Yeremia mus memre a pipel na a ferbontu
1MASRA taki nanga Yeremia, A taigi Yeremia taki: 2“Arki san Mi o taigi yu fu a ferbontu di Mi meki nanga unu, dan yu e taki nanga den sma fu Yerusalem nanga den di fu Yuda. 3Taigi den taki: ‘Na disi MASRA, a Gado fu Israel, e taki: Wan fluku sa de tapu ini wan sma di no e du san a ferbontu e taki, 4a ferbontu di Mi ben gi den afo fu unu a ten di Mi puru den ini Egipte, a kondre di ben de leki wan bun faya onfu gi den. Mi ben taigi den taki: Un mus arki Mi èn un mus du ala san Mi e komanderi unu. Dan unu o de a pipel fu Mi èn Mi o de a Gado fu unu, 5èn so Mi o man du san Mi ben pramisi den afo fu unu. Mi ben meki wan sweri srefi tapu a pramisi dati. Mi ben pramisi den dati Mi bo gi den wan kondre pe a gron bun èn pe ala sani e gro èn ini a kondre dati un e libi te tide.’ ” Ne mi piki taki: “Na so a de MASRA.” 6Dan MASRA taigi mi taki: “Preiki disi ini den foto fu Yuda nanga tapu den strati fu Yerusalem taki: ‘Un arki san a ferbontu e taki èn un hori un na en. 7Bika sensi di Mi puru den afo fu unu ini Egiptekondre Mi warskow den dorodoro fu den arki Mi. Te tide Mi e du dati. 8Ma den no arki èn den no du san Mi taki. Ma den du san a ogri ati fu den ben gi den fu den du. Ne Mi meki ala den ogri miti den di tnapu ini a ferbontu, den ogri di bo miti den te den no ben o hori na a ferbontu. Bika Mi ben komanderi den fu den hori den na a ferbontu, ma den no du en.’ ”
9MASRA taigi mi moro fara taki: “Mi kon si dati den sma fu Yerusalem nanga di fu Yuda e meki mofo fu du Mi wan sani. 10Den go du densrefi kruktudu di den afo fu den du, den afo fu den di no ben wani du san Mi ben taki. Den go waka baka tra gado fu anbegi den. Den sma fu Israel nanga den sma fu Yuda broko a ferbontu di Mi meki nanga den. 11Dat' meki, na disi MASRA e taki: Luku, Mi e meki bigi ogri miti den, èn den no o man kmopo gi en. Dan den o bari kari Mi fu yepi den, ma Mi no o arki den. 12Meki den sma fu Yuda nanga den sma fu Yerusalem go bari kari den gado gi san den ben bron wierook. Ma yepi den no o feni na den te a bigi ogri o miti den. 13Yuda, den gado fu yu furu leki den foto fu yu. Èn den altari tapu san yu e bron wierook gi Baal, a gado fu ala syen sani, furu leki den strati fu Yerusalem.
14Yeremia, arki Mi. No begi moro gi a pipel disi. No krei e begi moro gi den. Bika te den o bari kari Mi te a bigi ogri miti den Mi no o arki den.
15A pipel fu Mi, di Mi lobi, du furu ogri,
dat' meki den no abi no wan leti fu de ini a tempel fu Mi.
Den no abi fu prakseri dati den meti di den e tyari leki ofrandi gi Mi
kan meki a bigi ogri psa den.
Den ben sa prisiri sote.
16MASRA ben kari un wan oleifbon,
wan oleifbon nanga furu wiwiri èn nanga moi froktu.
Ma wan leisi tranga dondru bari èn faya ben koti,
dan A meki ala a wiwiri nanga den taki teki faya.
17Iya, MASRA fu ala sani, En di prani unu, A e meki un sabi taki A o puru un na pasi fu a bigi ogri di den sma fu Israel nanga den di fu Yuda du. Bika den du Mi wan hati sani nanga a wierook di den bron gi Baal.”
Wantu man wani kiri Yeremia
18Dan MASRA meki mi kon sabi wan sani di mi no ben sabi. A sori mi sortu takru prakseri den man fu Anatot ben abi nanga mi. 19Fosi dati mi no ben abi no wan denki fu so wan sani. Mi ben de leki wan skapu di sma e tyari go srakti. Mi no ben sabi dati na a sani disi den ben abi ini den prakseri fu du nanga mi:
“Meki un kapu a bon trowe nanga ala den froktu fu en.
Meki un kiri en puru mindri den libiwan
dan prakseri srefi sma no o prakseri en moro.”
20“Ma MASRA fu ala sani,
Krutubakra di e krutu sani na tapu wan leti fasi,
Yu di e ondrosuku un ati nanga un prakseri.
Yu o meki mi si fa Yu o pai den baka,
bika a tori fu mi de na ini Yu anu.”
21“Dat' meki MASRA e taki disi: ‘Den man fu Anatot di wani kiri yu, den man di e taigi yu taki: No taki nanga un moro ini a nen fu MASRA, efu yu tan du en, un o kiri yu. 22Mi, MASRA fu ala sani, e taki disi: Yere, Mi o strafu den. Den o kiri den yonkuman fu den na ini feti, den manpikin nanga den umapikin fu den o dede fu angri ini angriten. 23No wan fu den o tan na libi, bika te a yuru doro fu Mi strafu den man fu Anatot, Mi o meki bigi ogri miti den.’ ”
