A di fu tu singi: MASRA, e strafu Yerusalem
1Tye, Masra e tyari dungru wolku kon tapu Sion na ini En atibron.
A meki Sion fadon dipi,
a lasi ala a moi fu en.
A ten di A ben o strafu Yerusalem
A no prakseri moro dati na En futubangi.
2Sondro wan dropu sari-ati Masra broko den foto fu Israel.
Ini a faya atibron fu En A naki den tranga foto fu Yuda broko.
A broko a kondre,
A broko den edeman saka.
3Ini a faya atibron fu En A broko a makti fu Israel.
Di a feyanti fu den doro A hari a anu fu En puru.
A rigeri ini Israel leki wan faya di e bron ala san kon na en pasi.
4A hari a bo fu En span gi unu nanga En leti-anu, leki wan feyanti.
A kiri ala sma di un ben lobi sote.
A kanti a hebi atibron fu En leki faya tapu Sion.
5Masra tron a feyanti di swari Israel.
A broko ala den kownu-oso fu en trowe,
A broko den tranga foto fu en pis'pisi te na gron.
Soso soktu nanga dyeme de fu yere now ini Yuda.
6A broko a tenti fu En trowe,
leki a skotu fu wan pranigron,
A broko a presi pe un ben kon makandra.
MASRA meki un fergiti den fesadei nanga a sabatdei ini Sion.
Ini a faya atibron fu En A poti kownu nanga priester na wan sei.
7MASRA no wani sabi not'noti moro fu a altari fu En,
a drai En baka gi a santa presi fu En tu.
A gi feyanti a okasi fu naki den skotu fu en broko.
Den prisiri ini a oso fu MASRA leki na wan fesa den ben de.
8MASRA teki a besroiti fu broko den skotu fu Sion pis'pisi.
A marki den fosi luku, dan a teki a besroiti fu broko den trowe.
a ben de wan sari sani fu si fa den broko fadon na gron.
9Den bigi doro didon ini a doti,
A naki den greni broko nanga san den ben sroto.
A kownu nanga den tra edeman den na mindri dorosei folku.
Priester no de moro di e leri den sma a wèt fu Gado.
MASRA no e sori den profeiti not'noti moro tu.
10Den edeman fu Sion sidon tiri na gron.
Den fringi asisi na tapu den ede èn den weri den lowkrosi
Den yongu uma fu Yerusalem saka den ede go na gron.
11Soso krei meki den ai fu mi kon sweri srefsrefi,
mi heri inisei e drai.
Mi ati e brudu, soso fu sari:
bika a feyanti e kiri a lobi pipel fu mi,
pikin nanga nyunyun pikin srefi e dede fu angri
na tapu den pren fu a foto.
12Den e aksi den m'ma taki:
“Gi un wan sani fu nyan,
gi wan sani fu dringi.”
Den e dede gwe na tapu den strati fu a foto
leki srudati di kisi bun mankeri.
Den e dede gwe tapu a anu fu den m'ma.
13Yerusalem di mi lobi, mi no sabi moro san mi mus taki.
Mi no sabi moro leki san mi mus si yu.
Sortu eksempre mi kan teki fu trowstu yu, Sion
Den soro fu yu bigi, den bradi leki a se
No wan sma no man dresi yu.
14Na lei den profeiti fu yu ben lei
nanga den sani di den taki Gado meki den si.
A moro betre den ben tyari den kruktudu fu yu kon na krin,
dan a bigi ogri disi no ben abi fu miti yu.
Den boskopu di den taki tak' na Gado gi den, ben de soso lei,
sani fu bedrigi unu.
15Ala sma di e hari psa e lafu te den e luku yu,
den e skreki fu si san miti yu èn den e seki den ede
fu si fa Yerusalem kon tan.
Den e taki: “Na a foto disi den ben kari a foto di moi psa marki,
a foto di ben de wan prisiri gi heri grontapu.”
16Ala den feyanti fu yu e kosi yu trangatranga,
Den skreki fu si san miti yu èn den e piri den tifi,
den e teki yu meki spotu,
den e taki: “Un broko en!
Iya, na tapu a dei disi un ben wakti,
un ben e luku fu en,
èn un e si en now.”
17MASRA du san A ben poti fu du.
A meki psa san A ben besroiti langa ten kba fu du:
fu ben broko Yerusalem sondro wan dropu sari-ati.
A meki a feyanti prisiri fu di a wini yu,
a gi a feyanti fu yu makti.
18Un krei trangatranga gi MASRA.
Skotu fu Sion,
un meki den watra-ai fu unu lon leki wan liba,
dei nanga neti.
No tapu fu du en. No meki yu ai bro.
19Un opo, un dyeme heri neti fesi Masra.
Un taigi En ala san de na tapu un ati.
Un opo un anu go na loktu
fu A kan kibri den pikin fu unu fu den no dede,
den pikin di e dede fu angri tapu a uku fu ibri strati.
20Tye MASRA luku,
suma Yu pina so kba?
Na nyan m'ma mus nyan den eigi pikin,
den pikin di den lobi?
Na kiri den mus kiri den priester nanga profeiti
ini a santa presi fu MASRA?
21Den dedeskin fu pikin nanga granisma didon na tapu strati.
A deigri fu a feyanti kiri den yongu uma nanga yonkuman fu mi.
Di a ten fu Yu doro fu strafu, Yu kiri den sondro wan dropu sari-ati.
22Yu kari den moro ogri-ati feyanti fu mi kon na wan
leki na gi wan fesa.
Tapu a dei di MASRA e strafu,
no wan sma kan kmopo gi a strafu,
no wan sma kan tan na libi tu.
A feyanti fu mi kiri den pikin fu mi
di mi sorgu te leki den kon bigi.
