Yob 26

₂“A no spotu yepi yu yepi a wan

di kon swaki srefsrefi,

èn a no spotu kraka yu kraka a wan

di no abi krakti moro!

₃A no spotu rai yu gi a wan di ben mankeri koni,

èn a no spotu sabi yu tyari kon na krin!

₄Suma yepi yu fu man tak' den sortu sani dati?

Suma gi yu den prakseri fu taki so?

₅Den yeye fu den dedewan e beifi srefsrefi gi Gado,

den di e libi ondro watra.

₆Dedekondre de opo-opo gi En,

a pori presi no kan tapu

fu A no kan si san e psa drape.

₇Gado hari a noordsei pisi fu heimel span,

pe noti ben de.

A anga grontapu pe ben leigi.

₈A span den wolku nanga watra,

sondro tak' den e priti opo.

₉A e tapu a kownusturu fu En, fu a no de fu si,

A e bradi wolku abra en.

₁₀Fu prati leti nanga dungru,

A hari wan strepi lontu a se, pe a dungru nanga a leti e miti.

₁₁Den postu di e hori a heimel e beifi,

den e bruya te Gado e tapu skreki gi den.

₁₂Nanga a makti fu En A wini a se,

nanga a koni fu En A maskaderi Rahab,

a bun bigi sneki fu a se.

₁₃Nanga a bro fu En A meki tak' heimel de fu si krinkrin,

nanga En anu A boro a sneki di ben wani lowe gwe es'esi.

₁₄Yere, den sani disi na pikinso nomo fu san Gado kan du,

èn safri nomo wi e yere den wortu fu En.

Dan suma sa man ferstan den wroko fu En

te den e sori densrefi nanga bigi krakti nanga babari?”