Sakaria 5

₁Mi opo mi ede baka, mi luku, dan mi si wan buku di ben e frei. ₂Dan a aksi mi taki: “San yu e si?” Mi piki taki: “Mi e si wan buku di e frei. A langa sowan tin meter èn a bradi sowan feifi meter.” ₃Dan a taigi mi taki: “Disi na a fluku di e go abra a heri kondre. Na a wan sei skrifi taki a sma di fufuru o dede a srefi momenti dati. Na a tra sei skrifi taki a sma di lei gi wan trawan, sa dede a srefi momenti dati. ₄Na Mi poti a fluku dati MASRA fu ala sani taki. A sa de tapu a oso fu a fufuruman, nanga tapu a oso fu a sma di e lei, ma a sweri na ini Mi nen taki a no de so. A fluku sa tan a heri neti tapu en oso. A sa broko a oso. Udu nanga ston fu a oso a sa broko.”

₅A engel di ben e taki nanga mi kon moro krosbei dan a taigi mi taki: “Opo yu ede luku san e kon drape.” ₆Dan mi aksi en taki: “San na dati?” A piki mi taki: “Na wan bari e kon drape.” A taigi mi moro fara taki: “Na den sondu di den e du ini a heri kondre.” ₇Dan mi si fa a loto tapun fu en opo. Wan umasma ben sidon ini a bari. ₈Dan a engel taigi mi taki: “Dati na a hogri.” Dan a fringi a uma go baka ini a bari dan a poti a loto tapun baka na en tapu. ₉Mi opo mi ede baka, mi luku, dan mi si tu umasma e frei kon. Den ben abi frei leki wan fowru. Dan de opo a bari tyari gwe na ini loktu. ₁₀Ne mi aksi a engel di ben e taki nanga mi taki: “Pe den e tyari a bari go?” ₁₁A piki mi taki: “Den e tyari en go na a Sinear. Drape den o meki wan oso gi en. Te a oso kba, den o poti en tnapu drape tapu wan futupisi.”