A freide di de fu kon
1Ma a sa de so taki na a kba fu a ten
a bergi tapu san a oso fu MASRA tnapu,
sa tnapu sondro fu seki,
leki a moro hei bergi.
A sa hei moro ala den tra bergi.
Ala folku sa hari go drape.
2Sma fu furu kondre o hari go drape. Den o taki:
“Kon meki wi hari go na a bergi fu MASRA,
na a oso fu a Gado fu Yakob,
meki A leri wi fa A wani taki wi mus libi,
fu wi kan waka tapu a pasi fu En.”
Bika na fu Sion a wèt fu En o kmoto,
na fu Yerusalem a wortu fu MASRA o kmoto.
3A sa koti krutu mindri furu folku,
taigi bigi kondre farawe suma abi leti.
Dan den sa teki den deigri èn meki isri fu en fu drai a gron.
Den sa teki den lansri meki babun-nefi.
No wan kondre o hari deigri gi wan trawan,
den no sa sabi moro san na feti.
4Iniwan fu den sa sidon na ondro en droifibon
nanga en figabon
sondro fu wan sma meki den skreki.
Bika MASRA fu ala sani taki so.
5Ibri folku e waka na baka a gado fu den,
ma wi e waka ini a nen fu MASRA, wi Gado,
fu têgo èn ala ten.
6Na so MASRA taki:
A pisten dati Mi sa tyari ala den malengriwan kon na wan.
Den wan di ben panya go na ala sei
Mi sa tyari kon makandra.
Den wan di Mi ben du ogri,
Mi o moksi kon na wan.
7Mi sa kibri den malengriwan di tan abra,
meki wan tranga folku fu den wan di den ben yagi gwe.
Dan MASRA sa de den kownu tapu a bergi Sion,
bigin fu now èn fu têgo.
8Migdal-Eder, bergi fu Sion,
yu sa kisi a makti baka leki bifo,
Yerusalem sa tron kownu baka.
9Fu sanede yu e bari so dan?
Na fu di yu no abi kownu moro?
Na fu di a sma di e gi yu rai dede?
Na dati e meki yu krempi so fu pen,
leki te wan umasma mus meki wan pikin?
10Krempi fu pen, bari,
Sion, bari leki wan umasma di e meki wan pikin.
Bika yu o abi fu kmoto ini a foto
fu go tan ini a wei.
Yu o go na Babel.
Drape den o ferlusu yu.
Drape MASRA o puru yu na ini a anu fu yu feyanti.
11Nownow furu folku moksi densrefi fu feti nanga yu.
Den e taki: “Meki den du sani nanga en di no fiti
meki un switi un ai.”
12Ma den no sabi san MASRA e prakseri.
Den no e ferstan notinoti fu a besroiti fu En,
taki A tyari den kon na wan
leki fa den e tyari a graan ini bosu kon na wan
fu naki den ai puru na den tiki.
13Sion opo, dan yu e masi den.
Mi o gi yu wan isri tutu
èn den futu fu yu o de fu kopro.
Yu o masi furu folku
èn den sani di den ben puru na sma anu
un mus teki baka èn poti den aparti gi MASRA.
Ala a gudu fu den o de fu Masra fu heri grontapu.
14Now yu kan kot'koti yusrefi,
feyanti lontu a foto fu alasei.
Den naki a tiriman fu Israel
nanga wan tiki na en seifesi.
