Yeremia 37

₁Kownu Nebukadnesar fu Babel ben poti Sedekia, a manpikin fu Yosia, leki kownu fu Yuda na a presi fu Konyahu, a manpikin fu Yoyakim. ₂Ma Sedekia no ben arki san MASRA ben e meki profeiti Yeremia taigi en. No en, no den man di ben e wroko nanga en, no den sma fu a kondre.

₃Wan dei kownu Sedekia seni Yehukal, a manpikin fu Selemya, nanga priester Sefanya, a manpikin fu Maaseya, go na a profeiti Yeremia nanga a aksi disi: “Mi e begi yu tangitangi fu yu begi MASRA, a Gado fu unu, gi wi.” ₄A ten dati Yeremia ben fri ete, den no ben sroto en ete. ₅A ten dati tu den Kaldeasma ben tapu fu feti nanga Yerusalem, bika den ben yere dati a legre fu Farao ben kmopo fu Egipte e kon. ₆Dan MASRA taki nanga a profeiti Yeremia, A taigi en taki: ₇“Na disi MASRA, a Gado fu Israel, e taki: Un taigi a kownu fu Yuda di seni un taki: Yere, a legre fu Farao fu Egipte di de na pasi fu kon yepi yu e drai gwe baka. ₈Den Kaldeasma o drai kon baka èn feti nanga a foto disi. Den o teki en abra èn den o sutu faya gi en. ₉Na disi MASRA e taki: No kori yusrefi nanga a prakseri dati den Kaldeasma gwe fu no kon moro, bika a no gwe den gwe. ₁₀Èn awinsi un ben sa wini a heri legre fu den Kaldeasma, di o kon feti baka nanga unu, taki na soso srudati nanga hebi mankeri tan na baka, dan srefi den dati bo kmoto ini den tenti fu sutu faya gi a foto.”

₁₁Di Farao ben hari kon nanga a legre fu en, den Kaldeasma ben hari gwe fu Yerusalem, ₁₂Dan Yeremia ben wani kmoto fu Yerusalem fu go na a kontren fu a lo fu Benyamin. A ben wani go drape fu di a ben mus kisi wan pisi gron drape. ₁₃Ma di a ben doro na a Benyaminpoort, wan waktiman hori en tnapu nanga den wortu: “A mus de taki na den Kaldeasma yu wani go.” A waktiman dati ben nen Yiria, a manpikin fu Selemya nanga granpikin fu Hananya. ₁₄Yeremia piki en taki: “A no tru, a no den Kaldeasma mi wani go.” Ma Yiria no bribi en. A grabu en dan a tyari en go na den tiriman. ₁₅Den man dati atibron tapu Yeremia. Den meki wantu waktiman fon en, dan den sroto en ini a oso fu a sekretarsi Yonatan. Den ben teki a oso dati meki wan strafu-oso. ₁₆Na so Yeremia doro na strafu-oso, ini den kamra di ben de na ondrosei fu a oso. A tan drape wan heri pisten.

₁₇Dan wan leisi kownu Sedekia seni teki Yeremia sondro fu tra sma sabi, dan a aksi en taki: “MASRA taki nanga yu?” Yeremia piki en taki: “Iya, A o gi yu abra ini a makti fu a kownu fu Babel.” ₁₈Yeremia aksi kownu Sedekia tu taki: “San mi du yu, den man di e wroko nanga yu, nanga a folku, dati un poti mi na strafu? ₁₉Pe den profeiti de di ben e taigi yu taki Gado taigi den taki: ‘A kownu fu Babel no o hari kon feti nanga yu èn nanga a kondre disi.’ ₂₀Tye masra, mi kownu, mi e begi yu fu yu arki mi, no seni mi go baka na a oso fu a sekretarsi Yonatan. Efu mi go drape baka mi o dede.” ₂₁Dan kownu Sedekia komanderi fu den hori Yeremia na a presi fu den waktiman na a kownu-oso. Drape a ben kisi ala dei wan brede fu den bakriman, te leki brede no ben de moro ini a foto. Yeremia tan drape na a presi fu den waktiman na a kownu-oso.