Nomru 11

₁A folku ben e krutukrutu èn disi no ben de wan bun sani na a yesi fu MASRA. MASRA ben yere san den ben taki èn a ben gi En atibron. Ne a faya fu MASRA bigin bron na den mindri. A faya bigin bron na seisei fu a kampu. ₂Dan a folku bari suku Moses. Ne Moses begi MASRA dan a faya dede. ₃Na fu dat'ede den e kari a presi Tabera, fu di a faya fu MASRA ben bron na den mindri.

₄Wan grupu fu ala sortu sma fu tra folku ben de mindri den Israelitisma. Nyanyan no ben sari den sma disi. So den Israelitisma srefi ben e bigin knor'knoru. Den taki: “Suma o gi wi meti fu nyan? ₅Wi e prakseri a fisi di wi ben e nyan fu soso na ini Egipte. Den komkomro, den watramun, a supuwiwiri, a ayun nanga a konofroku. ₆Ma now wi e drei gwe. Not'noti no dyaso. Soso a mana disi wi e si.” ₇A mana ben gersi koriandersiri, ma a ben abi a kloru fu balsemhars. ₈A folku ben e panya go na alasei fu suku a mana. Den ben e mara en ini pikin miri noso den ben stampu en na ini mata. Den ben e bori en na ini patu èn den ben e meki kuku fu en. Den kuku ben e tesi leki den ben baka na ini oli. ₉Ala neti te a dow ben e fadon tapu a kampu, a mana ben e fadon tapu a kampu tu.

₁₀Moses ben e yere fa a heri folku, ala den lo, ben e krutukrutu na mofodoro fu den tenti èn a lasi ati di MASRA ati bron srefsrefi. ₁₁Ne a aksi MASRA taki: “Fu sanede Yu e libi so nanga mi? Fu sanede Yu no sori Yu knekti Yu bun-ati. Fu sanede Yu poti a lai fu a heri folku disi na tapu mi skowru? ₁₂A no mi ben tyari a folku disi ini mi bere. A no mi tyari den kon na grontapu tu. Dan fa Yu kan taigi mi taki: ‘Tyari den tapu yu anu. Leki fa den e tyari nyunyun pikin tapu den anu, na so yu mus tyari den go na a kondre di Mi sweri gi den afo fu yu taki Mi o gi den.’ ₁₃Pe mi o feni meti fu gi a heri folku disi? Den e krutu gi mi taki: ‘Gi unu meti fu nyan!’ ₁₄Mi wawan no man teki a sorgu fu a heri folku disi na mi tapu. A hebi tumsi gi mi. ₁₅Efu na so Yu wan du nanga mi dan sori mi Yu bun-ati, kiri mi, dan mi no sa pina moro langa.”

₁₆Ne MASRA piki Moses taki: “Teki seibitenti fesiman fu Israel. Den mus de man fu san yu sabi taki den na fesiman nanga tiriman fu a folku. Meki den kon tnapu na yu fesi na a tenti pe yu kan miti nanga Gado. ₁₇Dan Mi sa saka kon fu taki drape nanga yu. Mi sa teki wan pisi fu a Yeye di de na yu tapu poti na den tapu. So den sa yepi yu tyari a lai fu a folku dan yu wawan no abi fu tyari en. ₁₈Ma yu mus taigi a folku taki: ‘Un mus sorgu taki tamara mamanten un santa. Dan un o nyan meti. Bika un krutu gi MASRA taki: Suma sa gi un meti fu nyan? Un ben abi en so bun na ini Egipte. MASRA o gi unu meti fu nyan. Un o nyan meti! ₁₉A no wan noso tu dei nomo. A no feifi, tin noso tutenti dei nomo. ₂₀Ma wan heri mun langa te leki a e kmoto na ini un noso èn un e fuga fu en. Bika un si MASRA di de na un mindri leki noti èn un krutu taki un no sabi fu sanede un kmoto na ini Egipte.’ ” ₂₁Ne Moses taki: “Mi de dyaso nanga wan folku fu siksi hondro dusun sma. Dan fa Yu o man gi den meti fu nyan wan heri mun langa? ₂₂Pe wi o feni someni skapu nanga kaw fu srakti gi den te leki den no man nyan moro? Srefi efu wi ben fanga ala den fisi fu a se gi den, a no bo sari den.” ₂₃Ma MASRA piki Moses taki: “Yu denki taki disi na wan sani san Mi no man du? Mi sa meki yu si taki Mi o du san Mi taigi yu.”

₂₄Moses go na dorosei dan a taigi a folku san MASRA ben taki. Baka dati a teki seibitenti fesiman fu a folku, dan a meki den tnapu lontu a tenti. ₂₅Dan MASRA saka kon ini a wolku. A taki nanga Moses èn A teki wan pisi fu a Yeye di ben de na en tapu poti tapu den seibitenti fesiman. Di a Yeye ben de na den tapu den ben man taki san Gado ben e gi den fu taki. Baka dati den no ben man du disi moro. ₂₆Tu man, di ben nen Eldad nanga Medad, ben tan na baka ini a kampu. Den nen ben skrifi tu ma den no ben go na a tenti fu Gado. Di a Yeye kon na den tapu den bigin taki ini a kampu san Gado ben gi den fu taki. ₂₇Dan wan yonkuman lon go taigi Moses taki: “Eldad nanga Medad e taki san Gado e gi den fu taki ini a kampu.” ₂₈Ne Yosua, a manpikin fu Nun, di ben de a knekti fu Moses sensi di a ben yongu, taki: “Mi masra Moses, tapu den fu den no du dati.” ₂₉Ma Moses piki en taki: “Na dyompo yu wan dyompo gi mi? Mi winsi taki MASRA ben poti En Yeye tapu ala sma, meki a heri folku fu MASRA ben de profeiti.” ₃₀Di Moses taki dati a drai go baka na a kampu nanga den fesiman fu Israel.

₃₁Dan MASRA meki wan winti bigin wai. A winti ben wai fowru fu a se kon trowe tapu a kampu. Den ben didon alasei lontu a kampu tapu makandra, wan meter hei. Efu yu ben waka wan dei langa kmoto fu a kampu yu ben feni den ete. ₃₂Ne a folku bigin piki den fowru. A heri dei, a heri neti nanga a tamara mamanten fu en. A sma di ben piki a moro pikinso, ben piki sowan tu dusun kilo. Den ben poti den lontu a heri kampu fu drei. ₃₃Ma leki fa den ben poti a meti ini den mofo, fosi den kaw en srefi, MASRA lusu En atibron tapu folku èn A kiri wan lo fu den. ₃₄Dat' meki den e kari a presi dati Kibrot-Hatawa, fu di na drape den beri den sma di ben feni taki nyanyan no ben sari den.

₃₅Fu Kibrot-Hatawa a folku hari go na Haserot. Dan den tan wan pisten na Haserot.