Yob 40

₂“Meki yusrefi klari, bika Mi o aksi yu wantu sani,

èn yu mus piki Mi.

₃Na sori yu wani sori srefi tak' Mi no e krutu nanga leti?

Na sori yu wani sori tak' Mi fowtu èn yu abi leti?

₄Yu abi a srefi krakti leki Mi?

Te yu e taki, a sten fu yu e dondru leki di fu Mi?

₅Moi yusrefi dan nanga grani nanga makti,

weri glori nanga krakti dan leki krosi na yu skin.

₆Lusu a hebi atibron fu yu,

efu yu si wan heimemre sma,

broko en saka,

₇broko ala heimemre sma saka,

maskaderi den ogri-ati sma wantewante.

₈Beri den alamala,

sroto den ini dedekondre.

₉Dan Mi srefi sa gi yu grani,

bika dan yu wini nanga yu eigi krakti.

₁₀Prakseri a nijlpaard di Mi meki,

neleki yu.

A e nyan grasi leki wan kaw.

₁₁Ma luku den bowtu fu en, fa den tranga,

den titei fu en bere, fa den steifi.

₁₂A kan meki a tere fu en tnapu leki wan sedrebon,

den titei fu en bowtu, na ini bondru den de.

₁₃Den bonyo fu en tranga leki kopro peipi,

den anu nanga den futu fu en, leki isri tiki.

₁₄En na a moro ferwondru sani di Gado meki,

soso a Wan di meki en kan hari wan deigri gi en.

₁₅Den bergi pe ala den bus'meti e prei,

e sorgu gi a nyanyan fu en.

₁₆Ondro a mokomoko a e didon,

mindri a langa grasi fu a swampu,

pe a no e de fu si.

₁₇A mokomoko e gi en wan kowrupe,

den pankukuwiwiri fu a kriki e lonboto en.

₁₈A watra kan lon o tranga a wani, a no e seki,

a e de tiri fu en

te den skwala fu a Yordanliba e naki na en mofo.

₁₉Suma sa man grabu en nanga aka,

èn hari wan titei psa ini en noso?

₂₀Yu sa man kisi wan kaiman nanga wan aka,

dan yu hari en kon na syoro?

Yu sa man fasi a tongo fu en nanga titei?

₂₁Yu sa man hari wan titei psa ini en noso,

noso aka en na en kakumbe?

₂₂Yu denki dan taki a sa begi yu,

noso taki switi nanga yu?

₂₃Yu denki taki a o meki wan ferbontu nanga yu,

taki a o tron yu knekti fu têgo?

₂₄Yu denki taki yu o man prei nanga en,

prei nanga en leki fa den e prei nanga pikin fowru,

èn tai en na wan titei gi den umapikin fu yu?

₂₅Fisiman no abi fu denki taki den o man kisi en fu seri,

dan den prati a moni makandra.

₂₆Awinsi yu fringi omeni lansri fasi na en skin nanga en ede,

noti no o yagi.

₂₇Yu kan prefuru tu fu grabu en nanga yu anu,

yu no o fergiti a feti di a o feti nanga yu,

èn yu no e du en noiti moro.

₂₈Iniwan sma di wani kisi en e kon na syen,

bika luku a e luku den wawan, den e fadon kba.