Yona 4

₁Ma di Yona si dati, a no ben bun na en srefsrefi èn a kisi atibron. ₂So a taigi MASRA ini wan begi taki: “Tye, MASRA, na disi mi ben wan taigi Yu di mi ben de na oso ete? Fu a san disi ede mi ben lowe go na Tarsis. Bika mi sabi taki Yu na wan Gado di e sori En bun-ati, di abi sari-ati, langa pasensi, bigi lobi èn di e gi sma pardon fu a ogri di den du. ₃Meki mi dede MASRA, bika a moro bun gi mi efu mi dede, prefu mi tan na libi.” ₄Ne MASRA aksi en taki: “Taigi Mi efu yu abi leti fu kisi atibron.”

₅Ma Yona ben kmoto ini a foto, dan a go sidon na a oostsei dorosei fu a foto. A ben meki wan kampu, dan a go sidon ini a kowrupe ondro a kampu fu a ben kan si san ben o psa nanga a foto. ₆Dan MASRA Gado sorgu taki wan bon gro kon, di ben e sorgu taki wan kowrupe ben de tapu a ede fu Yona, fu Yona ben kan firi moro betre. Yona ben breiti srefsrefi nanga a bon. ₇Ma a tamara fu en, di a dei e opo, Gado sorgu taki wan woron bigin nyan a bon, dan a bon bigin drei gwe. ₈Fa a son opo, na so Gado sorgu taki wan faya winti bigin wai kmoto fu a oostsei. A son ben e bron Yona na en mindri ede, taki a ben e suku fu flaw. Ne Yona bigin winsi taki a ben dede. A taki: “A moro bun efu mi dede, prefu mi tan na libi.” ₉Dan Gado aksi Yona taki: “Na bron yu ati e bron fu a sani di psa nanga a bon?” Ne Yona piki taki: “Mi ati e bron srefsrefi èn mi abi leti fu dati.” ₁₀Dan MASRA aksi en taki: “Yu no ben wani fu a bon drei gwe. Ma a no yu meki muiti fu a bon gro. A no yu ben prani en tu. Na wan bon di gro kon ini wan neti èn a dede gwe baka. ₁₁Yu denki tak' Mi no e sari a bigi foto Nineve, di abi moro leki wan hondro nanga tutenti dusun libisma, di no sabi a difrenti srefi fu den leti anu nanga den kruktu anu nanga ala den meti fu den?”