den sma. Baka dati a broko a foto te na gron, dan a trowe sowtu na en tapu. ₄₆Di den sma fu Migdal-Sikem yere a tori dati, den alamala go kibri ini den kamra na ondrosei fu a tempel fu El-Berit. ₄₇Dan sma go taigi Abimelek taki ala den sma fu Migdal-Sikem ben de makandra drape. ₄₈Ne Abimelek nanga ala den srudati fu en kren go tapu a Salmonbergi. Drape a teki wan beiri dan a kapu wantu taki fu den bon puru. Baka dati a poti den taki tapu en skowru dan a taigi den srudati fu den du a srefi sani dati gawgaw tu. ₄₉Ne ibri wan fu den srudati kapu taki tu, dan den saka a bergi baka Abimelek. Den go poti den taki na den kamra na ondrosei fu a tempel dan den sutu faya gi den. Na so ala den sma fu Migdal-Sikem kon dede tu, sowan dusun man nanga uma.

₅₀Baka wan pisten Abimelek hari go na Tebes. A lontu a foto dati fu alasei dan a teki en abra. ₅₁Ma wan toren di ben tranga fu teki abra, ben tnapu leti mindri fu a foto. Ala den sma fu a foto, man nanga uma ben lon go drape. Den sroto a doro dan den kren go tapu a plata daki fu a toren. ₅₂Di Abimelek doro na a toren, a bigin feti nanga den sma drape. A ben doro te na a doro fu en kba fu sutu faya gi en. ₅₃Ne wan uma fringi wan ston nanga san den ben mara tapu a ede fu Abimelek, broko a ede fu en. ₅₄Es'esi a kari a knekti fu en di ben e tyari den fetisani fu en, dan a taigi en taki: “Hari yu deigri èn kiri mi, fu sma no taki fu mi dati na wan umasma kiri mi.” Ne a knekti dyuku en kiri. ₅₅Di den srudati fu Israel si dati Abimelek dede, iniwan fu den drai go na en oso baka.

₅₆Na so Gado pai Abimelek fu a ogri di a du en p'pa, fu kiri seibitenti brada fu en. ₅₇Gado meki ala a ogri di den sma fu Sikem du, drai kon tapu den eigi ede baka tu. Na so den sani di Yotam, a manpikin fu Yerubaal, ben taki, di a fluku den, kon tru.