1“Den sondu fu Yuda skrifi nanga wan isri pen,
nanga wan srapu dyamanti den tyerfi den poti ini un ati,
nanga tapu den tutu fu den altari fu den.
2Srefi den pikin fu den e tan memre den altari,
nanga den postu di den ben poti tnapu gi Asyera,
na ondro ibri bon nanga furu wiwiri, na tapu ibri pikin bergi
3nanga tapu den bergi ini a wei.
Mi o meki feyanti kon teki ala un gudu tyari gwe,
Mi e meki dati psa fu den sondu di un du ini a heri kondre.
4Yu o lasi a kondre di Mi ben gi yu fu yusrefi,
Mi o meki un tron srafu fu un feyanti, ini wan kondre di un no sabi.
Bika Mi e kuku fu atibron, èn un o firi en.”
5Na disi MASRA e taki:
“Wan fluku de tapu a sma di poti en fertrow tapu libisma,
di e bow tapu libisma krakti
èn di drai en baka gi Mi.
6Sowan sma o de leki grangran ini a bigi dreisabana,
a no o sabi srefi te alen e fadon.
A tnapu fu en na mindri ston,
ini wan kontren pe a gron sowtu èn pe sma no e libi.
7Ma a sma di e poti en fertrow na tapu MASRA,
na wan blesi sma.
8Sowan sma de leki wan bon di prani sei wan kriki,
den rutu fu en e doro te ini a kriki.
A no e frede gi dreiten,
den wiwiri fu en e tan grun.
Bigi dreiten no e gi en problema,
a e tan gi froktu.
9A ati fu wan libisma no de fu fertrow srefsrefi,
a kruktu srefsrefi,
suma sa man ferstan en?
10Na Mi, MASRA, e luku san de ini a ati fu libisma,
èn na Mi e ondrosuku den prakseri fu den.
Mi e du dati fu pai ini wan sma na a fasi fa a e tyari ensrefi,
na den sani di a e du.
11Son leisi fowru e sidon tapu eksi di a no den meki,
na so yu abi sma de e kon gudu tapu wan bedrigi fasi.
Te a libi afu fu en libi a e lasi ala sani baka.
Na a kba fu en libi a e si fa a ben don.”
12“Wan kownusturu fu glori,
hei na tapu wan bergi,
dati na a santa presi fu wi,
sensi na a bigin.
13MASRA, Yu di de a wan enkri howpu fu Israel,
ala sma di gwe libi Yu, o kon na syen.
Den di teki den eigi pasi,
es'esi den no o de fu si moro,
leki nen di skrifi ini santi,
bika den gwe libi MASRA, a bron fu libi watra.
Yeremia e begi fu Gado yepi en
14Dresi mi MASRA,
dan mi sa betre trutru,
yepi mi,
dan mi san feni yepi trutru.
Na Yu na a wan di mi e gi grani ala ten.
15Luku, den e tan aksi mi taki:
‘Pe den sani de di MASRA taki dati o psa nanga wi?
Meki den kon.’
16Ma Masra, noiti mi dwengi Yu fu Yu meki bigi ogri miti den.
Mi no ben angri fu dati.
Yu sabi den sani di mi e taki,
ibri wortu fu mi Yu sabi.
17No de a wan di e meki mi frede te fu dede,
bika na Yu mi e lon kon kibri te bigi ogri kon na mi pasi.
18No meki mi kon na syen,
ma meki den sma di de na mi baka fu du mi ogri kon na syen.
No meki mi frede, ma meki den frede.
Meki bigi ogri miti den,
maskaderi den, maskaderi den finifini.”
A sabatdei
19MASRA taigi mi taki: “Go tnapu na a moro bigi doro fu a foto pe den kownu fu Yuda e waka te den e go nanga te den e kon. Go tnapu na ala den tra doro fu Yerusalem tu. 20Drape yu mus taigi a pipel taki: ‘Kownu fu Yuda, sma fu Yuda nanga fu Yerusalem, unu di e waka na den doro disi, un arki a boskopu fu MASRA: 21Na disi MASRA taki: Efu un lobi un libi, dan un mus sorgu dati un no syow lai tapu sabatdei na den doro fu kon ini Yerusalem. 22Tapu a sabatdei un no mus syow sani puru ini un oso tu èn un no mus du no wan wroko. Un teki a sabatdei leki wan santa dei, na dati Mi ben komanderi den afo fu unu. 23Ma den no arki Mi, den no teki san Mi taigi den, ma den tranga den ati prefu den arki san Mi e taigi den. 24Ma efu unu arki Mi, na so MASRA taki, èn un no syow lai tapu a sabatdei na den doro kon ini Yerusalem, èn efu un no du no wan wroko a dei dati, ma un hori a sabatdei leki wan santa dei, 25dan den kownu di e sidon baka David tapu a kownusturu, sa psa na den doro disi kon ini a foto. Den sa sidon tapu asi nanga tapu wagi èn den tra man di e yepi en tiri a kondre nanga den sma fu Yuda nanga di fu Yerusalem sa de nanga den èn a foto disi sa tan fu têgo. 26Dan sma sa kmopo fu den foto fu Yuda, fu a kontren fu Yerusalem, fu a kontren fu a lo fu Benyamin, fu a kontren fu den pikin bergi, fu a kontren fu den hei bergi nanga fu a Negebsabana fu kon tyari ofrandi ini a oso fu MASRA. Den sa bron meti leki ofrandi, den sa srakti meti leki ofrandi, den sa tyari graan-ofrandi, den sa bron wierook èn den sa tyari ofrandi fu gi Mi tangi. 27Ma efu un no wani arki san Mi e taki fu teki a sabatdei leki wan santa dei, èn efu un e waka psa nanga lai tapu a sabatdei na den doro kon ini Yerusalem, dan Mi o leti wan faya gi den doro, wan faya di o bron den tranga presi fu den ini Yerusalem, wan faya di no wan sma o man kiri.’ ”
