1Ogri-ati sma e lowe sondro taki sma de na den baka,
ma den sma di bun ini Gado ai de leki yongu lew,
den sabi taki noti no o trobi den.
2Te sma fu wan kondre e feti nanga densrefi,
yu e abi furu edeman,
ma soso te yu abi wan koni man di e si sani krin,
sani sa go bun fu wan langa ten.
3Wan pôtiman di e pina tra pôtisma,
de leki wan sibibusi di e wasi ala sani gwe san prani.
4Sma di no e du san a wèt e taki,
e gi ogri-ati sma grani,
ma den sma di e hori a wèt,
e feti den.
5Takru-ati sma no e ferstan san a wani taki fu libi bun,
ma den sma di e suku MASRA, e ferstan krinkrin san dati wani taki.
6Wan sma di e pina ma tapu san trawan no man sori finga,
betre moro wan guduman di no de fu fertrow.
7Wan koni pikin e hori ensrefi na a wèt,
ma a pikin di e teki waka nanga sma di e nyan fu gridi,
e gi en p'pa syen.
8Son sma e kon gudu fu di den e teki furu moni moro
tapu san den leni wan trawan,
ma na tyari den e tyari a moni kon na wan,
gi sma di abi sari-ati nanga mofina sma.
9A sma di no wan arki a wèt srefsrefi,
a begi fu en na wan groskin sani gi Gado.
10A sma di e meki den di e libi leki fa a fiti, du sani di no bun,
o fadon ini a eigi olo di a diki gi den,
ma a sa go bun nanga den sma di e libi krin.
11Wan guduman kan koni ini en eigi ai,
ma wan pôtiman di koni sabi fa a de trutru.
12Te sma di bun ini Gado ai de na makti,
bigi prisiri e de,
ma te ogri-ati sma kon na makti,
a pipel e go kibri.
13A no sa go bun nanga a sma di e kibri den fowtu fu en,
ma Gado e gi a sma pardon di e taki tak' a sabi taki a fowtu,
èn di no e meki den fowtu moro.
14A sma di e tan lespeki MASRA, na wan blesi sma,
ma bigi ogri o miti a sma di tranga en ati.
15Leki wan lew di e bari,
leki wan beer nanga angri,
na so wan ogri-ati man de
di e tiri wan pipel di no man yepi densrefi.
16Wan tiriman di no abi ferstan e pina a pipel fu en furu,
ma a sma di no wani fu kon gudu tapu wan fasi di no fiti,
o libi langa.
17No yepi wan sma di kiri wan trawan,
meki a tan lon te leki a go ini en grebi.
18Noti no o miti a sma tapu san trawan no man sori finga,
ma wan sma di e libi kruktu, e fadon wantronso.
19Wan sma di e wroko en pranigron, sa abi furu nyanyan,
ma wan sma di e lon baka sani di no abi warti,
sa nyan pina.
20Wan sma di de fu fertrow, e kisi bogobogo blesi,
ma wan di wani gudu es'esi, o kisi strafu.
21Yu no mus teki a sei fu wan sma te yu de na fesi krutu,
bika gi wan pisi brede son sma e du dati kba.
22Wan gridi sma wani kon gudu es'esi,
ma a no sabi taki na pina e wakti en.
23A sma di e warskow wan trawan,
o kisi moro grani bakaten,
dan a sma di e taigi a trawan nomo san a wani yere.
24Wan sma di e fufuru fu en p'pa nanga en m'ma,
ma di no e si dati leki wan sondu,
na a srefi leki wan kiriman.
25Wan gridiman lobi meki trobi,
ma a sa go bun nanga a sma di poti en fertrow tapu MASRA.
26A sma di e fertrow na tapu en eigi denki,
na wan don sma,
ma a sma di e libi koni,
e kmopo na pasi gi ogri.
27A sma di e gi na pôtisma,
no sa mankeri noti,
ma a sma di e tapu en ai gi a nowtu fu den,
e kisi furu fluku na en tapu.
28Te ogri-ati sma kon na makti,
a pipel e go kibri,
ma te den no de na makti moro,
den sma di bun ini Gado ai e teki abra.
