Gado e du sani nanga leti
1Wan psalm fu Asaf.
Fu tru, Gado bun gi Israel,
gi den sma di e dini En wawan.
2Ma mi fu mi sei,
pikinso moro dan mi ben kmopo tapu a pasi,
pikinso moro dan den futu fu mi ben grati kmopo.
3Bika mi ben e dyarusu tapu den sma
di no feni en fanowdu fu du Gado wani,
mi ben e dyarusu di mi si taki sani e go bun
nanga den ogri-ati sma.
4Den no sabi san na siki,
den e nyan bun èn den gesontu.
5Den no sabi san na broko-ede,
den problema di tra sma abi,
den no abi.
6Dat' meki a heimemre fu den de fu si
leki wan keti na den neki,
a du di den e du sani nanga tranga
de leki wan krosi na den skin.
7Den fatu sote, taki den ai e suku fu kon na doro,
a ati fu den furu nanga ogri prakseri.
8Den e meki spotu,
èn tapu wan ogri-ati fasi den e taki nanga heimemre
fa den o kwinsi trawan.
9Den e kosi Gado,
èn den e gi sma bigitaki.
10Na dat' meki sma e waka na den baka,
den e dringi den wortu fu den leki watra.
11Den e taki:
“Fa Gado o man sabi san wi e du?
Fa a Moro Hei Gado o man kisi dati fu yere?”
12Iya, na so den ogri-ati sma e taki,
den no abi no wan broko-ede
èn den e kon gudu moro nanga moro.
13Ma mi dati, na fu soso mi hori mi ati krin,
na fu soso mi no du ogri.
14Bika na heri dei Gado e strafu mi,
ala mamanten baka A e fon mi.
15Ma efu mi sa taki leki fa den e taki,
dan a ben o de leki na seri mi e seri a pipel fu Gado.
16Mi broko mi ede fu ferstan a sani disi,
a ben e dangra mi tumsi,
17te leki mi go ini a santa presi fu Gado,
dan mi kon ferstan san o miti den.
18Fu tru, Yu e tyari den waka tapu grati pasi,
Yu e meki den fadon fu den no opo noiti moro.
19Ini wan pingi fu wan ai den e dede gwe,
den no de fu si moro,
den e dede wan takru dede.
20Yu e si den leki noti Masra,
den de leki wan dren
te Yu wiki, wantronso den no de fu si moro.
21Di mi ati ben bita,
di mi ben e nyan mi niri,
22mi ben don,
mi no ben abi ferstan srefsrefi,
leki fa meti no abi ferstan.
23Ma now mi e ferstan taki ala ten mi de na Yu,
taki Yu hori mi na mi let'anu.
24Nanga den rai di Yu e gi mi,
Yu e sori mi fa mi mus waka.
Dan Yu o teki mi tyari gwe nanga glori.
25Boiti Yu mi no abi no wan tra sma na ini heimel,
mi no e angri fu noti tu na grontapu.
26Awinsi a ati fu mi tan tiri,
a skin fu mi pori gwe,
Yu, Gado, na a Trangawan,
Yu na ala san mi abi fu têgo.
27Bika mi sabi taki den di de fara fu Yu,
o lasi den libi.
Yu e puru ala sma na pasi
di no wan waka na Yu baka.
28Ma mi fu mi sei,
a bun gi mi fu tan krosbei fu Gado,
na Masra MASRA na mi kibripresi.
Mi sa ferteri fu ala den sani di Yu du.
