A tranga dreiten
1Disi na san MASRA taigi Yeremia fu a tranga dreiten:
2“Yuda e krei.
Den foto fu en e dede gwe.
Den sma didon na gron e sari.
Den sma fu Yerusalem e bari suku yepi.
3Den gudusma e seni den knekti fu den go suku watra.
Den e go na den peti,
ma watra no de fu feni.
Den e drai go baka nanga leigi kroiki.
Den e syen sote dati den e tapu den fesi.
4A gron drei sote,
bika alen no fadon.
Den gronman no sabi san fu du,
soso syen meki den e tapu den fesi.
5Srefi a dia ini a wei e gwe libi a pikin di a meki
bika no wan grasi de fu feni.
6Den busi buriki tnapu na tapu den pikin bergi,
den opo den mofo e fanga winti leki busi dagu.
Den no man si bun moro,
bika no wan grun grasi de fu den nyan.”
7Dan a pipel begi Mi taki:
“MASRA, den kruktudu fu wi de leki ketoigi taki wi du ogri.
Ma tye, du wan sani fu Yu nen ede.
Wi drai gwe furu leisi fu Yu,
wi sondu, wi no du san Yu wani.
8Yu na a wan enkri howpu fu Israel,
Yu na a ferlusuman fu wi te wi de ini benawtu.
Dan fu sanede Yu e meki leki wan doroseisma ini a kondre?
Fu sanede Yu e meki leki wan sma di de dyaso fu wan neti nomo?
9Fu sanede Yu e du leki wan man di no sabi san a mus du,
leki wan srudati di no man ferlusu unu?
Ma MASRA, Yu de na un mindri,
wi na fu Yu,
no libi unu!”
10Na disi MASRA e taki fu a pipel disi:
“Den ben gwenti drai gwe fu Mi,
den no ben meki den futu fu den bro.
Na dat' meki MASRA no abi prisiri moro nanga den.
Now Mi o meki den pai fu den ogri di den du,
now Mi o strafu den fu den sondu.”
11Dan MASRA taigi mi taki: “No begi moro gi a pipel disi fu Mi tyari wan kba kon na a benawtu ini san den de. 12Awinsi den e faste, Mi no o arki te den e kari Mi fu yepi den. Awinsi den bron ofrandi gi Mi, awinsi den e tyari graan-ofrandi kon gi Mi, den no e gi Mi prisiri. Ma nanga feti, angriten nanga takrusiki di o panya drape Mi e tyari wan kba kon na den.” 13Ma dan mi taki: “Tye Masra MASRA, yere, ma den profeiti fu den e taigi den taki: ‘Feti no o de èn angriten no o de ini a kondre tu, ma Mi o sorgu taki un o tan libi ini freide dyaso ini a kondre.’ ” 14Ma MASRA piki mi taki: “Den profeiti e lei te den e taki sani ini Mi nen. A no Mi seni den, noti Mi komanderi den fu taki, Mi no taki nanga den srefsrefi. Den e lei te den e taki tak' Mi sori den sani. Den sani di den e du fu si sani na fesi no abi no wan warti, èn den sani di den e taki na sani di densrefi sidon prakseri. 15Dat' meki na disi MASRA e taki fu den profeiti di e taki ini Mi nen sondro dati na Mi seni den, den di e taki: ‘Feti noso angriten no o de ini a kondre.’ Mi e taki dati den profeiti dati o dede ini bigi feti nanga fu angri ini angriten. 16Èn a pipel di ben lobi arki den te den ben e taki den sani, sa didon dededede tapu strati. Angriten nanga bigi feti o kiri den. Den o didon sondro fu sma beri den: den, den uma fu den, den manpikin nanga den umapikin fu den. Na a fasi dati Mi o meki den ogri di den du drai kon baka tapu den.
17Taigi den disi:
Dei nanga neti mi ai furu nanga watra e lon kmoto na mi ai.
Mi no man tapu krei.
Bika a lobi pipel fu Mi kisi bigi mankeri,
na wan bun naki a kisi.
18Te Mi e go na den pranigron Mi e si fa den didon drape,
den wan di dede na ini bigi feti.
Te Mi e go ini a foto Mi e si fa den didon drape,
den wan e dede fu angri ini angriten.
Den profeiti nanga den priester srefi e waka lontu
ma sondro fu sabi san den e du.”
19“Na trutru Yu poti Yuda na wan sei?
Na fuga Yu fuga so fu Sion?
Fu sanede Yu naki un so dati un no man betre moro?
Wi ben ferwakti dati sani ben o waka bun gi unu,
ma not'noti.
Wi ben ferwakti wan ten fu dresi,
ma luku, na bigi ogri miti wi.
20MASRA, wi sabi taki wi no du bun,
wi nanga den afo fu unu,
wi sondu, wi no du san Yu wani.
21Ma no poti un na wan sei, fu Yu nen ede.
No pori a presi pe Yu e rigeri,
Prakseri a ferbontu tu di Yu meki nanga unu,
tye, no broko en.
22Den soso gado fu den tra folku no man meki alen fadon,
a no heimel e du dati fu ensrefi tu.
Ma na Yu, MASRA, Gado fu unu, e du dati.
Dat' meki un poti un howpu na Yu tapu,
bika na Yu meki ala sani.”
