1Dan MASRA taigi mi taki: “Go na a oso fu a kownu fu Yuda dan yu e taigi en disi: 2‘Kownu fu Yuda di sidon tapu a kownusturu fu yu afo David, arki a boskopu fu MASRA. Yu, den man di e wroko nanga yu, nanga a pipel fu yu di e waka na den doro disi kon na inisei. 3Na disi MASRA e taki: Du sani tapu wan leti fasi èn un sorgu dati sma e kisi den leti. Un no meki sma bedrigi trawan moro. Un no du doroseisma, uma di masra dede kba, nanga pikin di no abi p'pa nanga m'ma moro ogri èn un no teki sani fu den nanga tranga. Un mus tapu fu kiri sma dyaso ini a kondre tu di no du ogri. 4Efu un sa hori un fin'fini den sani dati, dan den kownu di e sidon baka David tapu a kownusturu, sa psa na den doro disi kon ini a foto. Den sa sidon tapu asi nanga tapu wagi èn den man di e wroko nanga en nanga a pipel fu en. 5Ma efu un no wani du san Mi taki, dan Mi e sweri na Misrefi, na so MASRA e taki, dati a kownu-oso disi sa tron wan bigi ipi broko ston.
6Bika na disi MASRA e taki fu a kownu-oso fu a kownu fu Yuda:
Mi e si yu leki den moi busi fu Gilead,
leki den moro hei pisi fu Libanonbergi.
Ma Mi o meki Yu tron wan dreisabana,
wan presi pe no wan sma e libi.
7Iya, Mi e meki man klari fu broko yu te na gron.
Ini wan fu den nanga en wrokosani.
Den o kapu den moi sedre postu fu yu trowe,
dan den o sutu faya gi den.
8Dan furu folku o hari psa a foto disi èn den o aksi makandra taki: Fu sanede MASRA du so wan sani nanga a bigi foto disi? 9Den o piki taki: Na fu di den no hori den na a ferbontu fu MASRA, a Gado fu den, èn fu di den go boigi gi tra gado fu anbegi den.
10Pipel fu Yuda, un no krei gi kownu Yosia,
un no sari fu di a dede.
Ma un krei gi Salum, a manpikin fu en.
Feyanti tyari en gwe nanga tranga,
noiti moro a e kon baka na a kondre pe a gebore.
11Na disi MASRA e taki fu kownu Salum fu Yuda, a manpikin fu Yosia, di tron kownu baka en p'pa: A no dyaso moro èn a no o drai kon baka. 12Salum sa dede ini a kondre pe den tyari en go. A no o si a kondre disi moro.
13A kba gi a wan di e bow a oso fu en na tapu wan kruktu fasi,
di e bow kamra go na loktu sondro fu teri den leti fu trawan,
di e meki trawan wroko gi en fu soso,
sondro fu gi den a moni di den mus kisi.
14A kba gi a wan di e taki:
Mi o meki wan bigi oso gi misrefi,
mi o poti bigi kamra na loktusei fu en.
Mi o poti fensre nanga sedre-udu na den fesi.
dan mi o ferfi en wan moi redi kloru.
15Ma a no fu dati yu de kownu,
fu meki oso fu sedre-udu di moi moro di fu trawan.
Yu p'pa ben abi ala san a ben abi fanowdu,
ma a ben sorgu dati sma ben kisi den leti,
èn dati sani ben psa na tapu wan leti fasi.
Èn sani ben e go bun nanga en.
16A ben sorgu dati den sma di ben e pina srefsrefi,
nanga den mofinawan ben kisi den leti.
A ten dati sani ben go bun.
A ben e sori dati a ben e lespeki Mi,
Na so MASRA taki.
17Ma yu dati,
yu e prakseri soso fu go na fesi na tapu wan kruktu fasi,
soso fu kiri sma di no du noti,
soso fu pina sma nanga fu du sani nanga tranga.
18Dat' meki, na disi MASRA e taki fu kownu Yoyakim,
a kownu fu Yuda, a manpikin fu Yosia:
No wan sma o sari fu en ede èn bari:
Tye, mi brada noso tye, mi sisa.
No wan sma o bari taki:
Tye, masra noso tye wi kownu.
19Leki fa un e du nanga wan buriki te a dede,
na so un o du nanga a dedeskin fu en.
Sma o srepi en go na dorosei,
dan den o trowe en fara fu den bigi doro fu Yerusalem.
20Sma fu Yerusalem,
un kren go tapu a Libanonbergi dan un bari.
Un opo un sten na ini Basan.
Un bari bun tranga kmoto fu Abarimbergi,
bika feyanti puru den kondre na pasi tapu san un ben e bow.
21Mi ben warskow yu kba di yu no ben abi noti e frede,
ma yu ben taki:
Mi no wani arki.
Sensi di yu yongu yu de so kba,
yu no e arki Mi.
22Feyanti o tyari ala den edeman fu yu gwe,
leki na winti wai den gwe.
Den sma fu ala den kondre tapu san yu ben e bow,
den o tyari gwe nanga tranga.
Dan bigi syen o naki yu fu den takrudu fu yu ede.
23Kownu, yu di e sidon so hei leki Libanonbergi,
yu di e libi ini wan oso fu sedre postu,
yu o dyeme èn yu o soktu,
leki wan uma di e firi a pen te a e meki wan pikin.
24So leki fa a tru taki Mi e libi, na so MASRA taki, awinsi Mi ben weri yu, Konyahu, manpikin fu Yoyakim, na Mi finga leki a linga fu wan kownu nanga a stampu fu en, Mi ben o hari yu puru. 25Dan Mi ben o gi yu abra ini a makti fu den sma di wani kiri yu, ini a makti fu en di yu e frede, ini a makti fu kownu Nebukadnesar fu Babel, nanga ini a makti fu den Kaldeasma. 26Mi o fringi yu nanga yu m'ma, di meki yu, gwe na wan tra kondre, na wan kondre pe un no gebore. Èn na drape un o dede. 27Un no o drai kon baka na a kondre pe un ben angri nanga un heri ati fu drai kon baka.
28Konyahu a no wan broko kleipatu
a no wan prapi di sma no wani moro.
Dan fa a du kon taki den fringi en nanga den pikin fu en gwe,
taki den trowe den go na wan kondre di den no sabi?
29Kondre, kondre, yere a boskopu fu MASRA: 30Na disi MASRA taki: Skrifi ini den buku fu yu dati a man disi no abi pikin. Skrifi dati a ben de wan man di no ben abi koloku. Bika no wan fu den pikin fu en o sidon tapu a kownusturu fu en afo David fu tiri Yuda.’ ”
