Yob e krutu nanga Gado
1Solanga wan libisma de na libi, a mus wroko tranga.
A e psa den dei fu en leki wan man di e wroko dei wroko,
2leki wan srafu di e angri fu wan kowrupe,
èn leki fa wan man di e wroko dei wroko,
e angri fu en pai na a kba fu a dei.
3Na so Gado meki mi e libi fu soso,
a wan mun baka a trawan,
a wan neti baka a trawan mi e pina.
4Te mi e go sribi mi e aksi misrefi:
‘oten a neti o psa?’
Bika a neti e go nanga langa, èn so mi e fuga
fu a drai di mi e drai na tapu a bedi te musudei.
5Mi heri skin tapu nanga tranga doti èn nanga woron,
mi buba kon drei, den soro e puru pori watra.
6Den dei fu mi e kon es'esi na wan kba,
neleki a titei na a nanai fu wan sma di e nai krosi es'esi.
Es'esi den kon na wan kba, sondro wan enkri howpu.
7Gado, memre tak' a libi fu mi e psa gwe,
neleki a soktu fu wan sma.
Den ai fu mi no sa si a bun fu a libi moro.
8Den ai fu Yu di e luku mi, no o si mi moro.
Yu o luku fu mi, ma mi no o de fu feni moro.
9Leki fa wan wolku e psa fu no drai kon moro,
na so wan libisma di saka go na ini dedekondre,
no e kon moro.
10Noiti moro a e drai go baka na en oso,
den sma di ben sabi en, e fergiti en.
11Dat' meki mi no o hori mi mofo,
mi o taki, nanga ala a pen di mi e nyan,
mi o kragi, awinsi fa mi e nyan mi niri.
12Mi a no a se noso wan fu den bun bigi sneki fu a se,
taki Yu mus hori ai ala ten na mi tapu.
13Te mi prakseri taki:
‘Mi bedi sa de wan trowstu gi mi,
mi sribipe sa lekti a sari fu mi,’
14dan Yu e gi mi takru dren di e meki mi e skreki wiki,
Yu e meki mi e si sani di e frede mi.
15Dat' meki a moro betre efu wan sma sa tyokro mi kiri,
a moro betre mi dede,
dan taki a skin fu mi tron soso bonyo.
16Mi e fuga fu a libi fu mi, a no fu têgo mi o libi.
Gado, libi mi nanga rostu, mi no abi langa moro kba fu libi.
17Fu sanede Yu e si libisma so hei?
Fu sanede Yu e poti Yu prakseri na en tapu?
18Ala mamanten Yu e luku en san a e du,
ala momenti Yu e tesi en.
19Oten Yu o puru Yu ai na mi tapu,
oten Yu o meki mi bro pikinso fu mi kan swari mi spiti?
20Sortu sondu mi du di hati Yu so?
Yu di e hori ai nomo na mi tapu,
fu sanede na mi wawan Yu e si?
Fa a du kon tak' mi tron wan hebi gi Yu?
21Efu mi sondu,
fu sanede Yu no e gi mi pardon dan?
Efu mi du sani di no bun,
fu sanede Yu no kan si den leki noti.
Bika heri esi mi o didon na ondro gron,
dan Yu o suku mi,
ma mi no o de na libi moro.”
