Sakaria 6

₁Mi opo mi ede baka, mi luku, dan mi si fo wagi. Den ben e kmoto kon na mindri tu bergi. Den bergi ben de fu kopro. ₂Na fesi a fosi wagi den ben span broin asi. Na fesi a di fu tu wagi den ben span blaka asi. ₃Na fesi a di fu dri wagi den ben span weti asi èn na fesi a di fu fo wagi den ben span flakaflaka asi. Den ben de tranga asi. ₄Dan mi aksi a engel di ben e taki nanga mi taki: “Mi masra, san disi wani taki?” ₅A engel piki mi taki: “Na den fo winti fu heimel. Den e hari gwe baka di den kmoto na fesi Masra fu heri grontapu. ₆A wagi nanga den blaka asi e hari go na noordsei. Den weti asi e hari go na westsei. Den flakaflaka wan e go na zuidsei.” ₇Den tranga asi ben e stampu nanga den futu. Den ben e angri fu hari gwe fu psa abra heri grontapu. Di a taki: “Un go, un psa abra heri grontapu,” den asi hari gwe fu go psa abra heri grontapu. ₈Dan a kari mi, dan a taigi mi taki: “Luku, den asi di hari go na noordsei sa meki a atibron saka di mi ben abi nanga a noordsei.”

₉Disi na a boskopu di MASRA gi mi. ₁₀A taki: “Yu mus teki kado fu Heldai, Tobia nanga Yedaya. Den man disi drai kmoto fu Babel, pe den ben go leki srafu. Den e tan ini a oso fu Yosia, a manpikin fu Sefanya. Dan yu mus kon tide srefi ete drape. ₁₁Yu mus teki solfru nanga gowtu, dan yu e meki wan kroon fu en. Baka dati yu mus poti en tapu a ede fu granpriester Yosua, a manpikin fu Yosadak. ₁₂Yu mus taigi en taki: ‘Na disi MASRA fu ala sani taki: arki, wan man nanga a nen fu Yongu Taki, sa gro, gi yongu taki èn a sa bow a tempel fu MASRA. ₁₃Iya, na en sa bow a tempel fu MASRA baka. Den sa gi en grani leki wan kownu èn a sa sidon tapu en kownusturu. Wan priester sa de tu di sa abi en eigi kownusturu èn makandra den sa tiri a kondre ini freide. ₁₄A kroon sa tan ini a tempel fu MASRA, fu memre Heldai, Tobia, Yedaya nanga a bunfasi fu a manpikin fu Sefanya. ₁₅Fu fara sma sa kon fu kon yepi bow a tempel fu MASRA. Dan un sa kon sabi taki na MASRA fu ala sani seni mi kon na unu. Disi sa psa efu yu arki bun san MASRA, yu Gado, e taigi yu.’ ”