Kon na krin 12

₁Dan wan bigi marki ben de fu si na heimel. A ben de wan uma di ben weri a son leki krosi, èn di ben abi a munkenki ondro en futu. Tapu en ede a ben abi wan kroon san ben meki fu twarfu stari. ₂A uma ben abi bere, èn a ten ben kisi fu meki a pikin. A ben e bari fu a pen san a ben abi fu meki a pikin. ₃Dan wan tra marki ben de fu si na heimel. A ben de wan bun bigi kaiman san ben redi leki faya. A ben abi seibi ede nanga tin tutu. Tapu iniwan fu den seibi ede a ben weri wan kroon. ₄Nanga a tere fu en a hari wan fu ala dri stari san de na heimel puru, dan a fringi den go na grontapu.

Dan a bigi kaiman go tnapu fesi a uma fu a kan nyan a pikin te a gebore. ₅A uma meki wan manpikin. A manpikin disi o tiri ala sma di no sabi Gado, nanga wan isri tiki. Ma a srefi momenti dati den puru a pikin disi na a uma, tyari en go na a kownusturu fu Gado. ₆Dan a uma lon go ini a dreisabana na wan presi san Gado ben meki klari gi en. Drape den ben o sorgu gi en twarfu hondro nanga siksitenti dei langa.

₇Dan feti broko ini heimel. Mikael nanga den engel fu en ben feti nanga a bigi kaiman. A bigi kaiman nanga den takruyeye fu en ben feti baka nanga en. ₈Ma a bigi kaiman no ben man wini a feti. Dan en nanga den takruyeye fu en no ben abi primisi moro fu tan na heimel. ₉Den fringi a bun bigi kaiman puru na heimel go na grontapu. Na en na a sneki di ben de sensi fosten. Na en den e kari didibri nanga Satan. Na en e kori ala den sma na grontapu. ₁₀Dan mi yere wan tranga sten na ini heimel taki: “Now wi Gado o ferlusu den sma fu En. A o teki En makti èn rigeri leki kownu. Now a Wan di A poti fu tron Kownu o sori taki A abi makti. Bika den fringi a wan go na grontapu di ben go dei nanga neti na fesi wi Gado fu krutu den brada nanga sisa fu unu. ₁₁Den brada nanga sisa fu unu wini en, fu di a Lam ben gi En brudu fu den ede èn fu di den ferteri trawan a wortu fu Gado. Den no ben frede fu lasi den libi fu dati. ₁₂Dat' meki heimel nanga ala sma di e libi na ini mus prisiri. Ma grontapu nanga a se de fu sari. Bika didibri kon na grontapu nanga bigi atibron fu di a sabi taki a no abi furu ten moro.”

₁₃Di a bigi kaiman si taki den fringi en go na grontapu, a bigin lon baka a uma di ben meki a manpikin. ₁₄Ma den gi a uma den tu frei fu wan bigi gonini, fu a frei go ini a dreisabana na a presi pe a sneki no ben man fasi en. Drape den ben o sorgu gi en dri nanga afu yari langa. ₁₅Dan a sneki spiti watra puru ini en mofo leki wan liba fu srepi a uma gwe. ₁₆Ma a drei gron kon yepi a uma. A priti opo, swari a liba san a bigi kaiman ben puru ini en mofo. ₁₇Ne a bigi kaiman ati bron srefsrefi tapu a uma. A drai go feti nanga den tra pikin fu en, di e du san Gado taki èn di e tan hori na den sani san Yesus ben leri.

₁₈Dan a bigi kaiman go tnapu na a syoro fu a se.