A begi fu wan sma ini bigi benawtu
1A begi fu wan sma di no man tyari a hebi pina moro ini san a de èn di e loktu en ati na MASRA.
2MASRA, arki a begi fu mi,
meki a bari di mi e bari suku yepi doro na Yu.
3No drai Yu fesi gi mi
te mi de ini bigi benawtu,
ma kaka Yu yesi fu arki mi,
piki mi es'esi te mi e kari Yu.
4A libi fu mi e gwe leki fa winti e wai smoko gwe,
den bonyo fu mi e bron leki faya.
5Mi e firi misrefi leki drei grasi di sma traputrapu,
mi no e prakseri nyanyan srefi.
6Soso dyeme mi man dyeme,
ala den bonyo fu mi e kon fu si.
7Mi gersi wan tingifowru ini a bigi dreisabana,
wan owrukuku ini wan broko foto.
8Mi no man sribi,
mi gersi wan pikinfowru di de en wawan tapu a daki.
9Den feyanti fu mi e lafu mi heri dei,
den e teki mi leki eksempre fu fluku trawan.
10Mi e nyan asisi prefu brede,
a watra di mi e dringi e moksi nanga den watra-ai fu mi.
11Yu ati e bron srefsrefi na mi tapu,
Yu opo mi dan Yu fringi mi trowe.
12A libi fu mi de leki wan schaduw te mofoneti,
her' esi a no o de fu si moro,
leki grasi mi e drei gwe.
13Ma MASRA, Yu e sidon fu têgo tapu Yu kownusturu,
den sa memre Yu nen fu alaten.
14Yu o opo, Yu o sori Sion sari-ati baka,
bika a ten doro fu sori en Yu bun-ati,
a spesrutu ten doro kba.
15Bika den knekti fu Yu lobi den ston fu en,
wi e firi sari fu a broko di a broko didon na gron.
16Dan den folku sa lespeki MASRA
ala kownu sa lespeki a glori fu En,
17te MASRA bow Sion baka
èn sori Ensrefi ini glori,
18te A arki a begi fu den di lasi ala sani,
te A no poti a begi fu den na wan sei.
19Meki wan sma skrifi en poti
gi den wan di o kon na wi baka,
gi a folku di no gebore ete,
fu den kan prijse MASRA.
20Bika A ben luku fu a santa presi fu En na loktu,
MASRA ben luku fu heimel kon na grontapu.
21A yere den dyeme fu den strafuman,
A ferlusu den wan di ben de fu dede.
22Dan den sa taki fu a nen fu MASRA ini Sion,
èn prijse En ini Yerusalem,
23te den folku nanga den kondre kon na wan,
fu anbegi MASRA.
24A broko a krakti fu mi aladi mi yongu ete,
a syatu a libi fu mi.
25Mi begi taki: Mi Gado, no meki mi libi afu fu a libi fu mi nomo,
Yu di e libi fu têgo.
26Na Yu ben poti grontapu tnapu, bun langa kba,
heimel na a wroko fu Yu anu.
27Den sa psa gwe, ma Yu e tan.
Den sa kon owru, leki fa krosi e owru.
Yu o kenki den leki fa sma e kenki krosi,
den no o de fu si moro.
28Ma Yu e tan a srefi,
wan kba no e kon na den yari fu Yu.
29Den pikin fu den knekti fu Yu sa libi dyaso
sondro fu ogri miti den,
den pikin fu den srefi Yu o kibri.
