Wan begi fu bribi
1Gi a tiriman fu a singigrupu fu a tempel. A mus singi a srefi fasi leki: A doifi di sidon farawe ini den bigi bon. Fu David. Wan begi di den Filistijnsma ben grabu en na a foto Gat.
2Tye Gado, sori mi a bun-ati fu Yu,
bika sma de na mi baka fu du mi ogri.
Heri dei den di e feti mi e pina mi.
3Den di e pina mi, de nomo na mi baka heri dei,
iya, den de nanga furu,
den di de ini den hei presi e feti mi.
4Te mi e frede, na tapu Yu mi e fertrow.
5Tapu Gado, di mi e gi tangi fu En pramisi,
tapu Gado mi e fertrow èn mi no e frede.
San wan libisma leki misrefi o man du mi?
6Heri dei den e pina mi nanga den sani di den e taki.
Den prakseri fu den na soso fu du mi ogri.
7Den e kon na wan fu feti mi,
den e luru mi, den e luku ala presi pe mi e go,
den e suku wan okasi fu kiri mi.
8Den no o man kmoto fu a strafu fu den.
Tye Gado, puru a folku dati na pasi ini a hebi atibron fu Yu.
9A go di mi ben mus go fu a wan presi na a trawan,
Yu skrifi en poti.
Yu fanga den watra-ai fu mi ini Yu kroiki.
Ala den sani dati skrifi ini a buku fu Yu.
10Te mi e kari Gado fu yepi mi,
den feyanti fu mi mus fu hari gwe.
Bika mi sabi taki Gado de nanga mi.
11Tapu Gado, di mi e gi tangi fu En pramisi,
tapu MASRA, di mi e gi tangi fu En pramisi,
12tapu Gado mi e fertrow, mi no e frede,
san wan libisma o man du mi?
13Mi Gado, den sani di mi pramisi Yu,
mi sa du den nomonomo,
mi sa tyari ofrandi fu gi Yu grani,
14bika Yu ferlusu mi puru ini anu fu dede,
Yu kibri den futu fu mi fu mi no fadon.
Now mi kan waka èn sabi taki Gado e luku mi,
mi kan waka ini a faya di e gi libi.
