Den sani di o miti Edom
1Den sani di Gado meki Obadya si.
Na disi MASRA taki tak' o psa nanga Edom. Wi kisi a boskopu fu MASRA èn a seni wan boskopuman go na ala folku fu taki: “Kon meki wi hari go feti nanga den.”
2Arki, Mi meki un kon swaki,
ala sma o si unu fu noti.
3Yu ben denki tumsi bigi fu yusrefi
èn na dati kori yu.
Fu di yu e libi hei ini den bergi-olo,
ini yu oso di de bun hei,
meki yu e taki: Suma o man saka mi kon na gron?
4Awinsi yu ben meki yu nesi so hei leki den tingifowru,
awinsi yu ben meki en mindri den stari srefi,
fu te drape Mi o hari yu kon na gron,
na so MASRA taki.
5Te fufuruman e kon,
te abani broko kon ini yu oso te neti
den e teki soso san den wani.
Ma fu yu den o fufuru ala sani tyari gwe.
Srefi den sma di e piki lepi droifi
e libi wantu droifi na den bon.
6Ma gi yu den no o libi not'noti na baka,
srefi den gudu di yu ben kibri den o feni tyari gwe.
7Den sma nanga san yu ben e wroko makandra
o yagi yu puru ini yu eigi kondre.
Den o bedrigi yu,
yu eigi mati o broko yu makti.
Sma nanga san yu ben e nyan makandra o kori yu.
Pe a koni fu yu go?
8Na so MASRA taki: A dei e kon taki Mi o kiri ala koniman na ini Edom. No wan sma nanga ferstan o de moro tapu den bergi fu Esau. 9Den dyadya fetiman fu Teman o skreki taki den no o sabi san fu du. Ala sma di e tan tapu den bergi fu Esau sa dede. 10Yu sa kisi syen èn den o figi yu puru na pasi fu a ogri di yu du nanga yu brada Yakob.
11Bika a ten di den feyanti broko go ini Yerusalem, di doroseisma ben e srepi den srudati fu en tyari gwe èn di den ben e fringi lot fu prati a gudu fu den, a ten dati yu ben tnapu e luku èn yu ben e meki leki wan fu den. 12Yu no ben mus firi switi a dei di yu brada ben de ini nowtu. Yu no ben mus prisiri di den ben e kiri den sma fu Yuda. Yu no ben mus taki bigitaki di den ben de ini bigi benawtu. 13Yu no ben mus kon ini a foto fu Mi folku. Yu no ben mus prisiri di den ben de ini problema, di a ongoloku ben e miti en. Yu no ben mus langa yu anu teki den gudu fu en di a ongoloku ben e miti en. 14Yu no ben mus tnapu wakti tu tapu den sma di ben e lowe fu kiri den. Yu no ben mus grabu den sma tu di ben lon di den ben de ini a benawtu, fu gi den abra na den feyanti fu den. 15A dei fu MASRA de fu kon gi ala folku. Den o du den srefi sani nanga yu leki fa yu ben du. Den sani san yu du o fadon tapu yu eigi ede baka.
16Mi pipel, leki fa unu ben tesi Mi atibron tapu Mi santa bergi, na so ala folku sa tesi en tu. Den o dringi fu en te den no man moro èn a o de leki noiti den no ben de na grontapu. 17Ma un sa feni kibripe tapu a bergi Sion. A sa de wan santa presi. Den bakapikin fu Yakob sa kisi baka san ben de fu den. 18Den bakapikin fu Yakob sa de leki wan faya, den di fu Yosef sa de leki wan fayatongo, di fu Esau sa de a drei grasi. Den o bron en. A faya o nyan en, èn no wan bakapikin fu Esau sa tan na libi. Na MASRA taki tak' dati o psa.
19Den sma di e libi na a zuidsei sa teki a bergi pe Esau e tan abra, den wan di e tan ini a kontren na den bergifutu sa teki a kondre fu den Filistijnsma abra. Den o teki a kontren tu fu Efraim nanga di fu Samaria abra, èn Benyamin sa teki Gilead abra. 20Den sma fu Israel di den ben tyari gwe nanga tranga, sa tron wan legre di o teki a kondre fu den Kananitisma abra te go miti Sarefat. Den di fu Yerusalem di den ben tyari gwe nanga tranga, den di e libi na ini Sarefat, sa teki ala den foto na zuidsei abra. 21Sma o kren a Sionbergi fu tyari ferlusu, fu tiri den bergi fu Esau èn MASRA sa de kownu.
