Sakaria 14

₁Arki, MASRA poti wan dei pe den o prati den sani di den wini ini a feti nanga unu leti ini a foto srefi. ₂Mi o meki ala folku opo fu feti Yerusalem. Den o teki a foto abra, den o fufuru ala sani puru ini den oso èn den o didon nanga den uma fu a foto. Den o tyari afu fu den sma fu a foto gwe leki srafu na wan tra kondre. Ma a tra afu o tan ini a foto. Den no o dede. ₃Dan MASRA sa hari go feti nanga den folku, leki fa A ben du fosi di feti ben e feti. ₄A dei dati A sa tnapu nanga en futu tapu a Oleifbergi, di didon na oostsei fu Yerusalem. Dan a oleifbergi o priti na tu, go na a oostsei nanga na a westsei. A o tron wan bigi dal. Wan pisi fu a bergi o go na a noordsei, a tra pisi o go a zuidsei. ₅Dan un mus lowe go ini a dal fu Mi, na mindri den bergi, di o sa langa go te na Asel. Iya, un mus lowe leki fa un ben lowe gwe di a gron ben seki hebi na ini den dei fu Usia, a kownu fu Yuda. Dan MASRA, mi Gado, sa kon nanga ala den santa wan fu En. ₆A dei dati o dungru èn a no sa kowru. ₇A dei dati, di MASRA wawan sabi, yu no sa sabi oten na dei noso neti. Te neti e fadon a dei o kon krin. ₈A dei dati watra o lon kmoto na ini Yerusalem. Afu o lon go na a se na a oostsei, a tra afu o lon go na a se na a westsei. Disi sa psa na ini a kowruten nanga a waran ten. ₉Dan MASRA sa tron kownu fu heri grontapu. A pisten dati MASRA sa de a enkri Gado èn En nen sa de a wan enkri nen. ₁₀A heri kondre o kon tan leki wan bigi opo wei fu Geba te go miti Rimon, na a zuidsei fu Yerusalem. Ma Yerusalem sa tan didon tapu en hei presi fu a Benyaminpoort go miti a presi pe a fosi doro ben de, fu a Ukupoort go na a Hananeltoren èn fu drape go na a presi pe den baki de pe den e masi win gi kownu. ₁₁Sma sa libi drape baka. No wan fluku sa de moro na en tapu. Yerusalem sa de wan presi pe den kan tan sondro frede.

₁₂Disi sa de a siki nanga san MASRA sa naki den tra folku di ben hari kon fu feti Yerusalem: Den skin sa pori gwe, aladi den e waka lontu libilibi ete. Den ai sa pori gwe ini den ai kasi èn den tongo sa pori gwe ini den mofo. ₁₃Iya, a pisten dati MASRA srefi sa meki wan bigi bruya de na den mindri. A wan sa grabu a trawan hori èn den sa feti nanga makandra. ₁₄Iya, Yuda srefi sa feti nanga Yerusalem. Yerusalem sa teki a gudu fu ala den folku di e libi lontu en: gowtu, solfru nanga bun furu krosi. ₁₅A srefi siki di naki den sma sa naki den asi, den buriki, den kameel, nanga ala den meti di de ini a legrekampu.

₁₆Ala den sma di ben tan na libi fu den tra folku di ben hari kon feti nanga Yerusalem, sa kon ala yari fu kon boigi gi a Kownu, MASRA fu ala sani èn fu hori a fesa fu memre taki den Israelitisma ben e libi fu wan pisten ini kampu. ₁₇Efu wan folku de na grontapu di no wani hari go na Yerusalem fu boigi gi a Kownu, MASRA fu ala sani, dan alen no sa fadon ini a kondre dati moro. ₁₈Efu den sma fu Egipte no wani hari go na Yerusalem tu, dan MASRA sa strafu den tu nanga a strafu nanga san A e strafu den tra folku di no wani kon hori a fesa fu memre taki den Israelitisma ben e libi wan pisten ini kampu. ₁₉Disi sa de a strafu gi den sma fu Egipte nanga ala tra folku di no wani hari go hori a fesa fu memre taki den Israelitisma ben e libi fu wan pisten ini kampu.

₂₀A pisten dati den sa skrifi tapu den bel fu den asi: Spesrutu gi MASRA. Den patu ini a oso fu MASRA den o teki leki beki na a altari. ₂₁Iya, ala patu na ini Yerusalem nanga Yuda sa santa gi MASRA fu ala sani. Ala sma di wani tyari wan ofrandi kan teki den fu bori a meti na ini. A pisten dati no wan sma fu Kanaan sa de ini a oso fu MASRA fu ala sani.