A sondu fu Yerusalem
1Un mus luku bun!
Un sma fu a foto
di no wani du san Mi e taki,
di doti unsrefi nanga den sani di un e du,
èn di e pina sma fu un eigi folku.
2Un no e arki no wan sma,
un no wani fu sma sori unu tapu un fowtu.
Un no e poti un fertrow na tapu MASRA.
Un no e suku fu kon krosbei fu un Gado.
3Den edeman fu unu gersi krasi tigri,
den krutubakra fu unu gersi krabudagu,
den no e libi no wan bonyo gi mamanten.
4Den profeiti fu unu
na soso takiman di no de fu fertrow.
Den profeiti fu unu e pori den santa sani.
Den no e du srefsrefi san a wèt e taki.
5Ma MASRA, di de na den mindri,
e du sani nanga leti.
A no e du kruktu sani.
Ala mamanten A e du sani nanga leti.
Te dei broko A no e fergiti fu du en.
Ma den sma di no e du sani nanga leti
no abi syen.
6Mi figi folku puru na pasi.
Den toren fu den foto broko kmoto.
Mi broko den strati fu den.
Sma no man waka drape moro.
Den foto fu den broko didon,
leigileigi, no wan sma no de ini den.
7Mi ben taki: “Un lespeki Mi,
meki Mi sori unu tapu un fowtu.”
Dan Mi no sa broko den tanpresi fu unu.
Dan Mi no sa strafu unu.
Ma noti fu dati,
den ben e tan du den srefi ogri sani
8Dat' meki MASRA taki: un wakti,
un wakti tapu a dei
pe Mi o kon teki ala sani tyari gwe.
Bika Mi koti a krutu tapu a fasi disi
taki Mi o tyari ala folku kon na wan,
tyari ala den kondre nanga den kownu kon makandra,
dan Mi o lusu Mi atibron na den tapu
a faya atibron fu Mi.
Bika a dyarusu di Mi e dyarusu
o bron heri grontapu.
9Dan Mi o gi den folku soifri mofobuba fu taki,
fu den kari soso a nen fu MASRA.
Den o tnapu sei nanga sei fu dini En.
10Fu te abra den liba fu Etiopia
den wan di e anbegi Mi,
den wan di ben panya go na alasei,
sa tyari ofrandi gi Mi.
11Ma a dei dati un no o abi fu firi syen
fu ala den sani di un du,
di no ben bun ini Mi ai.
Bika Mi o puru na un mindri
ala sma di e prisiri
fu di den e denki bigi fu densrefi.
Bigin fu a dei dati
un no sa abi bigifasi moro
tapu Mi santa bergi.
12Mi o sorgu taki wan pikin èn swaki folku tan na baka ini a foto,
di e suku yepi na MASRA.
13Den sma fu Israel di tan na baka
no sa du moro san no bun,
den no sa taki sani di no tru
èn den no sa bedrigi trawan nanga den mofo moro.
Bika den sa didon leki skapu na ini wan wei,
sondro taki wan sani trobi den.
14Prisiri, umapikin fu Sion,
Singi fu prisiri, Israel.
Umapikin fu Yerusalem,
yu mus breiti, yu mus lafu nanga yu heri ati.
15MASRA puru a strafu na yu tapu
di yu ben mus kisi.
A figi den feyanti fu yu puru na pasi.
MASRA, a Kownu fu Israel, de na un mindri.
Yu no abi fu frede noti moro.
16A dei dati den sa taigi Yerusalem taki:
“No frede, Sion, no lasi ati.”
17MASRA, yu Gado, de na un mindri.
Wan dyadya fetiman, di e tyari ferlusu.
A sa abi prisiri nanga unu.
Fu di a lobi unu, meki A o tan tiri.
A sa breiti èn abi prisiri nanga unu.
18Mi sa tyari den wan di e sari,
èn di de fara fu a fesa
kon na makandra.
A syen di ben miti den
ben de leki wan hebi na den tapu.
19Ma arki, a dei dati Mi sa puru ala den sma di e pina unu na pasi.
Mi sa ferlusu den malengri wan,
èn Mi sa tyari kon na wan, den wan di ben panya go na alasei.
Dan Mi sa gi grani nanga bigi nen
na den wan di heri grontapu ben e si leki noti.
20A dei dati Mi sa tyari un kon baka.
A dei di Mi o tyari un kon makandra
Mi o gi unu grani nanga bigi nen
na mindri ala den folku fu grontapu.
Nanga un eigi ai un o si fa Mi o tyari wan kenki kon gi unu,
MASRA taki.
