Den rai di a m'ma fu kownu Lemuel gi en
1Disi na wortu gi kownu Lemuel,
nanga san en m'ma warskow en.
2San mi mus taigi yu, mi boi,
iya, mi boi di mi tyari,
mi boi, gi san mi meki pramisi,
san mi mus taigi yu?
3No lasi yu krakti soso nanga uma,
No lasi yu ten nanga uma di e meki kownu broko den neki.
4Lemuel, a no fiti taki kownu e dringi tumsi furu win,
a no fiti,
a no fiti tu taki tiriman lobi tranga sopi.
5Bika te den dringi, den kan fergiti a frantwortu di den abi,
èn kenki den leti fu den pôtiwan.
6Meki den sma di de fu dede, dringi tranga sopi,
èn meki sma di de ini dipi sari, dringi win.
7Meki den dringi fu den fergiti a pina ini san den de,
èn fu den fergiti den problema fu den.
8Ma yu mus taki gi sma di no man taki gi densrefi,
feti gi a leti fu den sma di trawan e si leki noti,
9Opo yu mofo, leisi strafu tapu wan leti fasi.
Meki den pôtiwan nanga den di abi yepi fanowdu feni den leti.
Grani gi wan dyadya uma
10Wan dyadya uma tranga fu feni.
A warti moro parelkrara.
11En masra e fertrow nanga en heri ati na en tapu,
soso wini a masra abi na en.
12A no e du en masra ogri, ma soso bun,
solanga a de na libi.
13Nanga prisiri a e teki en ten fu meki krosi,
gi a kowruten nanga gi a waranten.
14Leki fa sipi fu den bai nanga seriman e go teki lai farawe tyari kon,
na so a uma e go farawe go bai en nyanyan.
15A e opo te a dungru ete,
a e meki nyanyan klari gi en famiri,
èn a e gi den umasrafu a wroko di den mus du.
16Efu a poti ini en ede taki a o bai wan pisi gron,
a e bai en,
nanga moni di a wroko nanga en eigi anu
a e prani wan droifidyari.
17Na wan uma di e wroko tranga,
en anu no e weri fu wroko.
18A e si taki ala san a e du e go bun,
a e wroko heri neti.
19A e meki en eigi titei,
èn a e meki en eigi krosi.
20Nanga densrefi anu dati a e yepi pôtisma,
nanga den di abi yepi fanowdu.
21No wan sma ini en oso abi fu frede te a kowru ten doro,
bika a meki krosi fu hori den alamala waran.
22A e meki sribikrosi,
den krosi di a e weri meki fu fini linnen nanga redi purper.
23Den e lespeki a masra fu en mindri den prenspari sma,
te a e sidon drape mindri den edeman fu a foto.
24A uma e meki linnen krosi nanga banti,
fu seri gi den bai nanga seriman.
25Te yu e luku en, yu e si taki na wan tranga uma di fiti fu lespeki,
nanga prisiri a e luku den dei di de fu kon.
26A e taki nanga koni,
a e gi leri na tapu wan switi fasi.
27A e luku taki ala sani e go bun ini en oso,
A no e sidon sondro fu du noti.
28Ala den pikin fu en e prijse en,
en masra e gi en grani taki:
29“Yu abi furu dyadya uma,
ma yu bun moro den alamala.”
30A moi skin fu wan uma kan bedrigi,
a moi fesi fu en no de fu têgo,
ma wan uma di e lespeki MASRA,
fiti fu kisi grani.
31Meki a nyan den froktu fu den sani di a e du,
meki ala sma gi en grani fu den sani di a e du!
