Fu Amon
1“Na disi MASRA e taki fu den Amonitisma:
A gersi leki Israel no abi manpikin,
neleki a no abi sma fu libi den gudu fu en na baka.
Fa a gado Milkom ben kan teki a kontren fu Gad abra?
Fa a du kon taki na a pipel fu en e libi now ini den foto fu a lo fu Gad?
2Dat' meki yere, den dei e kon,
na so MASRA taki,
dati Mi o meki babari fu feti de fu yere ini Raba,
a bigi foto fu den Amonitisma.
Feyanti o broko en tron bigi ipi broko ston.
Den o sutu faya gi den dorpu tu di lontu en.
Dan Israel sa puru a kontren dati baka
ini anu fu den sma di ben teki en abra,
Na so MASRA e taki.
3Krei Hesbon, bika a foto Ai tron wan broko pranasi.
Un bari krei uma fu Raba,
un weri un lowkrosi èn un sari.
Un lon na ini den pranigron,
bika a feyanti e tyari Milkom gwe nanga tranga.
Sosrefi den priester nanga den tra tiriman fu a kondre.
4Amon, fu sanede yu e meki bigi so fu den dal fu yu?
Fu den pranigron fu yu pe sani e gro bun?
Trangayesi pipel fu Amon,
Un e denki taki noti no kan miti unu
fu di den maksin fu un span.
Un e taki srefi: ‘Suma o man kon feti nanga unu?’
5Yere, Mi e seni frede kon na yu tapu
Masra, MASRA fu ala sani e taki.
fu ala sei a o kon na un tapu,
A o meki un lon panya,
èn no wan sma o man tyari un kon na wan baka.
6Ma baka wan pisten Mi sa tyari wan kenki kon gi den Amonitisma,
Na so MASRA taki.
Fu Edom
7Na disi MASRA fu ala sani e taki fu Edom.
A gersi dati koni sma no de ini Teman moro,
dati no wan sma kan gi bun rai moro,
dati sma di e si sani krin no drape moro.
8Sma fu Dedan, un drai gwe, un lowe,
un go kibri ini den bergi-olo.
Bika a ten doro dati Mi o strafu den bakapikin fu Esau.
Mi o meki bigi ogri miti den.
9Te den man di e piki droifi doro na yu,
no wan droifi ben o tan fu sma piki fu a di fu tu tron.
Te fufuruman e kon te neti
na soso san den abi fanowdu den e teki.
10Ma Mi, Misrefi o gi den bakapikin fu Esau abra na den feyanti.
Mi e tyari ala den kibripresi fu en kon na doro.
Den o wani go kibri, ma den no o man.
A feyanti o puru den alamala na pasi,
Esau no o abi bakapikin moro.
No wan birtisma o taki:
11‘Mi o sorgu gi den pikin fu unu di no abi p'pa nanga m'ma moro,
èn den uma di masra dede kba kan fertrow na un tapu.’
12Bika na disi MASRA e taki: Srefi den sma di no du noti fu kisi strafu o abi fu dringi fu a kan, di furu nanga a atibron fu Mi. Dan fa yu wani kmopo gi a strafu? Yu o kisi yu strafu, a no abi misi dati yu o dringi fu a kan. 13Bika Mi e sweri na Misrefi, na MASRA taki, dati ala sma o skreki te den si san psa nanga a foto Bosra. Sma o teki en meki spotu, sma o fluku en tu. Ala den foto lontu en o tron bigi ipi broko ston fu têgo.”
14“Mi yere a boskopu fu MASRA
wan boskopuman go na den folku.
A mus taigi den taki:
‘Un tyari den legre fu un kon na wan,
un meki un klari fu go na feti,
dan un hari go feti nanga Edom.’ ”
15MASRA e taigi Edom disi:
“Mi e meki yu tron wan folku di no prenspari srefsrefi
na mindri den tra folku.
Libisma o si yu leki noti.
16Ala sma ben frede gi yu, na dati kori yu,
a meki yu kisi heimemre.
Yu go libi hei ini den bergi-olo,
yu teki den moro hei pisi fu den bergi gi yusrefi.
Ma awinsi yu meki yu tanpresi so hei leki den nesi fu aka,
Mi o hari yu puru te drape,
na so MASRA taki.
17Na so Edom o tron wan broko pranasi. Iniwan sma di o hari psa drape o tnapu nanga opo mofo èn den o skreki fu si a bigi ogri di miti en. 18MASRA e taki: Leki fa Mi ben drai Sodom nanga Gomora, nanga ala den tra kondre ini a birti fu en tapu, na so Mi o meki dati no wan enkri sma o libi ini Edom moro.
19Leki fa wan lew e broko go na tapu wan grupu meti
na a bus'busi fu a Yordanliba,
na so Mi broko go tapu Edom.
Mi e meki a heri folku lon panya.
Dan Misrefi o teki wan man poti fu tiri a kondre dati.
Suma de a srefi leki Mi?
Suma kan kari Mi kon na frantwortu?
Sortu tiriman o man hori feti nanga Mi?
20Dat' meki, un yere san MASRA besroiti fu du nanga Edom,
èn san A prakseri fu du nanga den sma fu Teman:
Fu tru, a feyanti o srepi srefi den pikin fu den tyari gwe.
Ini wan sma o tnapu nanga opo mofo.
21Grontapu o seki fu a fadon di Edom o fadon,
a bari di den o bari krei o de fu yere te na a Riet Se.
22Un yere, a feyanti o opo èn frei leki wan aka go na Bosra,
a o bradi ala en frei.
A dei dati a ati fu den dyadya srudati fu Edom,
a o naki leki a ati fu wan uma di de fu meki wan pikin.
Fu Damaskus
23Na disi MASRA e taki fu Damaskus:
A pipel fu den foto Hamat nanga Arpad kon frede sote.
Den yere nyunsu di no bun srefsrefi.
Na den inisei den de leki a se te a watra e rigeri,
den e broko den ede,
den no man de tiri fu den.
24A pipel fu Damaskus lasi ati.
Den bruya sote dati den lowe gwe.
Den de na ini benawtu, na ini pen,
leki wan uma di de fu meki wan pikin.
25A foto dati di ben abi so wan bigi nen,
a leigi now.
Na presi dati di ben tranga fu teki abra,
a presi pe prisiri ben e prisiri sote.
26Den dei dati feyanti o kiri den yonkuman tapu den pren,
ala den srudati den o kiri tu,
MASRA fu ala sani e taki.
27Mi o sutu faya gi den skotu fu Damaskus,
èn a faya dati o bron den kownu-oso fu Benhadad.
Fu den Arabiri
28Na disi MASRA e taki fu Kedar nanga fu den foto lontu Hasor di kownu Nebukadnesar fu Babel ben teki abra:
Hari go feti nanga Kedar,
puru den sma dati fu oostsei na pasi.
29Teki den tenti, den krabita nanga den skapu fu den,
teki ala san den abi tyari gwe.
Teki den kameel fu den tu,
bari taigi den taki:
‘Bruya e teki un na alasei!’
30Sma fu Hasor, un lowe,
un lon gwe es'esi, un go kibri ini den bergi-olo,
na so MASRA taki.
Bika kownu Nebukadnesar fu Babel,
poti na en ede kba san a o du nanga unu.
31Nebukadnesar, hari go feti nanga a folku dati,
a folku di e si leki noti kan miti en,
di e libi tiri fu en,
na so MASRA taki.
Den foto fu den no abi bigi doro, den no abi greni,
èn den e libi fara fu tra sma.
32Teki den kameel nanga ala den meti fu den tyari gwe.
Den di e piri den sei ede,
Mi o panya den go na ala sei.
Fu ala sei Mi o meki bigi ogri miti den tu,
na so MASRA taki.
33Hasor o tron wan presi pe busi dagu o libi,
a o tron wan broko pranasi fu têgo.
no wan enkri sma o tan moro drape.”
Fu Elam
34Di Sedekia kon na makti leki kownu fu Yuda, MASRA gi profeiti Yeremia a boskopu disi fu Elam:
35“Na disi MASRA fu ala sani e taki:
Yere, a krakti fu Elam na den man di e sabi sutu bo,
ma Mi o broko den bo fu den.
36Mi e meki tranga winti kon tapu Elam kmoto fu alasei.
Mi o panya a pipel dati go na alasei tu.
No wan kondre o de pe feyanti no o tai den sma fu Elam tyari go.
37Mi o meki Elam beifi gi den feyanti fu den,
gi den di wani kiri den.
Mi e meki bigi ogri miti den, bika Mi ati teki faya fu tru,
na so MASRA taki.
Mi e seni feyanti go na den baka te leki Mi puru den na pasi.
38Baka dati Mi o poti Mi kownusturu ini Elam fu leisi strafu,
dan Mi o puru kownu nanga tra tiriman na pasi,
na so MASRA taki.
39Ma bakaten Mi o tyari wan kenki kon gi Elam,
na so MASRA taki.”
