Den lo di drai go baka na den tanpresi
1Dan Yosua seni kari den man fu den lo fu Ruben, Gad nanga a afu lo fu Manase. 2A taigi den taki: “Un du ala sani san Moses, a knekti fu Gado, ben komanderi unu, èn un du ala sani tu di mi ben komanderi unu. 3Ala den yari un tan fu yepi den brada fu unu, èn te tide un du fin'fini san MASRA, a Gado fu unu, komanderi unu. 4Now MASRA, a Gado fu unu, meki freide de ini a kondre gi den brada fu unu, soleki fa A ben pramisi den. Dat' meki un kan drai gwe baka now. Un kan drai go na un eigi tanpresi, na un eigi kontren, na a tra sei fu a Yordanliba, di Moses, a knekti fu Gado, ben gi unu. 5Ma un sorgu nomo taki un du fin'fini san den gebod nanga a wèt e taki di Moses, a knekti fu MASRA, ben leri unu: taki un mus lobi MASRA, a Gado fu unu, taki un mus libi soleki fa En wani, taki un mus hori den gebod fu En, taki un mus waka na En baka wawan, èn taki un mus dini en nanga un heri ati nanga un heri sili.” 6Dan Yosua blesi den man èn a seni den gwe. Dan den man drai go na den tanpresi. 7Moses ben gi afu fu a lo fu Manase wan kontren gi densrefi ini Basan. Yosua ben gi a tra afu fu a lo dati wan kontren gi densrefi na westsei fu a Yordanliba, na den tra Israelitisma. Di Yosua ben blesi den man èn seni den go na den tenti, 8a taigi den taki: “Un e drai go baka na un tanpresi nanga furu gudu, nanga bun furu meti, nanga solfru, gowtu, kopro, isri èn nanga bun furu krosi. Un prati den gudu disi di un teki fu un feyanti, nanga den sma fu a lo fu unu.” 9Dan so den lo fu Ruben, Gad nanga a afu lo fu Manase, gwe libi den tra Israelitisma drape na Silo ini Kanaan. Den drai go baka na Gilead, den eigi kontren, di MASRA ben komanderi Moses fu gi den.
10Ma di den ben doro na a syoro fu a Yordanliba, na a sei fu Kanaan ete, den bow wan bun bigi altari drape. 11Di den tra Israelitisma kisi fu yere taki den lo fu Ruben, Gad nanga a afu lo fu Manase, bow wan altari na a westsei fu a syoro fu Yordanliba, 12den meki ala den Israelitisma kon makandra na Silo fu hari go feti nanga den. 13Dan den Israelitisma seni wan grupu sma go na Gilead, na a lo fu Ruben, di fu Gad nanga a afu lo fu Manase. Den sma di den seni ben de priester Pinekas, a manpikin fu Eleasar, 14makandra nanga tin fesiman, wan fu ibri lo fu den Israelitisma. Iniwan fu den man dati ben de edeman tu fu wan famiri fu wan fu den lo fu Israel.
15Di den doro ini a kontren fu Gilead, na den lo fu Ruben, Gad nanga a afu lo fu Manase, den taigi den taki: 16“Wi e taki gi a heri folku fu MASRA. Fu sanede un no wani dini MASRA, a Gado fu Israel, moro? Fu sanede un drai un baka gi MASRA fu go bow wan altari? Bika a bow di un bow a altari e sori tak' un no wan du moro san A e taki. 17Un no mus fergiti den kruktudu fu wi na Peor nanga a bakapisi fu en di meki taki wan takru siki ben broko mindri a heri folku fu MASRA. Te leki tide un no krin wisrefi ete fu a sani dati. 18Na drai un wani drai un baka tide agen gi MASRA? Efu un no wani du tide moro san A e taki, dan tamara A o lusu a atibron fu En tapu a heri folku fu Israel. 19Efu un feni taki a kontren fu unu no krin ini Gado ai, dan un mus koti abra kon na a kondre fu MASRA, pe a tenti fu MASRA de. Dan un e kon libi na wi mindri. Ma un no kaka futu gi MASRA èn un no kaka futu gi wi, fu bow ete wan altari, boiti a altari fu MASRA, a Gado fu unu, di de kba. 20Memre san psa di Akan, a manpikin fu Serak, teki wantu sani di MASRA ben komanderi dati ben mus bron. MASRA ben lusu a atibron fu En tapu a heri folku fu Israel. A no a man dati wawan ben dede fu a kruktudu fu en.”
21Ne den sma fu den lo fu Ruben, Gad nanga a afu lo fu Manase, piki den edeman fu den lo fu Israel, taki: 22“MASRA, a Gado fu gado, MASRA, a Gado fu gado, A sabi, èn Israel o sabi tu. A no de so kwet'kweti tak' na du un no wani du a wani fu Gado moro, noso taki na dini un no wani dini MASRA moro. Efu dati de so, unu kan kiri wi tide. 23Wi no bow a altari fu di wi drai wi baka gi MASRA. Kwet'kweti. Un no bow en tu fu bron ofrandi na en tapu noso fu tyari graan-ofrandi noso freide-ofrandi na en tapu. Efu na fu dati un bow en, dan MASRA srefi kan strafu unu. 24Ma fu tru, wi du disi fu wan sani nomo. Wi du en fu di wi e frede taki bakaten den bakapikin fu unu kan aksi den di fu wi taki: ‘San unu abi fu du nanga MASRA, a Gado fu Israel? 25MASRA ben prati a kontren fu wi nanga di fu unu, leki bakapikin fu Ruben nanga Gad, nanga a Yordanliba. Unu a no sma fu MASRA.’ Sobun, un e frede taki den bakapikin fu unu o tapu den di fu wi fu dini MASRA. 26Na dat' meki un taigi makandra taki: ‘Meki un bow wan altari.’ Ma a no wan altari fu bron ofrandi noso fu srakti meti leki ofrandi. 27A mus de wan altari di de leki wan ketoigi gi wi nanga unu èn gi den bakapikin fu wi, taki wi sa dini MASRA na a tenti fu En, èn taki na drape wi sa bron ofrandi, na drape wi sa srakti meti leki ofrandi èn na drape wi sa tyari freide-ofrandi. Dan den bakapikin fu unu no o man taigi den di fu wi bakaten taki den a no sma fu MASRA. 28Efu den bakapikin fu unu sa taki a sani dati bakaten, den di fu wi kan piki den taki: ‘Luku a altari di den bigisma fu unu ben meki. Den meki en a srefi fasi leki a altari fu MASRA. Den no ben meki en fu bron meti leki ofrandi noso fu srakti meti leki ofrandi, ma leki wan ketoigi fu sori taki wi na fu MASRA tu.’ 29Trutru, a no de so kwet'kweti taki na du un no wani du moro san MASRA e taki, noso tak' na drai wi drai wi baka gi MASRA, fu di wi bow wan tra altari fu bron ofrandi, fu tyari graan-ofrandi noso fu srakti meti leki ofrandi, boiti a altari di bow kba gi MASRA, a Gado fu Israel, fesi a tenti fu En.”
30Priester Pinekas nanga den tin fesiman fu a folku, di ben de edeman fu den lo fu den Israelitisma tu, yere san den sma fu den lo fu Ruben, Gad nanga Manase taki, èn den ati ben sidon. 31Ne priester Pinekas, a manpikin fu Eleasar, taigi den taki: “Now wi alamala sabi taki MASRA de nanga unu, bika a no de so tak' na dini un no wani dini MASRA moro. Nanga dati un kibri Israel fu MASRA no strafu en.” 32Baka dati priester Pinekas, a manpikin fu Eleasar, nanga den edeman prati pasi nanga den sma fu Ruben nanga Gad ini Gilead. Den drai go na den tra Israelitisma ini Kanaan èn den ferteri den fa sani waka. 33A ati fu den Israelitisma dati srefi ben sidon èn den prijse Gado. Den no hari go feti moro nanga den lo fu Ruben nanga Gad, fu go broko a kondre pe den ben e libi.
34Den sma fu den lo fu Ruben nanga Gad kari a altari: “Ketoigi.” Bika den taki: “A de wan ketoigi gi wi nanga unu, taki MASRA na a Gado fu unu.”
