A di fu feifi singi: Wan begi fu Masra sori En sari-ati
1Tye MASRA, prakseri san miti unu, luku, èn si a syen di kisi unu:
2A kondre fu unu kon ini anu fu doroseisma,
den oso fu unu ini anu fu sma fu tra folku.
3Un tron pikin di no abi p'pa nanga m'ma moro,
den m'ma fu unu tron uma di masra dede gwe libi den.
4Un mus pai fu dringi un eigi watra, un mus bai un eigi udu.
5Un feyanti e kon fayafaya na un baka,
un weri, ma den no e meki un teki bro.
6Un suku yepi na Egipte, begi Asiria fu gi un nyanyan.
7Ma na den afo fu unu ben sondu, den no de moro,
ma na unu e tyari a bakapisi fu den kruktudu fu den.
8Den wan di e tiri wi srefi na srafu,
ma un no abi no wan sma fu puru wi na ini den anu.
9Te un e go koti un nyanyan un kan lasi un libi,
bika fufuruman nanga deigri de ini a sabana.
10Angri e meki korsu priti un skin, a buba fu un faya leki wan onfu.
11Nanga tranga a feyanti sribi nanga den uma ini Sion,
nanga den yongu uma ini Yuda.
12Den anga den tiriman fu unu, den edeman den no teri srefsrefi.
13Yonkuman mus drai den hebi ston fu den miri,
yongu boi e fadon nanga udu di den mus syow.
14Den edeman no e sidon moro na a bigi doro pe den ben koti krutu,
yongusma tapu fu prei instrumenti.
15No wan prisiri de moro ini un ati, a dansi fu wi tron sari now.
16Un lasi ala grani fu wi, a kba gi unu, bika un sondu.
17Un ati firi siki, un ai dungru:
18bika a bergi Sion tron wan broko pranasi,
na soso krab'dagu e waka lontu drape.
19Ma Yu, MASRA, e rigeri fu têgo, Yu e tan kownu fu ala ten.
20Fu sanede Yu no wani prakseri un srefsrefi moro?
Fu sanede Yu gwe libi unu fu no drai kon noiti moro?
21Tyari un kon baka na Yu MASRA, meki un drai kon baka.
Meki un de baka leki fa un ben de bifo.
22No poti un fu têgo na wan sei, meki wan kba kon na a atibron fu Yu.
