Yosua teki den foto na noordsei abra
1Di kownu Yabin fu Hasor yere fa Israel ben e teki den presi abra, a seni boskopu go na kownu Yobab fu Madon nanga den kownu fu Simron nanga Aksaf. 2A seni boskopu go tu na den tra kownu na noordsei fu Kanaan ini a bergikontren, a Yordandal na zuidsei fu Kinarot, a kontren na den bergifutu nanga a kontren na a syoro krosbei fu Dor. 3A seni a boskopu moro fara gi den kownu fu den Kananitisma di ben e libi na oostsei nanga na westsei, gi a kownu fu den Amoritisma, gi a kownu fu den Hetitisma, gi a kownu fu den Perisitisma, gi a kownu fu den Yebusitisma ini den bergi nanga gi a kownu fu den Hiwitisma di ben e libi na a futu fu a Hermonbergi ini a kontren fu Mispa. 4Dan den kownu disi hari gwe nanga ala den legre fu den, bun furu fetiman. Den ben lai leki a santi na sekanti. Den ben de nanga bun furu asi nanga fetiwagi tu. 5Ala den kownu disi bondru densrefi èn den go meki a legrekampu fu den na a kriki Merom, fu feti nanga Israel.
6Dan MASRA taigi Yosua taki: “Yu no abi fu frede gi den, bika tamara a yuru disi Mi o kiri den alamala gi Israel. Dan yu mus koti a bakafututitei fu den asi fu den èn bron den fetiwagi fu den.” 7Ne Yosua nanga a heri legre fu en broko go na den tapu na a kriki fu Merom, sondro fu den ben ferwakti en. 8Dan MASRA gi den abra ini a makti fu Israel. Den Israelitisma fon den èn den lon na den baka go te na Bigi-Sidon nanga Misrefot-Maim, èn te na a dal fu Mispe na oostsei. Den feti nanga den te leki den kiri den alamala. 9Baka dati Yosua du nanga den san MASRA ben komanderi en: a koti a bakafututitei fu den asi fu den èn a bron den fetiwagi fu den.
10Di Yosua ben e drai gwe, a teki Hasor abra èn a kiri a kownu fu en. A ten dati Hasor ben de a moro prenspari foto fu ala den tra foto nanga wan kownu. 11Den kiri ala libisma di den miti ini Hasor nanga deigri. Den kiri ala sani san ben e bro. Dan Yosua meki den sutu faya gi a foto. 12Yosua ben teki ala den foto fu den kownu disi abra, makandra nanga den kownu fu den, èn a kiri den alamala nanga deigri. A kiri ala den sma soleki fa Moses, a knekti fu MASRA, ben komanderi en. 13Soso gi Hasor Yosua ben sutu faya. A no ben meki den bron den tra foto di ben de tapu den pikinpikin bergi. 14Den Israelitisma ben teki ala den gudu nanga den meti di den ben feni ini den foto dati. Ma ala libisma den kiri nanga deigri, te leki no wan sma ben de moro. No wan sani di ben e bro den ben meki tan na libi. 15Na so MASRA ben komanderi Moses, a knekti fu En, èn na so Moses ben komanderi Yosua. Yosua du ala sani so tu. A du ala sani di MASRA ben komanderi Moses.
Den presi di Yosua teki abra
16Yosua ben teki a heri kondre abra: a bergikontren, a heri Negebsabana, a heri kontren fu Gosen, a kontren na den bergifutu, a Yordandal nanga den bergi fu Israel nanga den bergifutu fu en. 17A heri presi disi ben e waka fu den Kali Bergi go na a sei fu Seir, te go miti Baal-Gad ini a Libanondal na a futu fu Hermonbergi. Yosua ben grabu ala den kownu fu den presi disi dan a kiri den. 18A feti langa nanga den kownu disi fu ben kan teki a kondre fu den abra. 19Bika no wan foto ben meki mati nanga Israel, boiti Gibeon, a foto fu den Hiwitisma. Soso nanga feti den sma fu Israel ben teki ala den tra foto abra. 20Ma na MASRA ben seti en so, taki ala den tra folku ben tranga den ati fu feti nomonomo nanga Israel. Sofasi Israel no ben abi fu sari den, ma a ben kan kiri den alamala te leki no wan sma ben de moro. Bika na dati MASRA ben komanderi Moses.
21Ini a srefi ten dati Yosua kiri den Enakitisma puru na pasi tu. Den sma dati ben libi ini a bergikontren, ini Hebron, Debir nanga Anab, nanga ini a heri bergikontren fu Yuda nanga Israel. Yosua kiri den èn a broko den foto fu den. 22No wan Enakitisma ben de moro ini a kondre fu den Israelitisma. Den ben de fu feni soso ini Gasa, Gat nanga Asdod.
23Baka di Yosua teki a heri kondre abra, soleki fa MASRA ben komanderi Moses, a gi en na den Israelitisma leki den eigi kondre. A gi ibri lo fu Israel wan pisi taki na fu den. Na so wan kba kon na a feti ini a kondre.
