A bun-ati fu Gado
1Fu David.
Mi sili, prijse MASRA!
Nanga ala san de na ini mi, mi e prijse En santa nen.
2Mi sili, prijse MASRA!
No fergiti no wan fu den bun di A du.
3A e gi yu pardon fu ala yu kruktudu,
A e dresi ala yu siki,
4A e kibri yu fu yu no dede,
A e sori yu bogobogo lobi nanga sari-ati,
5A e meki soso bun miti yu, yu heri libi,
fu yu tan yongu èn tranga leki wan aka.
6MASRA e du sani tapu wan leti fasi,
èn A e meki den sma di trawan e pina
kisi den leti.
7A tyari den prakseri fu En kon na krin gi Moses,
A meki a pipel fu Israel si den wroko fu En.
8MASRA abi sari-ati nanga bun-ati,
A abi langa pasensi nanga bigi lobi.
9A no sa tan sori finga na wi tapu,
A no e hori sma na ati tu.
10A no e gi wi a strafu di wi fiti fu kisi fu wi sondu,
A no e gi wi a pai di wi fiti fu kisi fu wi kruktudu.
11Ma leki fa heimel de so hei fu grontapu,
na so a lobi fu En bigi gi den sma di abi lespeki gi En.
12Soleki fa a oostsei de so fara fu a westsei.
na so fara A e poti den kruktudu fu wi na wan sei.
13Leki fa wan p'pa e sorgu gi en pikin,
na so MASRA e sorgu
gi den sma di abi lespeki gi En.
14Bika A sabi nanga san wi meki,
A no fergiti taki wi meki fu kleidoti.
15A libi fu wan libisma de leki grasi,
a e opo leki den bromki ini wan wei.
16Te a winti wai psa na en tapu a no de fu feni moro,
sma no sabi moro pe a ben tnapu.
17Ma a lobi fu MASRA de fu têgo
gi den sma di abi lespeki gi En,
èn a bun fu En de fu têgo gi den bakapikin,
18gi den di e hori densrefi na a ferbontu fu En,
èn gi den di e hori densrefi na den gebod fu En.
19A kownusturu fu MASRA de na heimel,
A de kownu abra ala sani.
20Un engel fu MASRA, prijse En,
un dyadya fetiman di e du san A e taki,
un di e arki En sten.
21Prijse MASRA, ala un engel,
un knekti fu En di e du En wani.
22Prijse MASRA,
ala sani di A meki,
na ala sei pe A e rigeri,
Mi sili, prijse MASRA.
