1Yu sa man meki uma lew fanga wan sani,
fu den pikin fu den kan nyan te a sari den?
2te den e kibri na ini den kibripe,
noso te den didon e luru ini a grangran,
3Suma e gi den aka sani fu nyan,
te den e frei lontu nanga angri bere,
èn te den pikin fu den e bari kari Mi gi nyanyan?
4Yu sabi sortu ten fu a yari
den uma krabita fu den bergi e meki pikin?
Yu si kba fa uma dia e meki pikin?
5Yu man teri den mun di den e tyari den pikin,
èn oten den pikin e gebore?
6Te den pikin mus gebore,
den e saka na tapu den futu
èn den e pusu den pikin kon na doro.
7Den pikin fu den e tranga
èn den e gro kon ini a opo wei,
te fu kba den e gwe èn den no e drai kon moro.
8Suma gi a buriki fu a busi so wan fri,
tak' den kan lon fu den go pe den wani?
9Na Mi gi en a dreisabana leki den tanpe,
a presi pe grasi no e gro.
10A e lafu fu a dyugudyugu ini a foto,
den man di e tiri den buriki drape, no e bari na en ede.
11A e waka na den bergi ini a wei,
e ondrosuku ala grun grasi di a e si.
12A bofru, a sa wani kon wroko gi yu,
noso kon psa a neti na a nyanyan baki fu yu?
13Yu sa man tai en nanga titei,
fu a meki gotro ini yu pranigron?
Yu denki tak' a o waka na yu baka
e hari a wrokosani nanga san den e drai pranigron?
14Yu no abi fu bow na en tapu, fu di a tranga so,
tak' a o du a tranga wroko fu yu.
15Yu no abi fu bow na en tapu tu
tak' a o go koti a graan di yu prani,
èn tak' a o tyari en go na a presi
pe yu e masi a buba puru na a graan.
16Nanga prisiri a struisfowru e naki den frei fu en,
ma dati no e meki a tron wan ooievaar.
17Te a struisfowru meki eksi,
a e libi den tapu gron,
a e meki a santi gi den waran.
18A no abi a ferstan tak' wan futu kan trapu den,
tak' wan bus'meti kan waka na den tapu.
19A e grofu nanga den pikin fu en, leki den a no fu en,
a no e span efu na fu soso a meki a muiti
fu puru den kon na doro,
20bika Mi no gi en ferstan,
no wan koni Mi no gi en.
21Ma te a dyompo opo èn lon gwe,
a e lafu asi nanga a sma di e tyari a asi.
22Yu bo man gi asi a krakti di den abi?
Yu bo man weri den moi langa wiwiri fu den
na den neki?
23Yu bo man meki den dyompo leki wan sprenka?
A tranga fasi fa den e bro e tyari frede.
24Den e diki a doti nanga den fesi futu,
den e sori a krakti fu den,
dan den e hari go ini a feti.
25Den e teki frede meki spotu,
noti no e frede den,
den no e frede gi feti.
26Den peiri ini a kokro fu a fetiman di e tyari den,
de fu yere,
a deigri nanga a lansri fu en e koti faya.
27Den no man tan tnapu na wan presi,
fayafaya den e traputrapu tapu a gron,
èn te a tutu bari, no wan sma man hori den.
28Den e bari ibri leisi te a tutu e piki,
fu fara den e smeri a feyanti,
den e yere tu fa edeman e bari e komanderi
den srudati fu den.
29A gonini, na yu leri en fa a mus frei?
Na yu leri en fu bradi den frei fu en
èn frei go na zuidsei?
30A aka, na yu komanderi en fu a e frei so hei,
fu a meki en nesi hei ini den bergi,
31den bergi pe a e libi nanga pe a e sribi,
drape na loktu, pe noti no e dangra en?
32Fu drape a e luru wan sani fu nyanyan,
den ai fu en e si bun fara.
33Pe dedeskin de, drape a de.
Den pikin fu en e dringi a brudu.”
34Dan MASRA aksi Yob taki:
35“Yu wani go doro fu hari taki nanga a Wan di abi ala makti?
Yu di tyari Gado go na krutu,
piki Mi fosi tapu den sani di Mi aksi yu!”
36Dan Yob piki MASRA taki:
37“Fa mi sa man piki Yu, mi no de noti.
Hori nomo mi kan hori mi mofo.
38Mi ben tak' wan leisi, ma mi no e taki noti moro.
Tu leisi srefi mi taki, ma mi e tapu nanga en.”
