Gado e krutu Israel
1Yere san MASRA e taki:
Opo, krutu den fesi den bergi
meki den pikin bergi de ketoigi fu en.
2Bergi, un yere gi san MASRA e krutu den,
fundamenti fu grontapu, un di no e seki, un arki.
Bika MASRA e krutu En folku,
A e tyari Israel go na krutu.
3“Mi pipel, san Mi du un so?
Sortu hebi Mi poti so na un tapu?
Un piki Mi.
4Mi tyari un kmoto fu Egipte,
ferlusu unu fu a katibo.
Mi seni Moses, Aaron nanga Miryam fu tiri unu.
5Mi pipel, prakseri san Balak, a kownu fu Moab, ben wani fu du.
Memre san Bileam, a manpikin fu Beor, piki en.
Memre tu san psa fu Sitim go miti Gilgal.
Dan unsrefi san mus fu taki tak' MASRA ben du un bun.”
6“San Mi sa tyari go gi MASRA,
te mi e go fu boigi gi a Gado fu heimel?
San mi sa tyari go gi En?
Meti fu bron leki ofrandi?
noso pikin kaw fu wan yari?
7Yu prakseri taki MASRA sa breiti nanga dusun man skapu?
noso nanga bun furu oli?
Na gi mi mus gi mi fosi pikin gi den ogri di mi du?
a pikin fu mi bere gi a sondu libi fu mi?”
8A meki yu, leki libisma, kon sabi san bun
èn san MASRA e ferwakti fu yu.
Dati na noti moro leki fu du bun,
fu lobi Gado nanga libisma,
èn fu du Gado wani nanga sakafasi.
9Arki, MASRA e bari taigi a foto taki: na wan bun sani fu lespeki a nen fu MASRA. Arki a wipi nanga a sma di seni en kon. 10Den oso fu den sma di no e dini Gado, abi gudu di den kisi tapu wan kruktu fasi nanga wan falsi wegi di Mi fluku. 11Yu denki taki wan falsi wegi nanga wan saka nanga falsi wegiston bun ini Mi ai? 12Den gudusma fu a foto furu nanga ogri. Den sma fu a foto e bedrigi. Soso lei e kmoto na ini den mofo. 13Dat' meki Mi naki unu nanga siki. Fu un sondu ede Mi e broko unu. 14Un o nyan, ma nyanyan no o sari unu. Angri o tan kiri unu. Un o tyari sani go kibri, ma a no o tan fu unu. Èn efu yu ben kibri wan sani, Mi o meki un lasi en te un e feti nanga tra folku. 15Un o sai, ma un no o koti nyanyan. Un o masi oleif puru oli, ma unsrefi no o lobi a oli gi un skin. Un o masi droifi tron win, ma unsrefi no o dringi en. 16Bika un e tan du den sani fu Omri nanga den sani di a famiri fu Akab ben e du. Un e tan du den srefi sani di den ben e du. Fu dat'ede Mi o meki taki sma o skreki te den si san psa nanga a foto fu unu. Den o teki unu fu a foto leki spot'popki. Tapu a fasi disi un o tyari a syen fu Mi folku.
