1Mi boi, tan prakseri den sani di mi e taigi yu,
èn kibri den rai di mi e gi yu.
2Kibri den rai di mi e gi yu,
dan yu o libi langa.
Si den sani di mi e leri yu leki den moro diri sani di yu abi.
3Weri den leki wan linga na yu finga,
tan memre den.
4Taigi koni taki: “Yu na mi sisa”,
èn kari ferstan yu bun mati.
5Den o kibri yu gi a uma fu wan tra man,
di wani kori yu nanga switi wortu.
6Bika wan leisi mi ben tnapu na mi fensre,
mi ben e luku go na dorosei.
7Mi ben si wan grupu yongu sma di no sabi furu.
Dan mi si wan yonkuman na den mindri di no ben abi ferstan srefsrefi.
8A ben e waka ini a strati, krosbei fu a uku,
a ben e go na a sei fu a oso pe a uma e libi.
9A ben de mofoneti, a son ben saka gwe kba,
neti ben e fadon, a ben e kon dungru kba.
10Luku, a uma waka miti en,
a uma ben weri leki wan motyo,
a ben poti na en ede kba san a ben o du.
11A opruru, a e du san a firi fu du,
èn a no e tan na oso.
12Efu a no de na strati, dan a de na wowoyo,
ala uku a e tnapu e luru.
13Dan a brasa a boi hori, èn a bosi en,
a luku en ini en ai dan a taigi en taki:
14“Mi ben mus tyari wan freide-ofrandi,
èn mi tyari en tide.
15Na dati meki mi kmopo na oso, fu ben kan miti yu,
mi ben luku fu yu èn mi feni yu.
16Mi bradi krosi na tapu mi bedi kba,
linnen krosi fu Egipte nanga furu kloru.
17Mi dropu switismeri tapu mi bedi,
mirre, aloe nanga kaneri.
18Kon nanga mi, meki wi lasi un ede,
èn meki lobi te leki mamanten.
19Bika a man nanga san mi e libi no de na oso,
a go na wan fara presi.
20A tyari furu moni gwe nanga en,
baka tu wiki fosi a o kon baka.”
21Na so a kisi a yonkuman nanga den sani di a taigi en,
a kori en nanga den switi wortu fu en.
22Sondro fu prakseri a yonkuman go na en baka,
leki wan kaw di den e tyari go srakti,
leki wan man sondro ferstan di den bui fu tyari gwe,
23te leki wan peiri boro en niri.
A de leki wan fowru di e frei go fasi ini wan net,
sondro fu a ferstan taki a o lasi en libi.
24We dan, un boi, un mus arki mi,
un kaka un yesi gi den sani di mi e taigi unu.
25Un no meki a kori unu fu un teki na en baka,
no go na en pasi.
26Bika furu sma a gi mankeri kba,
den wan di a kiri no de fu teri.
27A oso fu en na a pasi fu go na dedekondre,
drape yu e saka go ini den kamra fu dede.
