A historia fu Israel
1Prijse MASRA, kari En nen,
ferteri den folku fu den bigi sani di A du.
2Singi gi En, singi psalmsingi gi En,
taki fu ala den wondru fu En.
3Meki bigi gi En santa nen.
Un di e suku MASRA, un prisiri.
4Suku fu MASRA, suku a krakti fu En,
tan suku En dorodoro.
5Memre den wondru di A du,
den marki nanga den krutu di a koti.
6Un bakapikin fu Abraham, a knekti fu En,
un bakapikin fu Yakob, a wan di A teki spesrutu.
7Na En, MASRA, na wi Gado,
A e krutu heri grontapu.
8A e hori Ensrefi fu têgo na a ferbontu fu En,
a pramisi di A meki fu alaten,
9a ferbontu di A meki nanga Abraham,
a sweri di A meki nanga Isak.
10A poti en gi Yakob
leki wan sani di den mus o tan du,
gi Israel leki wan têgo ferbontu,
11di A taki: “Na yu Mi o gi a kondre Kanaan,
leki a kondre di yu kisi taki na fu yu.”
12Di den no ben de nanga furu sma ete,
leki wan pikin grupu doroseisma,
13di den ben e waka fu a wan folku go na a trawan,
fu a wan kondre go na a trawan.
14A no gi no wan sma pasi fu pina den,
A ben e strafu kownu fu den ede:
15“No fasi den wan di Mi salfu,
no du den profeiti fu Mi ogri.”
16A ben meki angriten kon ini a kondre,
ala a nyanyan ben kon kba.
17Ma A ben seni wan man go na den fesi,
Yosef ben seri leki wan srafu.
18Den ben keti den futu fu en,
poti isri linga lontu a neki fu en
19te leki a ten ben doro
pe den dren di a ben tyari kon na krin
kon tru,
te leki den sani di MASRA ben taki
sori taki a abi leti.
20Dan a kownu seni sma go na en fu lusu en,
a man di ben tiri furu folku meki a kon fri.
21Dan a poti Yosef leki basi fu a oso fu en,
leki tiriman abra ala san a ben abi.
22fu sori den tiriman drape fa sani ben mus du,
fu leri den fesiman koni.
23Dan Israel go na Egipte,
Yakob go tan leki wan doroseisma ini a kondre fu Ham.
24Dan Gado meki a pipel fu En kon furu srefsrefi,
èn den ben kisi makti moro den sma di ben e pina den.
25Dan Gado kenki a ati fu den,
den no ben lobi a folku fu En srefsrefi moro,
èn den ben e kori den knekti fu En.
26Ne Gado seni Moses, a knekti fu En,
nanga Aaron, di Ensrefi ben teki.
27Den du den marki na den mindri
den marki di A ben taigi den tak' den o psa,
nanga wondru drape ini a kondre fu Ham.
28A seni dungru èn a kondre ben kon dungru.
ma den no ben wani du san A taki.
29Dan A meki a watra fu den tron brudu,
A kiri ala den fisi fu den.
30A meki todo furu a kondre tu,
te ini den kamra fu kownu.
31A komanderi èn kawfrei ben doro,
maskita ben furu a heri kontren fu den.
32Prefu alen A meki pis'pisi ijs fadon ini a kondre,
faya ben koti na loktu tu.
33A naki den droifidyari nanga den figabon fu den,
a broko ala den bon ini a kontren fu den.
34A komanderi èn sprenka doro,
someni taki den no ben de fu teri.
35den nyan ala grun wiwiri ini a kondre,
sosrefi ala a nyanyan na ini den pranigron.
36A kiri ala den fosi pikin di ben gebore ini a kondre fu den,
den tranga fosi manpikin.
37A meki a pipel fu En kmoto ini Egipte,
nanga furu gowtu nanga solfru sani,
no wan fu den ben e misi futu di den ben e gwe.
38Den sma fu Egipte ben breiti taki den Israelitisma ben gwe,
bika den ben frede fu den.
39A ben bradi wan wolku fu kibri den,
A ben gi den wan faya fu den ben kan si te neti.
40Di den aksi En nyanyan, A seni fowru gi den,
A gi den brede fu heimel tu èn den nyan te a sari den.
41A priti wan bergiston opo fu watra lon,
a lon leki wan liba ini a drei kontren pe den ben de.
42Gado no ben fergiti a santa pramisi
di A ben pramisi Abraham, a knekti fu En.
43A ben meki a pipel fu En hari gwe nanga prisiri,
den wan di A ben teki gi Ensrefi gwe nanga prisiri babari.
44A gi den a kondre fu tra folku,
den kisi den sani di ben de fu den tra folku.
45Drape den ben mus tan du den sani fu En,
èn hori densrefi na den wèt fu En.
Haleluya!
