1Luku fa yu moi, mi lobi
ai, luku fa yu moi.
baka a duku di tapu yu fesi,
yu ai gersi di fu wan doifi.
A blaka wiwiri fu yu e dansi
leki krabita di e lon saka a Gileadbergi.
2Yu tifi weti,
weti leki wan grupu uma skapu
di e kmoto ini a watra,
Tu na tu den e kmoto ini a watra,
no wan no e mankeri.
3Yu mofobuba redi,
redi leki wan redi titei.
trutru, yu mofo moi fu si.
Mi e si yu seifesi baka a duku di tapu yu fesi,
a redi, redi leki wan granaki-apra.
4Yu neki moi leki a toren fu David
balkon bow lontu en.
Dusundusun schild anga na en,
schild fu dyadya fetiman.
5Tu yongu dia,
na dati den borsu fu yu de,
wan twelengi fu wan uma dia,
di e nyan grasi na mindri den lelibromki.
6Fosi a kowru winti bigin wai te mofoneti
fosi dungru bigin e fadon,
mi wani go na a hei mirrebergi
na a pikin wierookbergi.
7Mi lobi, ala sani na yu moi.
Noti no mankeri na yu.
8Mi trowmisi, saka kmoto fu a Libanonbergi,
saka fu a Libanon kon na mi,
saka kmoto fu a moro hei pisi fu Amanabergi,
a moro hei pisi fu a Senirbergi,
fu a Hermonbergi
kmoto fu den olo pe den lew e tan,
fu den bergi pe den tigri de.
9Mi sisa, mi trowmisi,
yu meki mi lasi mi ede,
luku wawan yu luku mi,
a brenki wawan fu a keti na yu neki
meki mi lasi mi ede.
10Mi sisa, mi trowmisi
a lobi fu yu switi
a e drungu mi moro leki win.
A smeri fu yu skin
switi moro di fu spesrei.
11Mi trowmisi, oni de tapu yu mofobuba,
oni nanga merki de ondro yu tongo.
Yu krosi abi a smeri fu a Libanon.
12Mi sisa, mi trowmisi,
wan dyari yu de, tapu fu alasei
wan bron yu de di sroto nanga wan stampu na en tapu.
13Na ini yu wan moi dyari e sproiti kmoto,
nanga granaki-aprabon
nanga switi froktu
hennabromki nanga nardus.
14nardus nanga safraan,
kalmus nanga kaneri.
ala sortu wierook
mirre nanga aloe
nanga ala sortu diri spesrei.
15Wan watrabron na ini wan dyari yu de,
watra e lon kmoto na ini yu,
leki den liba fu a Libanon.
16Wai, winti fu a noordsei,
kon, winti fu a zuidsei
wai ini mi dyari, panya a smeri fu balsem.
Meki a wan di mi lobi kon ini en dyari
fu tesi den switi froktu.
