Wan begi na ini nowtu
1Gi a tiriman fu a singigrupu fu a tempel. Fu David. Wan Psalm.
Tye Gado, Yu di mi e prijse,
no tan tiri!
2Bika ogri-ati sma nanga bedrigiman e taki na mi tapu,
den e taki wan lo lei fu mi.
3A de fu yere ini den sani di den e taki
taki den no lobi mi srefsrefi,
den e feti mi sondro taki mi du den wan sani.
4Den e piki a lobi fu mi nanga feyantifasi,
ma mi e tan begi.
5Den e pai a bun fu mi nanga ogri,
mi e sori den lobi, ma den no man si mi na ai.
6“Meki wan ogri-ati krutubakra krutu a tori fu en,
meki wan sma tnapu na en let'anu fu krutu en.
7A mus fiti fu kisi strafu te den krutu en,
Gado no mus arki a begi fu en.
8Meki a dede fruk'fruku,
meki wan tra sma du a wroko fu en.
9Meki den pikin fu en tan sondro p'pa,
a uma fu en sondro masra.
10Meki den pikin fu en e waka begi nomo,
meki den suku nyanyan ini den oso di broko didon na gron.
11Meki den sma di a mus pai
kon teki ala san a libi na baka,
meki sma di a no sabi
kon fufuru ala sani gi san a naki en skin.
12Meki no wan sma tan sori en lobi,
meki no wan sma abi sari-ati nanga den pikin fu en.
13Meki ala den pikin nanga bakapikin fu en dede gwe,
meki sma di e gebore na en baka no sabi not'noti fu en.
14Meki MASRA tan memre den kruktudu fu den afo fu en,
meki A no fergiti den sondu fu a m'ma fu en.
15Meki MASRA tan si den na en fesi,
meki no wan sma na grontapu memre a nen fu den moro.
16Bika a no ben prakseri fu sori lobi tu,
ma a ben go na baka den mofinawan, den pôtiwan
nanga den sma di ben lasi ati,
te leki den dede.
17A ben lobi fu fluku trawan
meki den fluku kon now tapu ensrefi
a no ben lobi blesi trawan
meki blesi tan fara fu en tu.
18Meki fluku de na en tapu leki fa krosi e tapu wan sma skin,
meki den furu en inisei leki a watra di a e dringi,
meki den go te ini en bonyo leki a oli.
19Iya, meki a fluku de na en tapu leki a krosi na en skin,
leki a banti di a tai lontu en bere ala dei.”
20Meki dati de a pai di MASRA e gi den feyanti fu mi,
den di e winsi fu ala den ogri disi miti mi.
21Ma Yu, MASRA Masra, du bun gi mi fu Yu nen ede,
ferlusu mi, fu a bigi lobi fu Yu.
22Mi na wan mofinawan èn mi pôti,
mi ati soro na mi inisei.
23A libi e kmopo ini mi leki fa wan schaduw e gwe te neti e fadon,
leki wan sma e seki wan sprenka puru na en skin.
24Den kindi fu mi kon swaki fu a faste di mi e faste,
mi kon mangri, no wan fatu no de moro na mi skin.
25Na dati meki den e teki mi e meki spotu,
te den e si mi den e seki den ede.
26MASRA, mi Gado, yepi mi,
ferlusu mi fu Yu bigi lobi ede.
27Dan den sa kon sabi taki na Yu anu de ini a tori
taki na Yu, MASRA, du en.
28Blesi mi, awinsi den e fluku mi,
meki den kisi syen, awinsi den e opo densrefi,
ma meki Yu knekti abi prisiri.
29Meki syen naki den feyanti fu mi,
meki a syen de na den tapu leki wan krosi.
30Ma mi sa prijse MASRA nanga tranga sten,
singi gi En na mindri fu furu trawan,
31bika A de wan yepi gi den pôtiwan,
A e puru den ini anu fu den wan di e krutu den.
