Yob 35

₂“Yob, yu denki tak' yu abi a leti fu taki:

‘Mi e libi na tapu wan leti fasi na Gado fesi?’

₃Ma a srefi ten dati yu e aksi tu taki:

‘San a sani dati e du gi mi?

Sortu wini mi abi efu mi no e sondu?’

₄Mi o piki yu na tapu a sani dati,

yu nanga den mati fu yu.

₅Fringi wan ai go na heimel,

luku o hei den wolku de loktusei fu yu.

₆San yu e du Gado efu yu e sondu,?

Awinsi yu e sondu dorodoro,

san yu e du En nanga dati?

₇Efu yu e libi na tapu wan leti fasi,

san yu e gi En nanga dati?

San A kan kisi fu yu?

₈A ogri-ati fasi fu yu

kan du soso wan libisma leki yusrefi wan sani,

na den abi wini tu efu yu e libi bun.

₉Te sma de ini hebi benawtu,

fu di sma di abi makti e pina den,

den e bari e suku yepi.

₁₀Ma no wan fu den e taki:

‘Pe Gado, di meki mi, de?

Pe a Wan de di kan meki mi singi ini tranga ten,

₁₁a Wan di gi un moro ferstan

leki den meti di e waka na grontapu,

èn moro koni

leki den fowru di e frei na loktu?’

₁₂Dat' meki den kan bari suku yepi,

ma Gado no e piki den,

bika takru-ati sma tyari heimemre.

₁₃Yu kan teki en fu mi, na fu soso den e kari,

Gado no e arki den,

a Wan di abi ala makti no e luku den na wan ai.

₁₄O moro A no o arki yu, Yob,

now di yu taki tak' yu no e si En,

èn tak' a tori fu yu de na En fesi,

ma dati A e meki yu wakti?

₁₅Èn now, fu di Gado no e strafu,

awinsi fa En ati e bron,

fu di A gersi tak' a no e luku a sondu so fini,

₁₆Yob e opo en mofo e taki lawlaw sani,

èn taki wan lo sani di ensrefi no e ferstan.”