1“A ten dati, na so MASRA taki, Mi sa de Gado gi ala den lo fu Israel,
èn den sa de a pipel fu Mi.
2Na disi MASRA e taki:
Israel, a folku di no dede na ini feti.
Mi sori en Mi bun-ati na ini a bigi dreisabana,
di den ben e hari go na a presi pe den bo rostu.
3Fu fara MASRA sori Ensrefi na mi.
Iya, Mi lobi yu nanga wan têgo lobi,
na dat' meki Mi no tapu fu sori yu a lobi fu Mi.
4Mi o meki yu gro baka,
iya, Israel di Mi lobi, yu o gro baka.
Yu o teki a tamboerijn fu yu baka,
èn dansi fu prisiri.
5Yu o prani droifi baka na tapu den bergi fu Samaria,
èn na yu di prani den o nyan den froktu.
6Bika a dei e kon
taki den waktiman tapu den bergi ini a kontren fu Efraim,
o bari taki:
‘Un kon, meki un hari go na Sion,
na MASRA, a Gado fu unu!’
7Na disi MASRA e taki:
Un prisiri fu den bakapikin fu Yakob,
Un meki wan prisiri babari gi a basi fu ala folku.
un opo un sten èn singi taki:
‘MASRA ferlusu En pipel,
den wan di libi ete fu Israel.’
8Iya, Mi e puru den fu a kondre na noordsei,
Mi e tyari den kon na wan fu a kbapisi fu grontapu.
Breni sma nanga lan sma de na den mindri,
uma nanga bere, nanga uma di de fu kisi wan pikin.
Mi e meki den drai kon baka ini wan bigi grupu.
9Nanga watra-ai den o drai kon baka,
den kari Mi na ini begi,
èn Mi o tiri den.
Mi e tyari den go pe watra e lon bogobogo,
tiri den tapu moi grati pasi,
den no o misi futu.
Bika Mi de wan p'pa gi Israel,
iya, Efraim na Mi fosi manpikin.
10Folku, un arki den wortu fu MASRA,
èn un ferteri en te na den fara kondre tapu se:
En di ben panya a folku fu Israel,
na En o tyari den kon na wan baka èn tiri den,
neleki fa wan skapuman e luku en skapu.
11Bika MASRA e ferlusu den bakapikin fu Yakob,
A e ferlusu den puru ini a makti fu trawan di tranga moro den.
12Nanga prisiri den o kon na Sionbergi,
den fesi o brenki fu den bun di MASRA o gi den:
karu, win, oleif-oli, skapu nanga kaw.
Den o de leki wan moi dyari di e kisi nofo watra,
noiti moro den o mankeri wan sani.
13Dan yongu umapikin o dansi fu prisiri,
pikin boi nanga grani sma o dansi nanga den.
Mi e kenki a sari di den ben sari tron prisiri,
Mi e trowstu den, èn so den o fergiti a sari fu den.
14Den priester Mi e gi bogobogo fu den moro bun pisi fu den meti di tyari leki ofrandi,
a pipel fu Mi, Mi e gi bogobogo fu den bun sani fu Mi,
na so MASRA e taki.
15Na disi MASRA e taki:
Furu krei nanga dyeme de fu yere ini Rama.
Na Rachel e krei fu en pikin ede.
A no wani fu sma trowstu en,
bika den pikin no de moro.
16Ma na disi MASRA e taigi en:
No krei moro, drei den watra-ai fu yu.
A luku di yu ben luku den o tyari en froktu now,
na so MASRA taki.
Den drai kon baka fu a kondre fu a feyanti.
17Iya, howpu de gi yu ini a ten di de na wi fesi,
na so MASRA taki,
den pikin fu yu o drai kon na den eigi kondre baka.
18Mi e yere fa Efraim e krei taki:
‘Yu wipi mi,
Yu leri mi fu arki,
leki wan yongu bulu di ben mus leri arki ete.
Ma tyari mi kon baka na Yu, meki mi drai kon baka,
bika Yu MASRA, na mi Gado.
19Mi e sari, now di mi kisi misrefi,
Mi e naki misrefi, now di mi ai kon opo.
Mi e syen èn mi kisi syen tu
bika mi e tyari a bakapisi fu den sondu fu mi yongu yari.’
20Efraim na a manpikin di Mi lobi moro den trawan,
a wan nanga san Mi e prisiri.
Ala leisi te Mi e taki fu en a gersi a tnapu leti na Mi fesi.
A sani dati e meki Mi e firi bigi lobi gi en,
èn a no abi misi dati Mi o teki a sorgu fu en na Mi tapu,
MASRA e taki.
21Un poti wan ipi ston tnapu sei a pasi,
un poti marki na a pasi,
un mus feni a pasi baka di un ben waka di un ben gwe.
Drai kon baka Israel di Mi lobi,
drai kon baka na den foto fu yu.
22Olanga yu o draidrai ete,
pipel fu Mi di drai gwe fu Mi?
MASRA e meki wan nyun sani na grontapu:
a uma sa suku en masra.
23Na disi MASRA fu ala sani, a Gado fu Israel, e taki: Mi sa tyari wan kenki kon gi den. Dan a sani disi o de fu yere baka ini den foto fu Yuda, iya, ini a heri kondre taki: ‘Meki MASRA blesi yu, Yerusalem, presi pe sani e psa na tapu wan leti fasi, santa bergi!’ 24Ala den sma fu Yuda o libi makandra drape baka, den sma fu den foto, gronman nanga skapuman. 25Den di weri, den di kon swaki, Mi o gi krakti baka.”
26Dan mi wiki èn mi opo mi ai. A sribi ben du mi bun.
27“Un yere, den dei e kon, MASRA e taki, dati Mi e meki libisma nanga meti lai bogobogo ini Israel nanga ini Yuda. 28Leki fa Mi no ben draidrai di Mi ben rutu den puru, di Mi ben broko den, di Mi ben puru den na pasi, di Mi ben wai den puru na pasi, èn meki bigi ogri miti den, na so Mi no o draidrai tu fu bow den èn fu prani den baka, MASRA e taki. 29Den dei dati sma no o taki moro: ‘Te bigisma nyan froktu di no lepi, na den tifi den pikin e swa.’ 30Ma ibri sma o dede fu en eigi kruktudu. Te wan sma nyan froktu di no ben lepi na en eigi tifi o swa.
31Un yere, den dei e kon, MASRA e taki, dati Mi o meki wan nyun ferbontu nanga a pipel fu Israel èn nanga a di fu Yuda. 32A o de wan tra ferbontu leki a wan di Mi ben meki nanga den afo fu den, a ten di Mi ben teki den na den anu puru ini Egipte. Den ben broko a ferbontu dati aladi Mi ben a masra fu den, na so MASRA taki. 33Ma disi na a ferbontu di Mi o meki nanga den sma fu Israel ini a ten di de na un fesi, MASRA, e taki: Mi sa poti a wèt fu Mi na den inisei. Mi o skrifi en ini den ati. Dan Mi o de a Gado fu den èn den o de a pipel fu Mi. 34Dan no wan fu den o abi fu leri en kondreman moro taki: ‘Yu mus leri sabi MASRA.’ Bika den alamala, bigiwan nanga pikinwan, o sabi Mi, MASRA e taki. Èn Mi sa gi den pardon fu den kruktudu fu den, den sondu fu den Mi no o prakseri moro.
35Na disi MASRA e taki,
En di meki a son leki wan faya gi deiten,
a munkenki nanga den stari leki faya gi neti,
En di e meki a se rigeri sote dati den skwala e meki babari,
En di nen na MASRA fu ala sani:
36Na soso te den sani disi no de moro,
MASRA e taki,
dan fosi Israel no o de moro tu,
dan fosi den no o de a pipel fu Mi moro.
37Na disi MASRA e taki:
Leki fa no wan sma man marki o hei heimel de,
no wan sma man luku o dipi den fundamenti fu grontapu de,
na so Mi no o poti a pipel fu Israel na wan sei
fu ala den sani di den du,
MASRA e taki.
38Un yere, den dei e kon, na so MASRA taki, dati a foto o meki baka gi MASRA. A o meki fu a Hananeltoren, go te na a Ukupoort. 39Fu drape den o hari wan pisi poti moro na en, go te na a pikin bergi Gareb, dan a o beni go na Goa. 40A heri dal pe den e beri den dede èn pe den e fringi doti, ala den wei sei a Kidronkriki go te na a uku fu a Asipoort na oostsei. A heri kontren dati den sa poti aparti gi MASRA. Noiti moro sma sa kon broko Yerusalem baka.”
