1Dan Bileam taigi Balak taki: “Bow seibi altari gi mi dyaso. Meki seibi kaw nanga seibi man skapu klari tu leki ofrandi.” 2Balak du den sani leki fa Bileam ben taigi en fu du. Dan Balak nanga Bileam tyari wan kaw nanga wan man skapu leki ofrandi tapu ala altari. 3Baka dati Bileam taigi Balak taki: “Tan tnapu dyaso na den ofrandi di yu bron. Mi sa go moro fara. Kande MASRA sa kon na mi. Awinsi sortu wortu A gi mi fu taki, na dati mi o taigi yu.” Dan Bileam kren go tapu wan pikin bergi pe noti ben e gro. 4Drape Gado miti nanga Bileam dan Bileam taigi en taki: “Mi meki den seibi altari klari. Tapu ibriwan fu den mi tyari wan kaw nanga wan man skapu leki ofrandi.” 5Dan MASRA taigi Bileam san a ben mus taki. A taigi en taki: “Drai go baka na Balak dan yu e taigi en san Mi taki.” 6Di Bileam drai go baka, Balak ben tnapu ete na den ofrandi di ben bron. En nanga ala den fesiman fu Moab. 7Ne Bileam gi den a leri disi. A taki:“Balak seni teki mi fu Aram,
a kownu fu Moab kari mi fu den bergi na oostsei.
A taki: ‘kon fluku Yakob gi mi,
kon winsi ogri gi Israel.’
8Ma fa mi kan fluku a sma di Gado no fluku?
Fa mi kan winsi ogri gi a sma efu MASRA no winsi ogri gi en?
9Fu a bergiston mi kan si en,
fu a hei presi mi e luku na den tapu.
Luku, wan folku di e libi en wawan,
di no e moksi nanga tra folku.
10Suma man teri a bigi grupu fu Yakob?
Suma man taki omeni den ipi ipi fu Israel de?
Mi e winsi taki mi ben kan dede leki den,
taki mi libi ben kan kon na wan kba leki di fu den.”
11Dan Balak taigi Bileam taki: “San yu e du? Mi seni kari yu fu fluku den feyanti fu mi, ma luku yu e blesi den prefu yu fluku den.” 12Ne Bileam piki en taki: “Mi taki finifini san MASRA taigi mi fu taki.”
13Ma Balak taigi Bileam taki: “Kon meki wi go na wan tra presi, fu pe yu kan si a folku. Dyaso yu e si wan pikin pisi nomo fu a folku. Yu no e si den alamala. Drape yu mus fluku den gi mi.” 14Dan Balak tyari Bileam go na loktu tapu a Pisgabergi, na wan bigi opo wei di den e kari Sofim. Drape a bow seibi altari dan a tyari wan kaw nanga wan man skapu tapu ibri altari leki ofrandi. 15Baka dati Bileam taigi Balak taki: “Tan tnapu dyaso na den ofrandi di yu bron. Mi o go pikinso moro fara fu abi wan miti nanga Gado.” 16Dan MASRA miti nanga Bileam èn A taigi en san a ben mus taki. A taigi en taki: “Drai go baka na Balak, dan yu e taigi en san Mi taki.” 17Di Bileam drai go baka, Balak ben tnapu drape ete pe a ben bron den ofrandi. En nanga den fesiman fu Moab. Ne Balak aksi en taki: “San MASRA taigi yu?” 18Dan Bileam taki a san disi:
“Balak, opo, dan yu e arki!
Manpikin fu Sipor, opo yu yesi.
19Gado no e lei leki wan libisma.
A no e kenki prakseri tu leki wan libismapikin.
A no e taki, dan A no e du.
A no e gi en wortu, dan A no e meki a sani psa.
20Luku, A komanderi mi fu mi blesi,
èn efu A wan blesi, dan mi no o man tapu dati.
21No wan ogri no de fu si di o miti Yakob,
no wan ongoluku na ini Israel.
MASRA, en Gado, de nanga en.
Den e prisiri fu di den Kownu de nanga den.
22Gado di tyari den kmoto na ini Egipte,
de leki den tutu fu wan werder kaw gi den.
23No wan fluku no e wroko tapu Yakob.
Den no man taki mofo fu sani miti Israel.
Now sma o taki san Gado du gi Yakob èn gi Israel.
24Luku, wan folku opo leki wan lew,
leki wan lew a opo tnapu.
A no e go didon fosi a nyan san a fanga,
fosi a dringi a brudu fu san a kiri.”
25Dan Balak taigi Bileam taki: “Efu yu no wani fluku den, no blesi den tu.” 26Ma Bileam piki en taki: “Mi taigi yu taki mi sa du ala sani san MASRA taigi mi fu taki.”
27Ne Balak taigi Bileam taki: “Kon. Mi sa tyari yu go na wan tra presi. Kande a sa bun ini Gado ai efu yu fluku den gi mi fu drape.” 28Dan Balak tyari Bileam go te na loktu fu a Peorbergi. Fu drape yu ben man si a heri sabana. 29Dan Bileam taigi Balak taki: “Bow seibi altari dyaso gi mi, dan yu e meki seibi kaw nanga seibi man skapu klari leki ofrandi.” 30Balak du san Bileam taigi en fu du. A tyari wan kaw nanga wan man skapu tapu ibri altari leki ofrandi.
