Yohanes 4

₁Den Fariseiman ben kisi fu yere taki moro furu sma e waka baka Yesus, èn taki A e dopu moro furu sma leki Yohanes. ₂Ma a no Yesus srefi ben e dopu den sma, ma na den man di ben e teki leri fu En. ₃Di A yere dati, A kmoto fu Yudea dan A drai go baka na Galilea. ₄Ma A ben musu psa ini Samaria. ₅Dan A doro na wan foto fu Samaria di den ben e kari Sikar. A ben de krosbei fu a pisi gron san Yakob ben gi en manpikin Yosef. ₆Drape a peti fu Yakob ben de. Yesus ben weri fu a langa waka san A waka, so A saka sidon na a peti. A ben de twarfu yuru ten so. _7-8A pisten di den man di ben e teki leri fu Yesus ben go ini a foto fu bai nyanyan, wan Samaria-uma kon na a peti fu teki watra. Dan Yesus taigi en taki: “Gi mi pikinso watra fu dringi.” ₉A Samaria-uma piki En taki: “Fa Yu leki wan Dyusma kan aksi mi leki wan Samaria-uma fu gi Yu pikin watra fu dringi?” Bika Dyusma no e bemui srefsrefi nanga Samariasma. ₁₀Ma Yesus piki en taki: “Efu yu ben sabi san Gado abi fu gi yu, èn efu yu ben sabi suma e aksi yu pikin watra fu dringi, dan na yu ben o aksi En watra èn A ben o gi yu watra san e gi libi.” ₁₁A uma piki En taki: “Masra, a peti dipi èn Yu no abi embre. Dan pe Yu o feni a watra san e gi libi? ₁₂Yu denki taki Yu bigi moro wi afo Yakob? Na en libi a peti disi na baka gi wi. A ben dringi fu en, èn den boi nanga den meti fu en ben dringi fu a peti disi tu.” ₁₃Yesus piki en taki: “Ala sma di e dringi fu a watra disi, sa kisi dreineki baka. ₁₄Ma a sma di e dringi fu a watra san Mi o gi en, no o kisi dreineki noiti moro. Bika a watra dati o tron wan peti ini a sma, di e tan gi watra san o gi en a libi fu têgo.” ₁₅Dan a uma taigi En taki: “Masra, gi mi a watra dati fu watra no kiri mi moro. Dan mi no abi fu kon dya moro fu teki watra.” ₁₆Yesus taigi en taki: “Go kari yu masra kon.” ₁₇A uma piki taki: “Mi no abi masra.” Yesus piki en taki: “Yu abi leti di yu taki tak' yu no abi masra. ₁₈Bika na feifi man yu ben abi kba, èn a man di yu abi now, a no yu masra tu. So na wan tru sani yu taki.” ₁₉Dan a uma taki: “Masra, mi e si taki yu na wan profeiti. ₂₀Den afo fu wi ben e anbegi Gado na tapu a bergi disi. Ma un Dyusma e taki tak' na Yerusalem na a presi pe sma mus anbegi Gado.” ₂₁Dan Yesus piki en taki: “Uma, yu kan bribi Mi: A ten e kon taki sma no o anbegi a P'pa tapu a bergi disi. Den no o anbegi En ini Yerusalem tu. ₂₂Un Samariasma no sabi san un e anbegi, ma wi sabi san wi e anbegi. Bika a Ferlusuman e kmopo fu den Dyusma. ₂₃Ma a ten e kon, èn a de kba, pe den sma di e anbegi a P'pa trutru sa anbegi En nanga den yeye èn tapu wan tru fasi. Bika Gado wani sma di sa anbegi En tapu a fasi disi. ₂₄Gado na yeye, èn den sma di e anbegi En mus anbegi En nanga den yeye èn tapu wan tru fasi.” ₂₅Dan a uma taki: “Mi sabi taki a Mesias o kon, a wan di den e kari Kristus. Te A kon, A sa leri un ala sani.” ₂₆Ne Yesus piki en taki: “Na Mi di e taki nanga yu, na a man dati.”

₂₇A srefi pisten dati den man di ben e teki leri fu Yesus doro èn den ben ferwondru fu si taki A e taki nanga wan uma. Ma toku no wan fu den no aksi En taki: “San Yu wani nanga a uma?” noso: “Fu sanede Yu e taki nanga en?” ₂₈A uma libi en kroiki dan a go na a foto go taigi den sma taki: ₂₉“Kon nanga mi, kon luku wan sma di taigi mi ala sani di mi ben du! Kande na En na a Mesias.” ₃₀Dan den sma kmopo fu a foto kon na En.

₃₁A pisten dati den man di ben e teki leri fu Yesus taigi En taki: “Meister, kon nyan pikinso.” ₃₂Ma Yesus piki den taki: “Mi abi sani fu nyan san un no sabi.” ₃₃Dan den man di ben e teki leri fu En aksi makandra efu wan sma ben tyari wan sani gi En fu A nyan. ₃₄Ma Yesus taigi den taki: “Mi nyanyan na fu du a wani fu a Wan di seni Mi kon, èn fu klari a wroko di A gi Mi fu du. ₃₅Sma e taki: ‘Ete fo mun dan yu kan koti nyanyan.’ Ma Mi e taigi un taki: Opo un ai, luku den gron. A nyanyan lepi kba fu koti! ₃₆A sma di e koti a lepi nyanyan e kisi en pai, èn a e tyari den froktu kon na wan di o kisi a libi fu têgo. Dan so a sma di prani nanga a sma di koti kan breiti makandra. ₃₇A odo tru di e taki: A wan e prani, a trawan e koti. ₃₈Bika Mi seni unu fu go koti pe unu no ben prani. Trawan ben du a wroko, dan now unu e nyan a froktu fu a wroko fu den.”

₃₉Fu di a uma go ferteri den sma taki Yesus taigi en ala sani san a ben du, meki furu Samariasma fu a foto dati bribi na ini Yesus. ₄₀So den kon na Yesus, dan den begi En fu tan na den. Dan A tan tu dei drape. ₄₁Furu tra sma kon na bribi di den yere san Yesus srefi taki. ₄₂Dan den taigi a uma taki: “Un no e bribi moro nomo fu di yu kon ferteri unu. Now un yere nanga un eigi yesi èn un sabi trutru tak' disi na a Ferlusuman fu heri grontapu.”

₄₃Baka den tu dei dati A kmoto fu drape go na Galilea. ₄₄Yesus srefi ben taki tak' sma no e lespeki wan profeiti ini a foto pe a kweki. ₄₅Ma di A doro ini Galilea, den sma drape teki En nanga opo anu. Bika den ben de na a Paskafesa ini Yerusalem èn den ben si san A du drape.

₄₆So A kon doro baka na Kana ini Galilea, pe A ben meki a watra tron win. Drape wan man fu Kafarnaum ben de di ben e wroko gi kownu. A boi fu a man disi ben e siki. ₄₇Di a man yere taki Yesus kmopo fu Yudea kon baka na Galilea, a go na En. Dan a begi En fu A kon dresi a boi fu en, bika a ben de fu dede. ₄₈Yesus taigi en taki: “Solanga unu no si marki nanga wondru, un no e bribi.” ₄₉Ma a man piki En taki: “Masra, kon nanga mi fosi mi boi dede.” ₅₀Dan Yesus taigi en taki: “Yu kan go, a boi fu yu kon betre.” A man bribi san Yesus taigi en, dan a gwe. ₅₁Di a ben de na pasi ete, den knekti fu en waka kon miti en nanga a nyunsu taki a boi fu en kon betre. ₅₂Dan a man aksi den olati a boi ben kon betre. Den piki en taki: “Na esde brekten wan yuru so, a korsu wai.” ₅₃Dan a p'pa memre taki na a yuru dati Yesus ben taigi en taki a boi fu en kon betre. A sani disi meki taki en nanga den sma fu en oso kon bribi na ini Yesus. ₅₄Disi ben de a di fu tu leisi di Yesus sori den sma wan marki baka di A kmoto fu Yudea kon na Galilea.