Yosua 4

₁Baka di ala den Israelitisma ben koti a Yordanliba abra, MASRA taigi Yosua taki: ₂“Teki twarfu man fu a folku, wan fu ibri lo. ₃Komanderi den tak' ibriwan fu den mus go teki wan ston na mindrisei fu a Yordanliba, leti pe den priester tnapu. Den mus tyari den go poti na a presi pe un o meki un kampu fu psa a neti.” ₄Dan Yosua kari twarfu man di a ben teki puru na mindri den Israelitisma, wan fu ibri lo, ₅dan a taigi den taki: “Un koti go baka na mindrisei fu a Yordanliba, fesi a kisi fu MASRA, a Gado fu unu. Dan iniwan fu unu e teki wan ston poti tapu en skowru, wan ston gi ibri lo fu Israel. ₆Den ston disi sa de wan marki fu memre unu san Gado ben du. Te den pikin fu unu sa aksi un bakaten san den ston wan taki, ₇un sa ferteri den tak' a watra fu a Yordanliba ben tapu fu lon fu di a kisi fu a ferbontu fu MASRA ben drape. Ferteri den taki di den priester go ini a Yordanliba nanga a kisi, a watra tapu fu lon, èn dati den ston disi na fu memre den Israelitisma ala ten fu san psa drape.” ₈Den man du san Yosua komanderi den. Den go puru twarfu ston na mindrisei fu a Yordanliba, soleki fa MASRA ben taigi Yosua. Wan gi ibri lo. Dan den tyari den go poti na a presi pe den ben meki den kampu fu psa a neti. ₉Yosua meki den poti twarfu ston tnapu tu na mindrisei fu a Yordanliba, leti pe den priester ben tnapu di ben e syow a kisi fu a ferbontu. Den ston dati de drape te tide. ₁₀Den priester di ben e syow a kisi, ben tan tnapu na mindrisei fu a Yordanliba te leki ala den sani du di MASRA ben taigi Yosua fu taigi a folku. Moses srefi ben komanderi Yosua den sani dati kba. Dan a folku koti a liba abra es'esi. ₁₁Di a heri folku ben de na abrasei, den priester koti abra tu nanga a kisi fu MASRA, dan den go waka fesi a folku baka. ₁₂Soleki fa Moses ben komanderi, den lo fu Ruben, fu Gad nanga a afu lo fu Manase ben koti abra nanga ala den fetisani fu den èn den ben e waka na fesi den tra Israelitisma. ₁₃Sowan fotenti dusun man nanga ala den fetisani ben hari go na MASRA fesi. Den koti abra go feti na den bigi opo wei fu Yeriko. ₁₄A dei dati MASRA meki Yosua kisi grani na ala den Israelitisma èn den ben e lespeki en leki fa den ben lespeki Moses en heri libi langa.

₁₅Dan MASRA taigi Yosua taki: ₁₆“Komanderi den priester di e syow a kisi nanga den wortu di mus memre unu na san Mi ben taki, fu den kren kmoto ini a Yordanliba.” ₁₇Dan Yosua komanderi den priester fu kren kmoto ini a Yordanliba. ₁₈A srefi momenti di den priester, di ben e syow a kisi fu a ferbontu fu MASRA, kren kmoto na mindrisei fu a Yordanliba kon na syoro, a watra fu a liba bigin lon baka èn a ben abra baka kon na syoro leki bifo. ₁₉Tapu a di fu tin dei fu a fosi mun, a folku koti a Yordanliba abra. Dan den meki den kampu na Gilgal, oostsei fu Yeriko. ₂₀Drape na Gilgal Yosua poti den twarfu ston tnapu di den man ben puru ini a Yordanliba. ₂₁Dan a taigi den Israelitisma taki: “Te den pikin fu unu sa aksi un bakaten san den ston disi wan taki, ₂₂un mus taigi den taki: ‘Den ston disi na fu memre unu taki na dyaso Israel koti a Yordanliba abra tapu drei gron. ₂₃Bika MASRA, a Gado fu unu, drei a Yordanliba gi unu te leki un koti abra, neleki fa MASRA, a Gado fu unu, ben du na a Riet Se, di A ben drei gi unu te leki un ben koti en abra. ₂₄Dan ala folku fu grontapu sa kon sabi a makti fu MASRA, èn den sa lespeki MASRA, a Gado fu unu, ala ten.’ ”