Yosua 6

₆Dan Yosua, a manpikin fu Nun, kari den priester èn a taigi den taki: “Un opo a kisi fu a ferbontu poti tapu un skowru èn seibi fu unu mus waka nanga wan tutu fu wan man skapu fesi a kisi fu MASRA.” ₇Dan Yosua taigi a folku taki: “Un hari go na a foto èn un waka lontu en. Wantu fu unu mus waka nanga fetisani fesi a kisi fu MASRA” ₈Fa Yosua kba taki nanga a folku, na so den seibi priester di ben mus tyari den seibi tutu fu den man skapu bigin waka na MASRA fesi. Den ben e bro tapu den tutu èn a kisi fu a ferbontu ben e kon na den baka. ₉Den man nanga den fetisani ben e waka fesi den priester di ben e bro tapu den tutu fu den man skapu. Den tra sma ben e waka baka a kisi. Den priester ben e tan bro tapu den tutu. ₁₀Ma Yosua ben komanderi a folku taki: “Un no mus meki babari, no wan sten mus de fu yere. Un mus tan tiri te leki a dei di mi o komanderi un taki: Un bari! Dan fosi un mus bari.” ₁₁Dan Yosua meki den waka wan leisi lontu a foto nanga a kisi fu MASRA. Baka dati den drai go baka na den kampu èn den psa a neti drape.

₁₂A tra mamanten Yosua opo frukufruku èn den priester poti a kisi fu MASRA tapu den skowru. ₁₃Den seibi priester nanga den tutu bigin waka fesi a kisi fu MASRA èn den ben e bro den tutu. Den man nanga den fetisani ben e waka fesi den priester èn ala den tra sma ben e waka baka a kisi fu MASRA. Den priester ben e bro dorodoro tapu den tutu. ₁₄Tapu a di fu tu dei den waka wan leisi baka lontu a foto dan den drai go baka na den kampu. Na so den du siksi dei.

₁₅Tapu a di fu seibi dei den alamala opo frukufruku, di dei broko, dan den go waka a srefi fasi lontu a foto leki den tra dei, ma a dei dati den waka seibi leisi. Soso tapu a dei dati den waka seibi leisi lontu a foto. ₁₆Di den waka lontu a foto fu a di fu seibi leisi, den priester bro tapu den tutu, èn Yosua bari gi a folku taki: “Un bari, bika MASRA gi un a foto! ₁₇Un mus kiri èn pori ala sani ini a foto gi MASRA. Soso a motyo Rakab nanga ala den sma di de ini a oso fu en sa tan na libi. Bika a ben kibri den man di un ben seni fu go luku a kondre. ₁₈Ma un no mus fergiti tak' un mus kiri èn pori ala tra sani. Un no mus teki noti fu den sani di un ben mus kiri noso pori. Efu un du dati un o tyari kiri nanga pori kon ini a kampu fu Israel èn poti unsrefi ini bigi problema. ₁₉Ala solfru nanga gowtu, nanga ala den kopro nanga isri sani sa poti aparti gi MASRA. Den sa poti makandra nanga den tra gudu fu MASRA.”

₂₀Di den priester bro den tutu a heri folku bari bun tranga. Ne a skotu fu a foto fadon dan ala sma kren go ini a foto fu a presi pe den ben tnapu èn den teki a foto abra. ₂₁Den kiri ala sani san ben de ini a foto. Den kiri man nanga uma, yongu sma nanga owru sma, kaw, skapu nanga buriki nanga deigri. ₂₂Ma Yosua taigi den tu man di ben go luku kibrikibri fa sani ben e waka ini a kondre, taki: “Un go na a oso fu a motyo, dan un tyari en nanga ala den sma fu en kon na dorosei fu a foto, soleki fa un ben sweri gi en.” ₂₃Ne den tu man go ini a oso dan den tyari Rakab, en p'pa nanga en m'ma, den brada fu en nanga den tra famiri fu en kon na dorosei. Den tyari a heri famiri fu en kon na dorosei fu a foto dan den gi den wan tanpresi dorosei fu a kampu fu Israel. ₂₄Den Israelitisma sutu faya gi a heri foto nanga ala san ben de na ini. Soso a solfru nanga a gowtu, den kopro nanga den isri sani den tyari go poti na den tra gudu fu MASRA. ₂₅Na so Yosua meki a motyo Rakab, en famiri nanga ala sma fu en tan na libi. Den bakapikin fu en tan libi mindri den Israelitisma te leki a dei fu tide. Bika Rakab ben kibri den man di Yosua ben seni go fu luku fa sani ben e waka na ini Yeriko.

₂₆Ini a srefi ten dati Yosua sweri taki: “A fluku fu MASRA sa kon tapu a sma di sa opo fu bow a foto Yeriko baka. A sma dati sa lasi a fosi manpikin fu en te a e seti a fundamenti, èn a sa lasi a laste manpikin fu en te a sa anga den doro fu a foto.” ₂₇MASRA ben de nanga Yosua èn ala sma ini a kondre ben taki fu den sani di a ben e du.