Leri 12

₁A sma di lobi te wan trawan e sori en fa a mus libi,

na wan sma di lobi sabi,

ma a sma di no lobi srefsrefi te wan trawan e warskow en,

na wan don sma.

₂MASRA e sori En bunfasi na a sma di e libi bun,

ma A e krutu a sma di e waka nanga takru prakseri.

₃Ogridu no e hori no wan sma tnapu,

ma a sma di bun ini Gado ai de leki wan bon di beri en rutu dipi.

₄Wan dyadya uma e meki en masra kisi bigi grani,

ma wan uma di e gi en masra syen,

de leki wan takru siki di e nyan en fu inisei.

₅Sma di bun ini Gado ai no e waka nanga takru prakseri,

ma ogri-ati sma e prakseri soso fu bedrigi sma.

₆Den wortu fu ogri-ati sma e meki brudu lon,

ma den sani di wan sma di e libi leki fa a fiti e taki,

e ferlusu sma.

₇Ogri-ati sma e dede gwe

èn den no de fu si moro,

ma a oso fu den sma di bun ini Gado ai

sa tan tnapu.

₈O moro wan sma srapu,

o moro grani a e kisi,

ma den sma di e denki kruktu

tra sma e si fu noti.

₉A moro betre yu no de na teri ma yu abi wan knekti,

dan fu prei bigi ma yu no abi nyanyan.

₁₀Wan sma di bun ini Gado ai e sorgu bun gi den meti fu en,

ma ogri-ati sma no sabi san na sari-ati.

₁₁Wan sma di e wroko en pranigron sa abi furu nyanyan,

ma wan sma di e lon baka sani di no abi warti,

na wan sma di no abi ferstan.

₁₂Wan ogri-ati sma e angri fu kisi gudu tapu wan kruktu fasi,

ma a rutu fu den sma di bun ini Gado ai, e gi bun froktu.

₁₃Wan takru sma e fasi ensrefi nanga en eigi lei,

ma wan sma di bun ini Gado ai e kmopo ini benawtu.

₁₄Na den sani di wan sma e taki kan meki taki a abi en bun.

Den bun sani di wan sma du, e drai kon baka na en.

₁₅Wan don sma e prakseri ala ten taki a abi leti,

ma wan koni sma e teki rai.

₁₆Wan don sma e sori wantron taki en ati e bron,

ma wan sma di koni e hori en mofo te wan trawan afrontu en.

₁₇Wan sma di de fertrow e meki a tru kon na doro,

ma wan sma di no de fu fertrow e lei.

₁₈Den sani di wan sma e taki kan hati wan trawan

leki te wan nefi sutu en,

ma sani di a mofo fu wan koni sma e taki,

e dresi.

₁₉A tru e tan fu têgo,

ma wan lei no abi langa libi.

₂₀A ati fu wan sma di e prakseri ogri, furu nanga bedrigi fasi,

ma den sma di e suku fu tyari freide, abi prisiri.

₂₁No wan ogri sa miti a sma di bun ini Gado ai,

ma soso problema e miti wan ogri-ati sma.

₂₂Sma di e lei de leki wan groskin sani gi MASRA,

ma sma di de fu fertrow, e gi En prisiri.

₂₃Wan sma di koni no e meki ala sma sabi fa a koni,

ma wan sma di don e meki ala sabi fa a don.

₂₄Sma di e wroko tranga e kisi makti,

sma di lesi e tron srafu.

₂₅Sorgu e hebi a ati fu wan sma,

ma wan bun wortu e gi en prisiri.

₂₆A e go moro bun nanga a sma di bun ini Gado ai, dan ibri tra sma,

ma a ogri-ati sma e teki wan pasi di e tyari en go lasi.

₂₇Wan ontiman di lesi no o man fanga noti,

ma wan sma di e wroko tranga e feni furu gudu.

₂₈A sma di e du a wani fu Gado o libi langa,

na wan grati pasi pe dede no de.